“Keristani Tomadiho” Ena Toana Ia Idau Noho—Dirava ese Ia Abia Dae, A?
MANI oi laloa bema laulau penia tauna ta oi hamaoroa oiemu laulau ia torea totona. Ia haorea neganai, oi hoa bada; laulau ena toana be oiemu toana ida ia hegeregere momokani. Emu natudia, tubudia, bona edia natudia oi laloa, idia be mai moale bada ida unai laulau do idia itaia.
To, uru haida murinai, emu tubuna ta ia laloa unai laulau dekenai emu huina ena toana ia namo momokani lasi, unai dainai huina ma haida idia atoa. Ma ta be udu baubau ena toana ia ura henia lasi, unai dainai idia haidaua. Ma uru gabedia ese gau ma haida idia “hanamoa,” bena dokonai unai laulau ese oiemu toana ia hahedinaraia namonamo lasi. Bema oi diba unai gaudia do idia vara, edena bamona do oi laloa? Reana do oi badu.
Madi, unai laulau ena sivarai be sibona ia gwauraia Keristani tomadiho ena sivarai bamona. Taunimanima edia sivarai ese ia hahedinaraia Keriso ena aposetolo taudia idia mase murinai, “Keristani tomadiho” ena toana ia idau ia lao matamaia, Baibel ese ia perovetalaia hegeregerena.—Mataio 13:24-30, 37-43; Kara 20:30.a
Momokani, mauri dala idauidau bona nega idauidau hegeregerena Baibel ena hakaua herevadia badinaia karana be maoro. Unai kara be idau bona Baibel ena hahediba herevadia be taunimanima momo ese idia abia dae lalohadai hegeregerena haidaua karana be idau. To, unai be ia vara vadaeni. Hegeregere, gau badadia haida dekenai idia haidaua gaudia mani oi laloa.
Dubu be Gavamani ida Idia Gaukara Hebou
Iesu ia gwau iena lohia dalana, eiava Basileia, be guba gauna bona nega korikori ai, taunimanima edia lohia daladia ibounai do ia haorea bona tanobada ibounai do ia lohiaia. (Daniela 2:44; Mataio 6:9, 10) Ia be taunimanima edia politikol daladia amo do ia lohia lasi. Iesu ia gwau, “Lauegu Basileia be inai tanobada gauna lasi.” (Ioane 17:16; 18:36) Unai dainai, ena be Iesu ena hahediba taudia be taravatu idia badinaia, to politikol karadia amo idia gini siri.
To, lagani 300 C.E. murina laganidia lalonai, Roma Pavapavana Constantine ena nega ai, sibodia idia gwauraia Keristani taudia momo be Keriso ena lou mai bona Dirava ena Basileia do ia gini idia naria lalonai idia hesiku. Metairametaira, edia lalohadai politikol karadia dekenai idia idau. Buka ladana Europe—A History ia gwau, “Constantine be do lasi neganai, Keristani taudia ese edia abidadama durua totona [politikol] siahu idia tahua lasi. Constantine murinai, Keristani tomadihona bona dagi bada politikol taudia idia gaukara hebou.” Unai idia haidaua Keristani tomadihona be Roma Basileiana ena tomadiho “badana” ai ia lao.
Encyclopedia ladana Great Ages of Man ia gwau Dubu bona Gavamani edia headava dainai, “lagani 385 A.D. ai, Keristani taudia idia dagedage henia bada bena lagani 80 murinai, Dubu ese ena hahediba herevadia idia dadaraia taudia idia hamasea matamaia, bona ena gunalaia taudia idia abia siahu be kahirakahira pavapava ese idia abia siahu ida ia hegeregere.” Unai nega amo tuari kaia ese lalona veria karana ena gabu ia abia taunimanima edia tomadiho haidaua totona, bona dagi bona siahu idia abia dubu gunalaia taudia ese aposetolo taudia edia nega ai idia noho manau haroro taudia edia gabu idia abia. (Mataio 23:9, 10; 28:19, 20) Histori torea tauna H.G. Wells ese lagani 300 C.E. murina laganidia lalonai ia noho Keristani tomadihona “bona Nasareta tauna Iesu ena hahediba herevadia” edia “idau bada” ia herevalaia. Unai “idau bada” gaudia huanai be Dirava bona Keriso idia herevalaia hahediba hereva badadia danu.
