Oiemu Lalona Ena Mamina Oi Abidadama Henia Diba, A?

KAMPASI be vaia ita abidadama henia diba tulu namona. Tanobada ena magnetik siahuna ese ena nila ia veria dainai, hanaihanai not kahana dekenai ia poinia. Unai dainai, bema hakaua gaudia ma haida idia noho lasi, kampasi ese loaloa taudia ia durua diba. To dahaka ia vara bema kampasi kahirakahira magnetik gauna ta ita atoa? Nila be do ia giroa bona unai magnetik gauna dekenai ia poinia, not kahana ia poinia lasi. Unai neganai, ita do ia hakaua kerere.

Taunimanima edia lalona ena mamina dekenai unai bamona ia vara diba danu. Havaraia Tauna ese ita lalonai lalona ena mamina ia atoa, ita ia hakaua namonamo totona. Dirava ese sibona ena toana hegeregerena ita ia havaraia dainai, iseda lalona ena mamina ese dala maorona ita abia hidi totona, hanaihanai ita ia hakaua namonamo be namo. Namona be Dirava ena kara maoromaoro taravatudia badinaia totona ita ia durua. (Genese 1:​27) Nega momo unai ia karaia. Hegeregere, Keristani aposetolo Paulo ia gwau, Dirava ena taravatu idia diba lasi taudia haida danu ese ‘edia lalona amo taravatu idia badinaia.’ Dahaka dainai? Edia lalona ena mamina ese idia ia hadibaia dainai.​—Roma 2:14, 15.

To nega haida, ena be ta ena lalona ena mamina be ia ia hadibaia be namo, to ia hadibaia lasi. Ita be goevadae lasi taudia dainai, ena be ita diba kara haida be idia dika, to ita ura ita karaia. Paulo ia gwau: “Momokani, egu kudouna be Dirava ena Taravatu dekenai ia moale bada. To lau davaria, egu lalona dekenai taravatu idauna ta ia gaukara noho. Inai taravatu ese egu lalona ia ura henia Taravatuna ia tuari henia noho. Vadaeni inai taravatu, egu lalona dekenai kara dika ia havaraia gauna ese lau ia guia noho.” (Roma 7:22, 23) Bema iseda ura dikadia ita badinaia, reana sisina sisina iseda lalona ena mamina do ia manoka ia lao ela bona kara dikadia ia gwauraia dika lasi.

Ena be ita be goevadae lasi taudia, to Dirava ena hakaua herevadia amo iseda lalona ena mamina ita hadibaia diba. Oibe, unai ita karaia be gau badana. Bema iseda lalona ena mamina be ia goeva bona ia ita hadibaia namonamo, ita do ia durua Dirava ita tura henia namonamo totona sibona lasi, to ia be gau badana hahemauri do ita abia totona danu. (Heberu 10:22; 1 Petero 1:​15, 16) Ma danu, lalona ena mamina namona ese ita do ia durua, iseda mauri dekenai aonega dalana do ita abia hidi bona unai amo maino bona moale do ita davaria. Salamo torea tauna ese unai bamona lalona ena mamina ia abia tauna ta ia herevalaia, ia gwau: “Iena Dirava ena taravatu, be iena kudouna lalonai ia dogoatao noho, bona ia ese Lohiabada ena taravatu ia rakatania lasi momokani.”​—Salamo 37:31.

Lalona Ena Mamina Ita Hadibaia

Lalona ena mamina hadibaia karana ena anina be taravatu momo ita laloatao bona ita badinaia namonamo sibona lasi. Iesu ena negai Farisea taudia ese unai bamona idia karaia. Tomadiho gunalaia taudia be Taravatu idia diba bona sene taravatu maragidia idia karaia taunimanima ese Taravatu idia hadikaia lasi totona. Unai dainai, Sabati dinana ai Iesu ena hahediba taudia ese uiti ena anina idia kokia bona idia ania neganai, karaharaga Farisea taudia idia maumau. Bona Sabati dinana ai Iesu ese tau ta ena imana dikana ia hanamoa neganai, ena kara idia gwauraia dika. (Mataio 12:​1, 2, 9, 10) Farisea taudia edia sene taravatudia idia gwau unai kara ruaosi ese taravatu ihahanina idia hadikaia.​—Esodo 20:​8-​11.

