Dirava Ena Taravatu Bona Hakaua Herevadia amo Emu Lalomamina Oi Hadibaia

1. Dahaka dainai taunimanima ese animal idia hereaia?

IEHOVA ese taunimanima dekenai lalomamina ia henia dainai, idia ese animal idia hereaia. Idaunega amo ema bona hari, tanobada dekenai taunimanima be unai idia hamomokania. Adamu bona Heva be Iehova ena taravatu idia utua murinai idia komu o hunia. Unai ese ia hahedinaraia edia lalomamina ese idia ia kota henia.

2. Edena dala ai iseda lalomamina be tari ta bamona? (Laulau ginigunana herevalaia.)

² Bema iseda lalomamina ita hadibaia namonamo lasi, ita be bouti ta mai ena steering wheel o tari dikana bamona. Bema tari ita hagoevaia lasi dainai ia dika, vadaeni eda laolao dekenai hekwakwanai ita davaria diba. Lai bona davara ena hurehure goadadia ese bouti be gabu kererena dekenai idia doria lao. To bema tari ia namo, vadaeni kapten ese bouti be gabu maorona dekenai ia taria lao diba. Iseda lalomamina be tari namona ta bamona. Iseda lalomamina be maoro o kerere ia diba dainai, dala maorona dekenai ita ia hakaua lao diba. To, namona be eda lalomamina ita hadibaia namonamo o hamaoromaoroa, unai amo ita ia hakaua namonamo diba.

3. Dahaka ia vara diba bema eda lalomamina ita hadibaia namonamo lasi?

³ Eda lalomamina ita hadibaia namonamo lasi neganai, kerere daladia do ita diba lasi. (1 Tim. 4:1, 2) Unai bamona lalomamina dainai, reana “dika [do ita] gwauraia namo.” (Isa. 5:20) Iesu ese aposetolo taudia ia hadibaia: “Nega ia mai noho, bona umui idia alaia taudia ibounai be do idia laloa idia be Dirava dekenai hesiai gaukara helagana idia karaia.” (Ioa. 16:2) Momokani, Stefano idia alaia taudia bona ma haida be unai bamona idia laloa. (Kara 6:8, 12; 7:54-60) Idaunegai bona hari, ena be dubu taudia momo be taunimanima idia alaia bona idia gwau idia be Dirava idia tomadiho henia, to idia be Dirava ena taravatu idia utua! (Eso. 20:13) Ia hedinarai goevagoeva, unai bamona taudia be edia lalomamina ese idia ia hakaua kerere!

4. Edena dala ai iseda lalomamina ita hadibaia namonamo diba?

⁴ Edena dala ai iseda lalomamina ita hadibaia namonamo diba? Baibel ai idia noho taravatu bona hakaua herevadia be ‘mai edia namo hadibaia totona, sisiba henia totona, gau idauidau hamaoromaoroa totona, bona kara maoromaoro ai matahakani henia totona.’ (2 Tim. 3:16) Unai dainai, Baibel ita stadilaia namonamo, ena hereva ibounai ita laloa dobu, bona iseda mauri lalonai ita badinaia neganai, unai ese eda lalomamina ia hadibaia Dirava ena laloa dalana ita tohotohoa bona ita ia hakaua namonamo diba. Iehova ena taravatu bona hakaua herevadia amo iseda lalomamina ita hadibaia daladia haida mani ita herevalaia.

DIRAVA ENA TARAVATU ESE OI IDIA HADIBAIA BE NAMO

5, 6. Dirava ena taravatu ita badinaia ena namo be dahaka?

⁵ Dirava ena taravatu ese ita idia durua totona, ita duahia eiava diba sibona be hegeregere lasi. To, taravatu ibounai ita ura henia bona matauraia. Baibel ia gwau: “Kara dika umui inai henia, bona kara namo umui ura henia.” (Amo. 5:15 NWT) To edena bamona unai ita karaia diba? Gau badana be Iehova ena laloa dalana ita tohotohoa. Haheitalai ta be inai: Oi be oi mahuta namonamo lasi. Unai dainai, emu doketa ia gwau namona be aniani namodia oi ania, oi eksasais, bona emu mauri ai gau haida oi haidaua. Doketa ena sisiba oi badinaia neganai, namo oi davaria! Reana emu doketa oi tanikiu henia badina oi ia durua, emu mauri oi hanamoa.

