Iehova Ia Henia Hahenamo Oi Lalodia Bada Momokani, A?

KENICHI, tau badana ta, be muramura idia hoihoilaia sitoa dekenai ia lao, udu kurukuru ena muramura ia hoia totona. Unai muramura ia abia neganai, ena tauanina dekenai ia hegeregere lasi dainai, ena kopina ibounai ia hemaihemai bona toto mai edia ranu idia vara. Ita hoa lasi, Kenichi ia laloa reana unai muramura hoihoilaia tauna ese ena gorere ia laloa bada lasi.

Reana taunimanima haida ese Dirava be Kenichi ese unai muramura hoihoilaia tauna ia laloa hegeregerena idia laloa. Idia daradara bema siahu ibounai Diravana, Iehova, ese ita ta ta ia laloa momokani eiava. Ena be idia abia dae Dirava be namo, ia ese ita ta ta ia laloa idia abia dae vaitani lasi. Unai lalohadai idia abia edia mauri dalana ia namo lasi neganai, eiava Baibel ena hakaua herevadia idia badinaia to hekwakwanai idia davaria neganai. Edia aonega be hegeregere lasi dainai, idia laloa edia hekwakwanai be Kenichi ese ia abia haraga hemaihemai bona toto bamona, hegeregere dala ta ai idia be Dirava ena kerere.​—Aonega Herevadia 19:3.

Iehova be goevadae lasi taudia ida ita hahegeregerea be namo lasi. Taunimanima edia diba be bada lasi. Idia ese ma haida edia dabu gaudia idia itaia namonamo lasi, Kenichi dekenai muramura ia hoihoilaia tauna ia karaia bamona. To Iehova be idau, ia ese gau ibounai ia itaia. Nega momo Iehova ese ita ia durua ena be unai ita itaia lasi bona ita laloa bada lasi, badina vaia iseda kara, ita dekenai idia noho lasi gaudia ita laloa momo bona ita abia hahenamo momo ita laloa lasi. Namona be Iehova ena amo idia mai hahenamo ita itaia toho, namo lasi ita gwau iseda hekwakwanai be Iehova ena kerere dainai idia vara.

Webster’s Ninth New Collegiate Dictionary ena hereva hegeregerena “hahenamo” (“blessing”) ita gwauraia diba ia be “moale eiava noho namo ia habadaia gauna ta.” Oi abia dae Iehova ena amo idia mai hahenamo dekenai unai be momokani, a?

Naria Tauna Hereadaena

Bema hahine ta ia gwau ena adavana be naria tauna namona, ia laloa ena tau ese ruma bese taudia edia dabu gaudia ia durua namonamo, hegeregere ia henia aniani, ruma, bona dabua dainai ruma bese taudia idia moale diba bona noho namo idia abia. Iehova be edena bamona Naria Tauna? Iseda tanobada, taunimanima edia noho gabuna, mani oi itaia namonamo. Ena daudau dina amo be kilomita 150,000,000, unai padana be maoro momokani siahu namona havaraia totona, unai siahu maorona dainai tanobada ai mauri gaudia idia noho diba. Dirava ese iseda tanobada ena gini dalana, 23.5-degree, ia hegaegaelaia namonamo dainai, siahu bona keru negadia idia vara bona uma edia anina bada idia havaraia. Unai dainai, tanobada ai idia tubu aniani be hegeregere taunimanima bilioni ima bona ma haida ubua totona. Momokani, Iehova be Naria Tauna namona!

Ma danu, Baibel ese ita ia hadibaia Iehova ese ita ta ta bona iseda namo ia laloa bada. Mani oi laloa, Iehova be hisiu bilioni momo ta ta edia ladana ia diba, bona manu maragimaragi ta be tano dekenai ia moru be ia ese unai danu ia diba. (Isaia 40:26; Mataio 10:29-​31) Unai dainai ia idia lalokau henia taudia, ena natuna lalokauna, Iesu Keriso, ena rarana amo ia hoia taudia, ia lalodia bada! (Kara 20:28) Aonega tauna ta ia hereva maoro, ia gwau: “Lohiabada ena hanamoa sibona ese, kohu momo oi dekenai ia henia noho, bona unai kohu danu, ese lalohisihisi sisina oi dekenai do ia henia lasi.”—Aonega Herevadia 10:22.

