Mauri Dalana Hereadaena ai Idia Lalo-Tamona

Bema taunimanima edia namba ia bada daekau noho, nega daudau lasi murinai, taunimanima bilioni 6 be tanobada dekenai do idia noho. Ena be tubuna tamona amo idia vara, to toana be idia momo idia abia dae lasi idia be tanobada ibounai ruma besena ena kahana ta bona Havaraia Tauna mai ena aonega bona lalokau dekenai edia kara ena anina idia gwauraia be maoro. Tano idauidau, bese idauidau, bona mauri daladia idauidau taudia huanai ia vara heiriheiri ese unai ia hahedinaraia goevagoeva.

HARI tanobada dekenai idia vara gaudia ita laloa neganai, toana be tanobada ibounai taudia huanai lalo-tamona ia vara diba lasi. The Columbia History of the World ia gwau: “Henanadai badana be ita noho hebou dalana maorona be edena bamona, bona hari idia noho taudia ese lalohadai matamatana ta idia henia diba lasi.”

To, tanobada taudia ibounai hatamonaia totona lalohadai matamatana ita abia be mai anina lasi. Lalo-tamona abia dalana be Buka Helaga ese ia hahedinaraia. Unai dala be tanobada bona ia dekenai idia noho mauri gaudia ibounai ia havaraia Tauna tomadiho henia karana. Dirava ena taunimanima be edia lalohadai, ura, bona mauri dalana ai idia lalo-tamona vadaeni. Tano 233 ai, edia namba be milioni ima mai kahana, bona mai edia lalo-tamona ida idia abia dae Dirava ia gwauraia mauri dalana be dala hereadaena. Salamo torea tauna bamona idia guriguri, idia gwau: “Lohiabada e, oiemu dala lau dekenai do oi hadibaia, bona lau be oiemu momokani lalonai do lau raka. Lauegu lalona do oi hatamonaia momokani, vadaeni lau ese oiemu ladana do lau matauraia bona gari henia.”​—Salamo 86:11.

Taunimanima be tomadiho goevana lalonai do idia lalo-tamona be peroveta tauna Isaia ese idaunegai ia herevalaia vadaeni. Ia gwau: “Nega gabeai be inai bamona do ia vara: Lohiabada ena Dubu Helaga ia gini ororona, be ataiai momokani ororona do ia lao. Inai ororo be ia ese, ororo ibounai do ia hereaia. Bese ibounai ese ia dekenai do idia haboua lao. Bona edia taunimanima do idia gwau, ‘Umui mai, Lohiabada ena ororo dekenai do ita daekau, Israela ena Dirava ena Dubu Helaga dekenai do ita lao. Ia ese iena kara ita dekenai do ia hadibaia, bona ita ese unai Dirava ena dala dekenai do ita raka. Badina be Lohiabada ena hadibaia hereva, be Ierusalema dekena amo ia mai noho. Siona dekena amo Lohiabada ese, iena bese taudia dekenai ia hereva henia noho.’ ”​—Isaia 2:​2, 3.

Iehova ena Witness taudia edia lalo-tamona be idau momokani. Tanobada hegegemadai, kongregesen 87,000 ai, pura ta ta iboudiai edia hebou idauidau ai lauma aniani tamona idia abia. (Mataio 24:45-​47) To, lagani 1998 huanai amo ela bona lagani 1999 ena matamanai, Witness taudia ese dala idauna ai edia lalo-tamona idia hahedinaraia​—idia be tanobada hegegemadai “Dirava Ia Gwauraia Mauri Dalana” Hebouheboudia dekenai idia lao. Tano 13 ai, tano ma haida amo taunimanima momo herea idia mai bona unai hebouhebou idia gwauraia intenesenel hebouheboudia. Hebouhebou ma haida idia gwauraia distrik hebouheboudia. To unai hebouhebou iboudiai ese lauma dalana ai taunimanima ia hagoadaia program tamona idia hahedinaraia.

Dabua namodia idia atoa taudia be mai edia moale ida hebou gabudia bona steidiam dekenai idia aru lao, Iehova ese idia ia hadibaia totona, bona unai oi itaia be moale bada gauna! Michigan, U.S.A. ai, idia karaia intenesenel hebouhebou dekenai ia lao taihu ta ese unai hebouhebou ia herevalaia bona ena hereva be momo edia lalohadai hegeregerena. Ia gwau: “Tanobada ena kahana idauidau​—Czech Republic, Barbados, Nigeria, Hungary, England, Holland, Ethiopia, Kenya, bona tano idauidau momo​—amo idia mai tadikaka idia rosia heheni, bona unai lau itaia neganai lau moale bada! Lau itaia tadikaka idia noho hebou mai lalo-tamona ida, bona idia ta ta bona edia Dirava, Iehova, idia lalokau henia dainai mai moale ida idia tai, unai be hairai bada gauna.” Hereva gabena ese tanobada hegegemadai taunimanima milioni momo idia moalelaia hebouhebou ena program do ia herevalaia.

[Picture Credit Line on page 3]

Mountain High Maps® Copyright © 1997 Digital Wisdom, Inc.