Edia Lalohadai Dirava Dekenai Idia Haidaua
Keriso bona ena hahediba taudia idia gwau “Dirava tamona, ia be Tamana” ia noho, ia be ena ladana dainai ma haida amo ia idau, unai ladana, Iehova, be Baibel toretoredia ginigunadia lalonai nega 7,000 bamona ia hedinarai. (1 Korinto 8:6; Salamo 83:18) Iesu be Dirava ese ia havaraia; Catholic Douay Version Baibel be Kolose 1:15 ai ia gwau ia be Dirava ese ia “havaraia taudia ibounai amo ia vara guna.” Iesu be Dirava ese ia havaraia tauna ta dainai, ia gwau: “Egu Tamana ese lau ia hereaia.”—Ioane 14:28.
To lagani 200 C.E. murina laganidia ai, siahu bada dubu gunalaia taudia haida ese Dirava momokanina ia diba lasi Greek aonega tauna Plato ena toi tamona hahediba herevana idia ura henia bada, bena edia lalohadai Dirava dekenai idia haidaua matamaia Toi Tamona herevana danu ia hegeregere totona. Murina laganidia momo lalonai, unai hahediba herevana be Baibel ena hereva hegeregerena lasi to Iesu ia abia isi Iehova ida ia hegeregere totona bona Dirava ena lauma helaga, o gaukara siahuna, ia gwauraia tau ta.
Dubu ese Dirava momokanina idia diba lasi taudia edia Toi Tamona hahediba herevana idia abia dae ia herevalaia neganai, New Catholic Encyclopedia ia gwau: “Lagani 400 be kahirakahira neganai, ‘Dirava tamona lalonai toi idia noho’ herevana be idia do haginia goada lasi, bona momokani Keristani maurina bona ena abidadama karana lalonai idia do abia vareai momokani lasi. To unai hereva ena ladana idia gwauraia Toi Tamona hahediba herevana. Keristani hahediba herevadia idia torea taudia huanai, unai bamona lalohadai idia abia lasi.”
Unai hegeregerena, The Encyclopedia Americana ia gwau: “Lagani 300 murina laganidia ai idia abia dae Toi Tamona herevana ese Keristani taudia ginigunadia edia hahediba herevadia Dirava dekenai ia hahedinaraia namonamo lasi; to idau, unai hahediba herevana idia rakatania.” The Oxford Companion to the Bible ese Toi Tamona herevana ia gwauraia “gabeai idia havaraia hahediba herevadia” ta. To, Toi Tamona herevana sibona lasi be dubu dekenai idia abia vareai Dirava momokanina idia diba lasi taudia edia hahediba herevana.
Edia Lalohadai Souli Dekenai Idia Haidaua
Hari inai negai gabu momo dekenai idia abia dae taunimanima be mai edia mase diba lasi soulina, tauanina ia mase neganai unai souli ia mauri noho. To oi diba unai dubu hahediba herevana danu be gabeai idia abia vareai gauna, a? Iesu ese Baibel ena hereva momokani, “mase taudia be gau ta idia diba lasi,” ia hamomokania, idia be hegeregere idia mahuta bamona. (Hadibaia Tauna 9:5; Ioane 11:11-13) Mauri be toreisi lou amo ia vara—mase dekenai mahuta karana amo do idia ‘gini lou.’ (Ioane 5:28, 29) Bema mase diba lasi soulina ia noho, ia dekenai toreisi lou be anina lasi, badina ia mase diba lasi.
Danu, Iesu ese Baibel ena hahediba herevana toreisi lou dekenai ia hahedinaraia totona taunimanima be mase amo ia hatoreaisi lou. Lasaro ena haheitalai mani oi laloa, ia be dina hani ia mase vadaeni. Iesu ese ia hatoreaisi lou neganai, Lasaro be mai mauri danu gara gabuna amo ia raka lasi bona ia hahodi. Lasaro be mase amo ia noga neganai, guba ena moale amo mase diba lasi souli ta be iena tauanina dekenai ia diho mai lasi. Bema unai ia vara, Iesu ena hatoreaisi lou karana be hebogahisi karana lasi!—Ioane 11:39, 43, 44.