Ia hedinarai goevagoeva, Farisea taudia ese Taravatu idia stadilaia. To idia ese Dirava ena hakaua herevadia amo edia lalona ena mamina idia hadibaia, a? Lasi! Idia laloa ia be Sabati taravatuna hadikaia karana dikana idia maumauraia murinai, maoromaoro hebou idia karaia Iesu “idia alaia dalana idia tahua” totona. (Mataio 12:14) Mani edia kara oi laloa​—idia, sibodia edia kara maoromaoro idia hekokorokulaia tomadiho gunalaia taudia, ese Sabati dinana ai uiti ena anina kokia bena ania karana bona gorere tauna hanamoa karana dainai idia badu; to Iesu hamasea dalana idia tahua neganai, edia lalona ena mamina ia dika lasi!

Hahelaga taudia badadia be unai bamona lalohadai gagevana idia hahedinaraia danu. Unai tatau dikadia be Iesu ia samania totona dubu ena maua amo Iuda dekenai idia gwau siliva moni 30 do idia henia neganai, edia lalona ena mamina ia dika lasi. To Iuda ese moni ia haloua bona dubu dekenai ia negea neganai, hahelaga taudia badadia ese taravatu dainai idia lalo-hekwarahi. Idia gwau: “Ia namo lasi boubou ena maua dekenai do ita udaia, badina inai be rara ena davana.” (Mataio 27:3-6) Hahelaga taudia badadia idia laloa hari Iuda ena moni be goeva lasi. (Deuteronomi 23:18 itaia.) To, unai tatau idia laloa Dirava ena Natuna hadikaia karana ena davana monina idia henia be hegeregere!

Dirava Ia Laloa Hegeregerena Ita Laloa

Ataiai idia noho haheitalai idia hahedinaraia lalona ena mamina hadibaia totona taravatu momo amo lalona ita hahonua sibona be hegeregere lasi. Momokani, Dirava ena taravatu ita diba be mai anina bada, bona hahemauri ita abia totona, idia ita badinaia be gau badana. (Salamo 19:​7-​11) To, namona be Dirava ena taravatu ita dibaia sibona lasi to danu Dirava ena lalohadai amo iseda kudouna ita hadibaia. Bena iseda mauri lalonai Iehova ena peroveta herevana do ia guguru, ia be Isaia amo ia gwau: “Emui matadia dekenai, emui Hadibaia Tauna do umui itaia. Bona bema idiba kahanai o lauri kahanai do umui raka siri neganai, emui Hadibaia Tauna ena gadona do umui kamonai, do ia gwau, ‘Dala be inai, ia dekenai do umui raka lao.’ ”​—Isaia 30:20, 21; 48:17.

To momokani, namo lasi ita laloa unai ena anina be mai anina bada gauna ta ita abia hidi gwauraia neganai, gado korikorina ese ita do ia hadibaia dahaka ita karaia be namo. Lasi, to Dirava ia laloa hegeregerena ita laloa neganai, iseda lalona ese ita ia durua, Dirava idia hamoalea daladia ita abia hidi totona.​—Aonega Herevadia 27:11.

Lagani 1800 B.C.E. murinai ia noho tauna, Iosepa, mani oi laloa. Potifara ena adavana ese idia heudahanai totona Iosepa ia doria neganai, Iosepa ese ia dadaraia, ia gwau: “Inai kerere badana do lau karaia, bona Dirava ena vairana dekenai inai bamona do lau kara dika be edena bamona?” (Genese 39:9) Iosepa ena negai, Dirava ena taravatu, heudahanai ia gwauraia dika taravatuna ta, be idia do torea lasi. Ma danu, Iosepa be Aigupito dekenai ia noho, ruma bese ena matahakani bona bese kwarana ena taravatudia amo ia noho daudau. Unai dainai, dahaka ese Iosepa ia durua unai kara ia dadaraia totona? Haere be ia ese ena lalona ena mamina ia hadibaia vadaeni dainai. Iosepa ese Dirava ena lalohadai ia abia dae, ia laloa tau bona ena adavana be “tauanina tamona.” (Genese 2:​24) Unai dainai ia diba tau ta ena adavana ia abia be kara dika. Iosepa be Dirava ia laloa hegeregerena ia laloa. Ena lalona ena mamina ese ia ia hadibaia heudahanai karana be ia dika.