⁶ Unai hegeregerena, iseda Dirava be taravatu ia henia badina ia ura kara dikadia ita dadaraia bona iseda mauri ita hanamoa. Momokani, Baibel ia taravatua karadia haida be inai: Koikoi, palani dikadia, henaohenao, matabodaga, dagedage, bona meamea karadia. (Aonega Herevadia 6:16-19 duahia; Apok. 21:8) Iehova ita badinaia dainai namo bada ita davaria neganai, ita ese Iehova bona ena taravatu ita lalokau henidia bada.

7. Edena dala ai Baibel ena sivarai momokanidia ita duahia bona laloa dobu karana ese ita idia durua diba?

⁷ Mai anina bada gaudia ita dibaia totona, namo lasi Dirava ena taravatu ita utua bena idia vara dika o metau idauidau ita hisihisilaia. Kerere idia karaia taudia haida edia sivarai be Baibel ese ia gwauraia, bona edia sivarai amo gau haida ita dibaia diba. Aonega Herevadia 1:5 (NWT) ia gwau: “Aonega tauna be ia kamonai bona hakaua herevadia ma haida ia dibaia noho.” Oibe, Baibel ai idia noho sivaraidia ita duahia bona laloa dobu neganai, Dirava be ita do ia hadibaia namonamo. Hegeregere, King Davida be Iehova ena oda ia kamonai lasi bona Bataseba ida ia heudahanai murinai, ia abia hisihisina mani oi laloa. (2 Sam. 12:7-14) Unai sivarai ita duahia bona laloa dobu lalonai, reana ita sibona ita nanadaia: ‘King Davida be Bataseba ida ia heudahanai lasi bona ia lalohisihisi lasi totona, dahaka ia karaia be namo? Bema unai bamona hahetoho ia vara, dahaka lau karaia be namo? Do lau heau siri Iosepa bamona, eiava matabodaga karana do lau karaia Davida bamona?’ (Gen. 39:11-15) Kara dika ena metau idauidau ita laloa dobu neganai, unai ese ita do ia durua “kara dika [ita] inai henia” totona.

8, 9. (a) Iseda lalomamina be ita ia durua dahaka ita karaia totona? (b) Edena dala ai Iehova ena hakaua herevadia bona eda lalomamina idia gaukara hebou?

⁸ Dirava ese ia inai henia karadia ita dadaraia. To, eda mauri lalonai ita karaia gaudia haida dekenai, Baibel be taravatu ta ia gwauraia lasi. Unai bamona neganai, edena bamona ita diba ita karaia gaudia be Dirava ese ia abia dae bona ia moalelaia? Baibel amo ita hadibaia lalomamina ita gaukaralaia neganai, ita be abia hidi maorona do ita karaia.

⁹ Iehova be ita ia lalokau henia dainai, hakaua herevadia ia henia, eda lalomamina ita hakaua totona. Ia gwau: “Lau, Iehova, be emui Dirava, Lau ese umui lau hadibaia noho, namo umui davaria totona, Lau ese umui lau hakaua noho, dala maorona ai umui raka totona.” (Isa. 48:17, 18 NWT) Baibel ena hakaua herevadia ita lalohadailaia bona eda kudouna ia hamarerea neganai, ita ese eda lalomamina ita hanamoa bona hamaoromaoroa diba. Bena unai ese ita ia durua abia hidi maorodia ita karaia totona.

DIRAVA ENA HAKAUA HEREVADIA ESE OI IA HAKAUA BE NAMO

10. Hakaua herevadia be edena dala ai ita idia durua, bona Iesu ese edena dala ai hakaua herevadia ia gaukaralaia?

¹⁰ Momokani, hakaua herevadia be ita idia durua abia hidi maorodia ita karaia totona. Hakaua hereva ta ita lalopararalaia totona, gau badana be Taravatu Henia Tauna ena lalohadai ita lalopararalaia bona taravatu ia henia ena badina ita diba be namo. Haroro gaukara negadiai, Iesu ese hakaua herevadia haida be aposetolo taudia dekenai ia hadibaia dainai, idia laloparara kara haida be dika idia havaraia diba. Hegeregere, Iesu ia gwau badu karana ese dagedage ia havaraia diba, bona matabodaga urana ese heudahanai ia havaraia diba. (Mat. 5:21, 22, 27, 28) Eda lalomamina ita hadibaia namonamo totona, namona be Dirava ena hakaua herevadia ese ita ia hakaua, unai amo Dirava do ita hanamoa.​—⁠1 Kor. 10:31.