Ita Idia Hanamoa Bada Hahenamo

Ita dekenai davana bada gauna ta ia noho bona unai dainai ita tanikiu henia be namo. Unai be dahaka? Baibel ese unai ia gwauraia: “Oiemu uduna hereva ena taravatu be namo herea lau dekenai. Golo bona siliva momo herea, be oiemu taravatu ese ia hereaia momokani.” (Salamo 119:72; Aonega Herevadia 8:​10) Ena be golo hereadaena ena davana be bada, to namona be Iehova ena taravatu ita ura henia bada. Hereva momokani idia tahua lalo-momokani taudia dekenai Iehova ese ena taravatu dekenai diba maoromaoro, lalo-parara, bona aonega ia henia, unai gaudia ita laloa bada be namo. Unai gaudia ese ita idia durua, sibona ita naria, nega aukadia ita haheaukalaia, hekwakwanai ita hanaia, bona unai amo mauri namona bona moale ita abia.

Unai be momokani natudia dekenai danu. Kekeni maragina ta mani oi laloa, ia ese Iehova ena taravatu badinaia karana amo ena hekwakwanai ia hanaia. Unai kekeni, Akemi, be Tokyo kahirakahira ia noho. Ena tamana bona sinana ese ia idia hadibaia neganai, Baibel ena hakaua herevadia idia badinaia, bona edia hereva bona haheitalai amo edia natuna idia durua, Iehova bona dekena taudia ia lalokau henia totona. Idia diba sikuli dekenai hekwakwanai do ia davaria dainai, ia idia hadibaia namonamo. To, Akemi be sikuli dekenai ia vareai neganai, ena klas taudia haida idia laloa ia be “idau,” badina aniani neganai ia guriguri bona Baibel ese ia taravatua karadia lalonai ia vareai lasi. Nega sisina murinai, dagedage natudia edia grup ta ese ia idia kara dika henia matamaia, sikuli murinai ena dala idia koua bona vairana idia pataia, imana idia hagiroa, bona idia kirikirilaia.

Akemi maragina be edia kara dika ena davana ia henia lasi, danu ia idia dagedage henia taudia dainai ia gari lasi. To, ia dibaia gaudia ia badinaia toho. Ena gari lasi kara namona dainai, sikuli natudia momo ese idia matauraia. Idia ese unai hekwakwanai be tisa taudia dekenai idia hadibaia, bona unai dina amo, sikuli dekenai Akemi idia hadikaia lasi.

Dahaka ese Akemi ia durua hekwakwanai ia haheaukalaia totona? Iehova ese ia henia diba maoromaoro, lalo-parara, bona aonega, ena tama sina ese ia dekenai idia hadibaia gaudia ese. Ia be Iesu ena haheauka karana ia diba namonamo, bona unai ese ia veria ena haheitalai ia tohotohoa totona. Baibel ese ia durua bena ia itaia haida be dika idia karaia badina idia diba lasi dainai, bona goada ia henia unai kara dika taudia idia karaia dika ia inai henia, to idia ia inai henia lasi.​—Luka 23:34; Roma 12:​9, 17-​21.

Momokani, tama sina idia ura lasi haida ese edia natuna idia kirikirilaia bona idia hadikaia. To, Akemi ena tama sina be idia vara gaudia ibounai idia kamonai neganai, idia moale bada. Unai bamona natudia be Iehova ese ia henia hahenamo momokani.​—Salamo 127:3; 1 Petero 1:​6, 7.

Iehova Oi Naria mai Haheauka Ida

To, nega haida Iehova ena hahenamo oi do abia lasi neganai, ia oi naria be namo. Iehova ese emu noho dalana ia itaia bona namo bada do ia havaraia negana ai, emu dabu gauna do ia henia. (Salamo 145:16; Hadibaia Tauna 3:1; Iamesi 1:​17) Reana oi ese au huahua oi ura henia, to dahaka oi laloa bema oi vadivadi henia tauna ese ia do mage lasi huahua ia henia oi dekenai? Herevana apolo, orensi, eiava ma huahua ta, oi ura ia mage bona mamina ia namo neganai oi abia. Unai hegeregerena, Iehova ese nega maorona ai emu ura gauna do ia henia​—haraga momokani lasi eiava leiti momokani lasi.