Vadaeni, souli ia mase diba lasi herevana be edena bamona ia vara? The Westminster Dictionary of Christian Theology ia gwau unai lalohadai be “Baibel ena lalohadai lasi, to Greek taudia edia lalohadai ia hahedinaraia.” The Jewish Encyclopedia ia gwau: “Tauanina ia bodaga vadaeni murinai souli ia mauri noho herevana be tanobada ena aonega taudia haida bona tomadiho herevadia idia tahua taudia haida ese sibodia edia lalohadai amo idia davaria herevana to abidadama korikori herevana lasi, bona unai dainai idia gwauraia lasi Buka Helaga lalonai.”
Nega momo, koikoi herevana ta ese ma ta ia havaraia, bona souli ia mase diba lasi hahediba herevana dekenai unai be momokani. Unai ese Dirava momokanina idia diba lasi taudia edia hahediba herevana, hel lahina dekenai hisihisi hanaihanai herevana, ena dala ia kehoa.b To, Baibel ia gwau “kara dika ena davana be mase”—hisihisi hanaihanai lasi. (Roma 6:23) Unai dainai, toreisi lou ia herevalaia neganai, King James Version ia gwau: “Davara lalonai idia mase taudia be davara ese ia henia daekau; bona mase bona hel lalonai idia noho taudia idia henia daekau.” Unai hegeregerena, Douay Baibel ia gwau “davara . . . bona mase bona hel be edia mase taudia idia henia daekau.” Oibe, ita gwau diba, hel lalonai idia noho taudia be idia mase, idia ‘mahuta’ Iesu ia hereva bamona.—Apokalupo 20:13.
Momokani oi laloa hel lalonai hisihisi hanaihanai hahediba herevana ese taunimanima be Dirava dekenai ia hakaudia lao, a? Reana lasi. Hahemaoro maoromaoro bona lalokau taudia dekenai, unai be idia dadaraia lalohadaina ta! To, Baibel ia gwau “Dirava be lalokau” bona hahisia karana, animal hahisia karana danu, be ia dadaraia.—1 Ioane 4:8; Aonega Herevadia 12:10; Ieremia 7:31; Iona 4:11.
Hari Inai Negai “Laulau” Ena Toana Idia Haidaua
Hari inai negai taunimanima ese edia lalohadai Dirava bona Keristani tomadihona dekenai idia haidaua noho. Tomadiho hadibaia profesa ta be vanegai ia gwau ena Protestan dubu ia hekwarahi edena do ia abia dae, “Baibel bona hahediba herevadia edia siahu eiava lalohadai idaudia bona taunimanima edia namo idia naria lalohadai edia siahu, dubu ese Keriso ena lohia siahuna ia badinaia eiava Keristani tomadiho be hari iseda nega taudia edia lalohadai hegeregerena do idia haidaua. Henanadai badana be inai: Daika ese dubu ena dala do ia gwauraia . . . Buka Helaga eiava hari inai negai taunimanima idia biagua lalohadai?”
Madi, “hari inai negai taunimanima idia biagua lalohadai” ia kwalimu noho. Hegeregere, momo idia diba dubu momo ese edia lalohadai gau idauidau dekenai idia haidaua, badina idia ura hahedinaraia edia lalohadai idia hamatamataia noho bona lalohadai idaudia idia abia dae. Nega momo kara goeva dekenai, dubu be kara idauidau idia abia dae, hereva gunana lalonai ai hereva bamona. To, Baibel ese ia hahedinaraia goevagoeva, Dirava ena matana dekenai sihari kava, heudahanai, bona tatau o hahine idia sihari heheni karana be kara dika badadia bona unai kara idia karaia taudia ese ‘Dirava ena Basileia do idia davaria lasi.’—1 Korinto 6:9, 10; Mataio 5:27-32; Roma 1:26, 27.
Aposetolo Paulo ese unai ataiai idia noho herevadia ia torea neganai, idia noho Helene bona Roma taudia be kara dika idauidau idia karaia momo. Paulo be reana ia laloa diba: ‘Oibe, Dirava ese Sodoma bona Gomora be edia matabodaga karadia dainai kahu ai ia halaodia, to unai ia vara lagani 2,000 gunanai! Momokani inai diari negana lalonai unai be anina lasi.’ To, ia be unai bamona ia laloa lasi; ia ura lasi Baibel ena hereva momokani ia hagagevaia.—Galatia 5:19-23.