Hari inai negai, taunimanima haida sibona be Iosepa bamona. Taunimanima momo be lebulebu karadia idia karaia bona idia laloa, Havaraia Tauna, idia sibodia, eiava edia adavadia vairanai, kara goeva idia karaia be anina lasi. Hari inai nega be Ieremia bukana dekenai ia torea bamona, ia gwau: “Idia ta ese iena kara dika dekena amo, iena lalona ia giroa lasi. Ta ia hereva lasi inai bamona: ‘Dahaka dainai inai kerere lau karaia?’ Idia ibounai be sibodia edia dala, edia dala, idia lao noho, hosi be tuari gabuna dekenai ia heau lao haraga bamona.” (Ieremia 8:6) Unai dainai, hari inai negai Dirava ia laloa hegeregerena ita laloa be gau badana. Unai ita karaia totona heduru gauna namona ia noho.

Heduru Gauna Lalona Ena Mamina Hadibaia Totona

Baibel be Dirava ena lauma amo ia vara bona ia be “mai ena namo hadibaia totona, sisiba henia totona, gau idauidau hamaoromaoroa totona, kara maoromaoro ai matahakani henia totona, vadaeni Dirava ena tau be do ia hegeregere momokani, gau ibounai ia abia hegaegae gaukara namodia ibounai karaia totona.” (2 Timoteo 3:16, 17, NW) Baibel stadi ese ita do ia durua, iseda “lalona” do ita hadibaia totona, bena maoro bona dika edia idau do ita diba. (Heberu 5:​14) Baibel ita stadilaia karana ese ita ia durua Dirava ia ura henia gaudia ita ura henia totona bona ia inai henia gaudia ita inai henia totona.​—Salamo 97:10; 139:21.

Unai dainai, Baibel ita stadilaia, diba ita abia totona sibona lasi, to anina korikorina bona unai ita gaukaralaia diba dalana ita abia totona. The Watchtower, September 1, 1976 lalonai ia gwau: “Namona be Baibel ita stadilaia neganai, Dirava ena kota maoromaoro, lalokau, bona kara maoromaoro edia anina ita lalo-pararalaia bona iseda kudouna dekenai ita hadoa toho, idia ese iseda kara korikoridia ai idia lao totona, aniani karana bona laga karana hegeregerena. Namona be ita hekwarahi bada dahaka be maoro bona dahaka be dika ita diba namonamo totona, unai amo do ita lalo-parara namonamo kara maoromaoro ita badinaia be iseda maduna. Unai sibona lasi, to namona be iseda lalona ena mamina be ia diba momokani ia be mai ena maduna Taravatu Henia Tauna bona Hahemaoro Tauna vairanai. (Isa. 33:22) Unai dainai Dirava ena kara ita dibaia neganai, namona be iseda mauri ibounai lalonai ena kara ita tohotohoa.”

“Keriso Ena Laloa” Dalana Ita Abia

Baibel ita stadilaia neganai, ita ia durua danu “Keriso ena laloa” dalana ita abia totona, anina be Iesu ese kamonai bona manau karadia ia laloa dalana ita tohotohoa. (1 Korinto 2:​16) Ena Tamana ena ura ia karaia be moale gauna, ia be karaia kava karana ta sibona lasi. Salamo torea tauna Davida ese ena lalohadai ia perovetalaia, ia gwau: “Lauegu Dirava e, lau ura dikadika oiemu ura do lau karaia. Oiemu taravatu be lauegu kudouna lalonai ia noho.”a​—Salamo 40:8.