Iosepa dekenai ia vara gauna mani oi laloa. Ia kerere lasi, to Aigupito taudia edia dibura rumana ai idia atoa. Dibura tauna ta, Farao ena uaina ia bubua tauna, ena helaro be dibura amo do idia ruhaia bona ia gwauhamata Farao dekenai Iosepa do ia herevalaia. To idia ruhaia murinai, Iosepa ia laloaboio. Toana be ibounai be Iosepa idia laloaboio momokani. To, lagani rua ibounai murinai, dibura amo idia ruhaia bona Aigupito ena lohia iharuana ai idia halaoa. Iosepa ia badu lasi, to Iehova ia naria. Unai dainai, hahenamo ia abia bona unai hahenamo dainai, Israela taudia bona Aigupito taudia danu idia roho mauri.​—Genese 39:1–​41:57.

Masashi be elda ta Japan ena not kahana ai ia noho kongregesen ta dekenai. Ia be dibura dekenai lasi, to Iehova ia naria danu. Dahaka dainai? Hesiai Gaukara Hadibaia Sikuli, Keristani hesiai taudia idia hadibaia sikuli unai, be Japan dekenai idia hamatamaia negana amo, ena tahua gauna badana be unai sikuli dekenai do ia lao. Unai hahenamo abia totona ia guriguri loulou. Ena painia turana idia boiria, to, ena be ia ura bada, Masashi idia boiria lasi. Ia lalohisihisi bada.

To, kara ta ia karaia ena hemami ia hanamoa totona. Ia ese Baibel bona Watch Tower Society ese ia halasia buka ia stadilaidia, manau bona hemami biagua karana ena hereva ia stadilaia badabada. Ena lalohadai ia hamaoromaoroa bona ena gaukara dekenai moale bada ia abia. Bena, ia laloa lasi neganai, unai sikuli dekenai idia boiria.

Haheauka bona manau karadia ia habadaia dainai, unai sikuli amo namo bada ia abia. Gabeai, Masashi ese hahenamo ia abia, sekit naria tauna ena gaukara amo ena tadikaka ia durudia. Oibe, Iehova ia diba Masashi be dahaka ia abia be namo bona namo bada ia havaraia negana ai unai gauna ia henia.

Ena Hahenamo Tahua

Unai dainai, Iehova be unai muramura hoihoilaia tauna bamona lasi. Ena be Iehova ena naria karadia reana ita itaia lasi, to ena hebogahisi be dala idauidau ai ia hahedinaraia​—ita idia durua bada negadia bona daladia ai. Unai dainai ena hahenamo oi tahua noho. Laloaboio lasi, oi tanikiu henia gaudia momo oi abia vadaeni. Inai tanobada ai oi mauri noho totona ia ese heduru gaudia amo oi ia hanamoa. Iehova bona ena dala goevadaena oi diba. Oi ese lalo-parara oi abia. Bona oi ese aonega oi abia. Unai gaudia ibounai ese oiemu noho namo bona moale idia habadaia.

Iehova ena hahenamo badana do oi abia totona, hanaihanai Baibel oi stadilaia noho. Iehova oi noia ia ese oi do ia durua ena lauma helaga amo ia havaraia Herevana lalonai idia noho davana bada nadi bamona hahediba herevadia do oi lalo-pararalaia totona. Idia dainai taga tauna ai do oi lao, unai amo gau ta dekenai do oi dabu lasi. Oibe, idia be oiemu moale bona noho namo ena badina hari inai negai bona do ia mai tanobada matamatana lalonai oi abia mauri mai ena anina momokani ena badina.​—Ioane 10:10; 1 Timoteo 4:​8, 9.

[Picture on page 23]

Iehova ena hahenamo ese golo ia hereaia