Moale Bada Negana—Gilead Ena Klas Namba 104 Ena Kosi Haorea Dinana

“INAI be moale bada negana, bona ita ibounai ita moale.” Unai hereva amo, Iehova ena Witness taudia edia Hakaua Oreana tauna ta, Carey Barber, ese March 14, 1998 ai, Watchtower Bible School of Gilead ena klas namba 104 ena kosi haorea dinana ena program ia hamatamaia. Idia mai taudia 4,945 ia boiria, Basileia ane namba 208 amo program do idia hamatamaia. Unai ane ena sinado be “Moale Anena Ta.”

Sisiba Namodia Idia Moale Noho Totona

Program ena matamana kahana ai, Baibel hereva kwadogidia ima idia henia, bona idia ese sisiba namodia idia henia, hari kosi haorea dinana ena moale be edia lalona ai do ia noho totona.

Joseph Eames Toretore Dipatmen amo ese hereva ginigunana ia henia. Ena hereva ena sinado be “Abidadama Taudia Edia Kara Umui Tohotohoa” bona ia ese 2 Samuela ena karoa 15 bona 17 amo ena hereva ia abia. Unai sivarai lalonai, Abesaloma, Davida ena natuna mero, ese taunimanima ia hagoadadia, king do idia dagedage henia bona unai amo ena tamana ese Dirava amo ia abia basileiana do ia abia. To, taunimanima haida be Iehova ia horoa tauna, King Davida, idia badinaia noho. Misinari taudia matamatadia be unai amo dahaka idia dibaia diba? Tadikaka Eames ena hereva dokonai, ia gwau: “Emu misinari gaukara lalonai herevana edeseniai umui idia siaia, namona be mai emui kamonai danu Dirava ese dagi ia henia taudia ida umui gaukara hebou bona idia umui matauraia. Ma haida umui durua unai idia karaia totona.”

Unai murinai David Sinclair ese hereva ta ia henia. Ia ese Salamo 15 ai idia hedinarai taravatu 10 ia herevalaia, ta ese unai taravatu ia badinaia be gau badana, bema ia ura “Iehova ena palai rumana” (NW) dekenai do ia noho. Ena hereva, ena sinado be “Emui Misinari Gaukara Ena Palai Rumana Lalonai Umui Noho,” ese kosi idia haorea stiuden taudia ia hagoadaia, unai salamo ena hereva be edia misinari gaukara do idia karaia gabuna dekenai idia badinaia totona, badina unai be edia noho gabuna. Tadikaka Sinclair ia hahedinaraia nega ibounai Dirava ena taravatu idia badinaia be gau badana. Bena dahaka do ia vara? Salamo 15:5 ia gwau: “Unai bamona ia karaia tauna, be do ia gini goada noho, gau ta ese ia do ia hadikaia lasi.”

John Barr, Hakaua Oreana tauna ta, be unai murinai ia mai bona Keristani heboudia dekenai ane abia karana ese ia havaraia namo ia herevalaia. To hari inai negai tanobada hegegemadai ita abia moale bada anena be dahaka? Ia be Dirava ena Mesia Basileiana ena sivarai namona. Unai ane, eiava Basileia haroro gaukarana, ese dahaka namo ia havaraia? Ane namba 208 ena kahana iharuana ena hereva be namo, ia gwau: “Haroro amo momo herea ita veria Dirava dekenai. Idia danu ese moale anedia idia abia.” Oibe, dina ta ta ai hahediba matamata taudia 1,000 bamona be bapatiso idia abia. Ena hereva dokonai Tadikaka Barr ia gwau: “Tadikaka e, emui hanamoa anena kamonai totona idia naria noho taudia edia gabu idauidau dekenai umui idia siaia be moale gauna momokani, ani?”

James Mantz Toretore Dipatmen amo ese ia henia herevana ena sinado be “Diba Taudia Edia Hereva Umui Kamonai.” Ia hahedinaraia gau haida be ita sibona dekenai idia vara gaudia amo, ita dibaia diba. (Heberu 5:8) To, Aonega Herevadia 22:17 ese ita ia hagoadaia ‘iseda taiana do ita kehoa, aonega taudia edia hereva ita kamonai’ totona. Hari edia kosi idia haorea stiuden taudia be guna idia lao vadaeni misinari taudia amo, gau momo idia dibaia diba. Tadikaka Mantz ia gwau: “Idia diba edena bamona hoihoi taudia ida do umui herevahereva, davana idia hamaragia totona. Idia diba siti lalonai edena gabu dekenai umui lao lasi be namo, emui tauanina eiava emui kara idia hadikaia gaudia umui davaria lasi totona. Unai gabu taudia edia hemami idia diba. Nega daudau misinari gaukara idia karaia vadaeni taudia idia diba, edena dala ai emui gaukara do umui moalelaia bona anina umui havaraia.”