11. Edena dala ai eda lalomamina be tau ma ta ena amo ia idau?

¹¹ Baibel amo edia lalomamina idia hadibaia Keristani taudia rua be topik ta dekenai reana do idia lalotamona lasi. Haheitalai be inai: Alkahol o bia ita inua be maoro eiava lasi. Eda sikele hegeregerena alkahol ita inua be Baibel ese ia taravatua lasi. To, Baibel ese alkahol inua momo karana bona kekero karana be ia taravatua. (Aon. 20:1; 1 Tim. 3:8) Unai ena anina be eda sikele hegeregerena alkahol ita inua bona gau ma ta do ita laloa lasi, a? Lasi, gau haida ita laloa danu be namo. Hegeregere, ena be eda lalomamina ia namo dainai alkahol ita inua, to ma haida edia hemami ita laloa danu be namo.

12. Edena dala ai Roma 14:12 ena sisiba ese ita ia durua diba ma haida edia lalomamina ita matauraia totona?

¹² Paulo ese ia hahedinaraia, ma haida edia lalomamina ita matauraia be namo, ia gwau: “Bema vamu oi ania eiava wain oi inua eiava kara ma ta amo emu tadikaka oi hahekwakwanaia, namo lasi unai gaudia oi karaia.” (Roma 14:21) Ena be oi be mai emu maoro alkahol oi inua totona, to oi ura lasi tadikaka ta oi hahekwakwanaia dainai oi inua lasi, ani? Oibe. Iseda tadikaka haida be hereva momokani idia do diba lasi neganai, alkahol idia inua momo to hari idia ura lasi idia inua. Momokani, ita ura lasi iseda kara dainai tadikaka ta be ena kara gunana ta dekenai ia giroa lou! (1 Kor. 6:9, 10) Bema tadikaka ta ita boiria eda ruma dekenai bona ita doria alkahol ia inua to ia ura lasi, unai be lalokau karana lasi.

13. Edena dala ai Timoteo be haheitalai namona ia hahedinaraia, unai amo Iuda taudia ese Basileia sivaraina do idia abia dae?

¹³ Timoteo ena mauri lagani be 20 ia do hanaia lasi neganai, ena kopina idia utua, ena be ia hisihisi, to unai bamona ia karaia badina ia ura lasi do ia haroro henia Iuda taudia ia hahekwakwanaia. Oibe, Timoteo ena lalohadai be aposetolo Paulo ena bamona. (Kara 16:3; 1 Kor. 9:19-23) Timoteo bamona, haida edia namo oi laloa guna, a?

“ITA HEKWARAHI NOHO LO TAUDIA AI ITA LAO TOTONA”

14, 15. (a) Lo taudia ai ita lao totona, dahaka ita karaia be namo? (b) Edena dala ai lo Keristani taudia ese edia lalokau idia hahedinaraia diba?

¹⁴ Ita ura “Keriso ena hahediba hereva ginigunadia ita rakatania” bona “ita hekwarahi noho lo taudia ai ita lao totona.” (Heb. 6:1) Unai be ia vara kava lasi. To, “ita hekwarahi noho” ela bona lo taudia ai ita lao. Oibe, eda diba bona laloparara ita habadaia noho be mai anina bada. Unai dainai, dina ta ta ai Baibel ita duahia be gau badana. (Sal. 1:1-3) Oi ese dina ta ta ai Baibel oi duahia, a? Unai bamona oi karaia neganai, oi ese Iehova ena taravatu bona hakaua herevadia sibona lasi, to Dirava ena Hereva ena anina do oi lalopararalaia namonamo.

¹⁵ Keristani taudia dekenai taravatu hereadaena be inai: Dirava bona iseda dekena taudia do ita lalokau henia, ita sibona ita lalokau henia hegeregerena. Iesu ese aposetolo taudia ia hamaoroa: “Unai amo taunimanima ibounai do idia diba umui be egu hahediba taudia, bema umui huanai lalokau ia noho.” (Ioa. 13:35) Iesu ena tadina Iamesi ia gwau, unai bamona lalokau be “taravatu badana.” (Iam. 2:8) Paulo ia gwau: “Lalokau ese taravatu ia hagugurua.” (Roma 13:10) Momokani, unai bamona hereva dekenai ita hoa lasi, badina Baibel ia gwau “Dirava be lalokau.” (1 Ioa. 4:8) Dirava dekenai, lalokau be hemami gauna sibona lasi. Ioane ia gwau: “Dirava ena lalokau ita dekenai be inai dala ai ia hahedinaraia, Dirava ese ena Natuna korikorina be tanobada dekenai ia siaia mai, ia amo mauri do ita abia totona.” (1 Ioa. 4:9) Oibe, Dirava ena lalokau dainai kara ta do ita karaia. Bema Iehova, Iesu, iseda tadikaka taihu, bona taunimanima ma haida ita lalokau henia, ita hamomokania ita be lo Keristani taudia.​—⁠Mat. 22:37-39.