“Laulau” Ginigunana Oi Itaia
Iesu ese iena nega ai idia noho Iuda tomadiho gunalaia taudia ia hereva henia neganai, ia gwau edia tomadiho be ‘anina lasi badina edia hahediba herevadia be taunimanima edia taravatu sibona.’ (Mataio 15:9) Unai tomadiho gunalaia taudia idia karaia karana Iehova ese Mose ena amo ia henia taravatu dekenai bona Kerisendom ena dubu gunalaia taudia oreana be Keriso ena hahediba herevadia dekenai idia karaia vadaeni, bona idia do karaia noho, karana be hegeregere—idia ese Dirava ena hereva momokani latanai sene karadia be “peni” bamona idia atoa. To Iesu ese hereva koikoi ibounai ia kokia, kudou-maoro taudia ese namo idia davaria totona. (Mareko 7:7-13) Iesu ese hereva momokani ia gwauraia, herevana taunimanima ese idia ura henia eiava lasi. Hanaihanai iena hereva ena badina be Dirava ena Hereva.—Ioane 17:17.
Sibona idia gwauraia Keristani taudia momo amo Iesu ese ia hahedinaraia kara be idau herea. Momokani, Baibel ia gwau: “Taunimanima be edia ura hegeregerena gau matamatadia bona . . . hadibaia taudia do idia tahua; bena, hereva momokani do idia kamonai lasi, to gori do idia kamonai.” (2 Timoteo 4:3, 4, The Jerusalem Bible) Unai “gori,” idia haida ita herevalaia vadaeni, ese lauma dalanai dika idia havaraia, to Dirava ena Hereva ena hereva momokani ese goada ia havaraia, bona ita ia hakaua lao mauri hanaihanai dekenai. Iehova ena Witnes taudia ese oi idia hagoadaia unai hereva momokani oi tahua totona.—Ioane 4:24; 8:32; 17:3.
[Footnotes]
a Iesu ese ia gwauraia uiti bona ava bona dala badana bona maragina edia haheitalai hegeregerena (Mataio 7:13, 14), lagani idia hanaia lalodiai Keristani tomadiho korikorina be haida ese idia badinaia noho. To, idia be haida sibona bona ava bamona taudia, idia gwau idia bona edia hahediba herevadia be Keristani tomadiho korikorina ena toana idia hahedinaraia taudia, be momo herea. Inai hereva ese unai toana ia herevalaia.
b “Hel” be Heberu herevana Sheol bona Greek herevana Hades amo idia hahanaia, ruaosi edia anina be “gara gabuna.” Unai dainai, ena be English gado hahanaia taudia ese King James Version ai nega 31 sheol idia hahanaia “hel,” to nega 31 idia gwauraia “gara gabuna” bona nega toi idia gwauraia “guri,” unai amo idia hahedinaraia unai hereva edia anina be hegeregere.
[Box/Picture on page 7]
Ladana Keristani Ia Vara Dalana
Lagani 10 bamona lalonai Iesu ia mase murinai, iena murinai idia raka taudia idia gwauraia Iesu eiava Lohiabada ena “Dala” taudia. (Kara 9:2, NW; 19:9, 23; 22:4) Dahaka dainai? Badina idia edia mauri dalana amo idia hahedinaraia Keriso idia abidadama henia, ia be ‘dala, hereva momokani, bona mauri.’ (Ioane 14:6) Bena, nega ta lagani 44 C.E. murinai, Suria Antioka dekenai, Iesu ena hahediba taudia ‘edia ladana idia atoa Keristani taudia.’ (Kara 11:26) Unai ladana idia abia dae haraga, bona gavamani taudia ese idia abia dae danu. (Kara 26:28) Unai ladana matamatana ese Keristani mauri dalana ia haidaua lasi, Keriso ia hahedinaraia dalana idia badinaia noho.—1 Petero 2:21.
[Pictures on page 7]
Edia haroro gaukara amo, Iehova ena Witnes taudia ese taunimanima be Dirava ena Hereva, Baibel, dekenai idia hakaua lao
[Picture Credit Line on page 4]
Third from left: United Nations/Photo by Saw Lwin