Iseda lalona ena mamina ita hadibaia karana lalonai, “Keriso ena laloa” dalana ita abia be gau badana. Iesu be tau goevadaena tanobada ai ia noho neganai, ia ese ena Tamana ena kara ia hahedinaraia, tau ta ese ia karaia diba hegeregerena. Unai dainai, ia gwau diba: “Lau ia itaia tauna ese egu Tamana danu ia itaia.” (Ioane 14:9) Iesu ese tanobada dekenai ia davaria gaudia ibounai lalonai ena Tamana ena ura ia karaia. Unai dainai, Iesu ena mauri ita stadilaia neganai, Iehova Dirava ena kara ita dibaia goevagoeva.

Ita duahia Iehova be ‘hebogahisi bona hariharibada Diravana, badu dekenai ia haraga lasi, to hebogahisi bona lalokau dekenai ia haraga.’ (Esodo 34:6) Iesu ese ena aposetolo taudia ia kara henia neganai, unai karadia ia hahedinaraia loulou. Daika be ia bada idia hepapahuahulaia loulou neganai, Iesu ese ena hereva bona ena kara amo mai haheauka ida idia ia hadibaia, ia gwau ‘bema ta ia ura ia be lohia, ia be umui emui hesiai gaukara do ia karaia, bona bema ta ia ura ia be guna, ia be umui emui hesiai tauna do umui halaoa.’ (Mataio 20:26, 27) Unai be haheitalai tamona sibona, to ia hahedinaraia Iesu ena mauri ita lalohadailaia neganai, Dirava ia laloa hegeregerena ita laloa matamaia diba.

Iesu ita dibaia namonamo neganai, iseda guba Tamana, Iehova, ita tohotohoa namonamo diba. (Efeso 5:​1, 2) Bema iseda lalona ena mamina be Dirava ena laloa dalana hegeregerena, ita do ia hakaua namonamo. Iehova ese ia idia abidadama henia taudia ia gwauhamata henia, ia gwau: “Lau ese oiemu raka dalana oi dekenai do lau hadibaia. Lau ese oi do lau hakaua, bona sisiba oi dekenai do lau henia.”​—Salamo 32:8.

Lalona Ena Mamina Ita Hadibaia Neganai, Namo Do Ita Abia

Mose ese goevadae lasi taudia edia kerere dalana ia diba dainai, Israela taudia ia hadibaia: “Hari dina dekenai umui lau hamaoroa herevadia ibounai do umui laloatao [“emui kudouna ida umui laloa,” NW], emui natudia dekenai danu do umui hadibaia. Inai lau hadibaia taravatu ena hereva ibounai do idia badinaia bona edia kara do idia karaia.” (Deuteronomi 32:46) Namona be ita danu ese iseda kudouna dekenai Dirava ena taravatu do ita torea. Bema unai ita karaia, iseda lalona ena mamina ese iseda raka dalana do ia hakaua bona ita do ia durua dala maorona ita abia hidi totona.

To, namona be ita naria namonamo. Baibel ena aonega herevana ia gwau: “Dala ta ia noho, sedira iena toana oi dekenai be maoro, to iena dokona be mase dekenai do ia lao.” (Aonega Herevadia 14:12) Badina be dahaka nega momo unai ia vara? Badina be Baibel ena hereva hegeregerena: “Taunimanima edia kudouna be mai koikoi bada, bona mai dika rohoroho danu. Daika ese kudouna ena dala ia diba?” (Ieremia 17:9) Unai dainai, namona be ita ibounai ese Aonega Herevadia 3:​5, 6 ena hereva ita badinaia, ia gwau: “Lohiabada do oi abidadama henia, mai emu kudouna ibounai. Oi sibona oiemu diba do oi abidadama henia lasi. Oi karaia gaudia ibounai lalonai, Lohiabada do oi laloa, vadaeni ia ese dala maorona be oi dekenai do ia hadibaia.”

[Footnote]

[Picture on page 7]

Kampasi bamona, Baibel ena hereva amo lalona ena mamina ita hadibaia neganai, ita do ia hakaua lao dala maorona dekenai

[Credit Line]

Compass: Courtesy, Peabody Essex Museum, Salem, Mass.