Wallace Liverance, Gilead Sikuli ena rejistra tauna, ese “Dirava amo Umui Abia Gaukarana Umui Laloa Bada,” ia herevalaia. Ia gwau, ena be Dirava ese misinari taudia haida, hegeregere aposetolo Paulo, Timoteo, bona Banaba, edia gaukara be lauma helaga eiava hoa karana ma ta amo ia henia, to “hesiai tauna mai ena kamonai, bona mai ena kara maoromaoro” ese tanobada ena kahana ta ai, Gilead dekenai idia lao misinari taudia edia gaukara gabuna ia abia hidi. (Mataio 24:45-47) Ia ese misinari taudia idia siaia gabudia be Gideona ese Midiana taudia idia tuari henia neganai, ena tuari taudia dekenai ia henia gabudia ida ia hahegeregerea. (Gunalaia Taudia 7:​16-​21) Tadikaka Liverance ese ia hagoadadia, ia gwau: “Dirava amo umui abia misinari gaukara umui karaia totona idia henia gabuna umui laloa bada. Gideona ena tuari taudia “ta ta edia gabu, edia gabu dekenai idia gini” hegeregerena, umui laloa umui idia siaia gabuna dekenai do umui gini be namo. Namona be umui abia dae, Dirava ese Gideona ena tuari taudia 300 ia gaukaralaia hegeregerena, umui ia gaukaralaia diba danu.”

Taunimanima Umui Ura Henidia Karana amo Moale Do Umui Davaria

Guna, Gima Kohorona ta ia gwau: “Namo lasi kohu idauidau, nega sisina idia noho gaudia, ese iseda lalona bona mauri idia hahonua, to taunimanima ita laloa bada bona ma haida ita durua karadia amo moale ita abia be kara namona bona mai ena aonega.” Unai hereva hegeregerena, Tadikaka Mark Noumair, Gilead Sikuli ena hadibaia tauna ta, ese stiuden taudia haida ida haroro gaukara lalonai idia davaria ekspiriens idia herevalaia bona ia gwau: “Bema taunimanima ma haida umui laloa bada, misinari taudia namodia ai do umui lao.”

Tano Idaudia Dekenai Moale Davaria Daladia

Misinari gaukara lalonai anina namona bona moale davaria dala haida be dahaka dahaka? Haroro Dipatmen amo Tadikaka Charles Woody bona guna Latin America dekenai misinari gaukara ia karaia bona hari Hadibaia Komiti ia durua tauna Harold Jackson ese brens taudia edia klas namba 9 dekenai idia mai Brens Komiti taudia haida idia henanadai henidia. Idia henia sisiba haida be inai:

Albert Musonda, Zambia amo, ia gwau: “Bema misinari tauna be ia lao bona tadikaka ia hedavari henidia, unai ese kongregesen ia hagoadaia, badina unai kara ese tadikaka be misinari kahirakahira dekenai ia veridia lao, bona misinari be idia kahirakahira dekenai ia lao.”

Rolando Morales, Guatemala amo, ia gwau, bema taunimanima namodia idia ura misinari taudia dekenai inua gauna ta idia henia, reana dala namona ai inai bamona idia haere diba: “Lau be matamata inai tano dekenai. Lau ura oi henia ranuna lau abia, to lauegu tauanina ia goada lasi oiemu tauanina bamona. Lau ura nega ma ta ai do lau abia dae diba, bona unai neganai mai moale ida do lau abia dae.” Unai bamona haere ese edena bamona namo ia havaraia? “Taunimanima do idia badu lasi, bona misinari taudia ese kara namo idia hahedinaraia.”