16. Lo Keristani taudia ai ita lao neganai, dahaka dainai hakaua herevadia ita laloa bada matamaia?

¹⁶ Lo Keristani taudia ai ita lao neganai, hakaua herevadia do ita laloa bada matamaia. Unai ena badina be reana taravatu be dala tamona sibona dekenai do ita badinaia, to hakaua herevadia be dala idauidau ai ita badinaia diba. Hegeregere, natu maragina be hebamo dikadia edia dika do ia lalopararalaia lasi dainai, aonega tama o sina be ena natuna gimaia totona, taravatu haida do ia atoa. (1 Kor. 15:33) To natuna be lo tauna ai ia lao neganai, gau momo ia lalopararalaia namonamo bona Baibel ena hakaua herevadia edia anina do ia herevalaia namonamo. Unai neganai, ia be hebamo taudia maorodia ia abia hidi namonamo diba. (1 Korinto 13:11; 14:20 duahia.) Dirava ena hakaua herevadia edia anina ita herevalaia namonamo neganai, ita diba iseda lalomamina be ita do ia hakaua namonamo, anina be Dirava ena laloa dalana do ita tohotohoa.

17. Dahaka dainai ita gwau diba abia hidi maorodia ita karaia diba?

¹⁷ Gau momo ese ita do idia durua abia hidi maorodia ita karaia bena Iehova do ia moale, a? Oibe. Baibel ena taravatu bona hakaua herevadia ita gaukaralaia namonamo neganai, do ita ‘hegeregere momokani, bona ita noho hegaegae gaukara namodia ibounai ita karaia totona. (2Tim. 3:16, 17) Unai dainai, Baibel ena hakaua herevadia ita tahua, unai amo “Iehova ena ura [do ita] lalopararalaia.” (Efe. 5:17) Kongrigeisen amo ita abia stadi gaudia ita gaukaralaia namonamo, hegeregere Watch Tower Publications Index, Iehova Ena Witnes Taudia Edia Stadi Indeks, Watchtower Library, Gima Kohorona INTANET LAIBERI, bona JW Library app. Inai tulu idauidau dainai ita sibona eda stadi bona ruma bese ena tomadiho ita karaia namonamo diba.

LALOMAMINA IDIA HADIBAIA NAMONAMO TAUDIA BE HAHENAMO IDIA ABIA

18. Iehova ena taravatu bona hakaua herevadia ita badinaia neganai, dahaka hahenamo do ita abia?

¹⁸ Iehova ena taravatu bona hakaua herevadia idia badinaia taudia be hahenamo momo idia abia, badina Salamo 119:97-100 ia gwau: “Lohiabada e, oiemu taravatu lau ura henia. Dina ena hora ibounai lalonai, oiemu taravatu lau laloa noho. Oiemu taravatu be lau dekenai ia noho nega ibounai, bona ia ese aonega lau dekenai ia henia noho. Inai aonega ese, lau dekenai idia tuari taudia edia aonega ia hereaia. Lauegu diba ese, egu hadibaia taudia ibounai edia diba ia hereaia noho, badina be lau ese Dirava ena hadibaia hereva lau laloa noho, ma lau laloa noho. Bona egu aonega [“laloparara,” NWT] ese tau buruka edia aonega ia hereaia noho, badina be oi Dirava, oiemu oda hereva lau badinaia noho.” Bema nega bada ita atoa Dirava ena taravatu bona hakaua herevadia ita “laloa noho,” ita be mai aonega, diba, bona laloparara ida kara maorona ita karaia diba. Oibe, nega ibounai Dirava ena taravatu bona hakaua herevadia amo iseda lalomamina ita hadibaia, unai amo “tau badana bamona ai ita lao, bona Keriso ena bada hegeregerena ita abia” diba.​—⁠Efe. 4:13.