Dahaka ese misinari taudia ia durua diba, edia misinari gabuna idia rakatania lasi totona? Tadikaka Paul Crudass, Gilead klas namba 79 dekenai ia lao bona lagani gunadia 12 lalonai Liberia dekenai ia gaukara tadikakana, ia gwau: “Lau diba ia momokani, tama sina ese edia natudia idia laloa momo. To nega haida, misinari ese tano, noho gabuna, mauri dalana, bona taunimanima ia manadalaia totona ia hekwarahi bada noho. Reana ena mamina be unai gabu do ia rakatania be namo. Bema ena hanua amo revarevana ta ia abia, ia gwau, ‘Oi ai laloa momo; ai diba lasi edena bamona do ai mauri bema oi noho lasi,’ reana unai ia duahia neganai, ena baege ia hegaegaelaia bona ena hanua ai ia giroa lou. Hari iniseniai umui noho varavara taudia ese unai do umui laloatao be gau badana.”

Unai henanadai idia henia murinai, Theodore Jaracz, Hakaua Oreana tauna ta, ese program ena hereva ginigabena ia henia. Ena sinado be: “Emui Mauri Lalonai Basileia Umui Tahua Guna.” Edena dala ai misinari taudia ese edia gaukara do idia laloa bada noho bona do idia laloaboio lasi? Idia ia hagoadaia sibodia edia Baibel stadi sediual idia karaia, unai ese heduru do ia henia edia mauri lalonai Basileia idia tahua guna totona. Bena inai sisiba namona ia henia: “Misinari taudia haida ese sibodia edia stadi idia laloa bada lasi, badina edia mauri lalonai, paua masini idauidau, E-mail, bona kompiuta be gau badadia ai idia halaoa. Namona be gau idauidau ita gaukaralaia neganai, ita laloa maoromaoro bona Dirava ena Hereva ita stadilaia negana idia henaoa gaudia dekenai, nega bada ita negea lasi.”

Tadikaka Jaracz ena hereva murinai, kosi haorea pepadia idia henia bona stiuden taudia edia revareva, kosi idia laloa bada lalohadaina ia hahedinaraia revarevana, idia duahia. Klas ibounai edia lalohadai ia hahedinaraia tauna, ia gwau: “Iesu ia gwau ena hahediba taudia ese lalokau do idia hahedinaraia, bona ai ese unai lalokau ai itaia goevagoeva, bona unai dainai ai diba momokani, herevana edeseniai do ai lao, ai ia laloa bada bona ia lalokau henia sinana bamona oreana ese ai do ia durua. Unai bamona heduru dainai, ai hegeregere tanobada ena kahana ibounai dekenai do ai lao.” Unai hereva namona ese iboudiai edia kudouna ia hamarerea bona unai dala namona ai Gilead ena klas namba 104 ena kosi haorea dinana ia koua.

[Box on page 24]

Klas Taudia

Edia tano idauidau: 9

Idia lao henia tanodia idauidau: 16

Klas taudia iboudiai: 48

Tatau mai edia adavadia: 24

Edia mauri lagani edia averes: 33

Lagani hida hereva momokani lalonai, edia averes: 16

Lagani hida ful-taim hesiai gaukara idia karaia, edia averes: 12

[Picture on page 25]

Watchtower Bible School of Gilead Ena Klas Namba 104

Inai lista ai, laini edia namba be vairana kahana amo ia daekau murina kahana, bona laini ta ta ai idia gini taudia edia ladadia be laurina kahana amo ela bona idibana kahana

(1) Romero, M.; Howarth, J.; Blackburne-Kane, D.; Hohengasser, E.; West, S.; Thom, S. (2) Colon, W.; Glancy, J.; Kono, Y.; Drews, P.; Tam, S.; Kono, T. (3) Tam, D.; Zechmeister, S.; Gerdel, S.; Elwell, J.; Dunec, P.; Tibaudo, H. (4) Taylor, E.; Hildred, L.; Sanches, M.; Anderson, C.; Bucknor, T.; Hohengasser, E. (5) Howarth, D.; Ward, C.; Hinch, P.; McDonald, Y.; Sanches, T.; Thom, O. (6) Drews, T.; Tibaudo, E.; Elwell, D.; Dunec, W.; Blackburne-Kane, D.; Ward, W. (7) Anderson, M.; Zechmeister, R.; McDonald, R.; Bucknor, R.; Glancy, S.; Gerdel, G. (8) Romero, D.; Hinch, R.; Hildred, S.; Taylor, J.; Colon, A.; West, W.

[Picture on page 26]

Klas namba 104 taudia idia hadibaia tadikaka: (laurina kahana amo) W. Liverance, U. Glass, K. Adams, M. Noumair