“Tanobada Ena Dokona” Gabudiai Diari Halasia Gaukarana Ia Durua

DIRAVA ese aposetolo Paulo ia gaukaralaia “tanobada ena dokona” gabudiai lauma diarina ia halasia totona. Unai dainai, “mauri hanaihanai idia ura kudou-maoro taudia ibounai be abidadama taudia ai idia lao.”​—⁠Kara 13:​47, 48, NW; Isaia 49:⁠6.

William Lloyd Barry, Iehova ena Witness taudia edia Hakaua Oreana tauna ta, ese ena mauri lalonai Iehova ia badinaia bona mai hesiku lasi ida Keristani karadia ia karaia ese idia hahedinaraia ia ura bada lauma diarina ia halasia. Tadikaka Barry be July 2, 1999 ai, Hawaii dekenai distrik hebouhebou ena kahana ta ia henia neganai ia mase.

Lloyd Barry be December 20, 1916 ai, New Zealand dekenai ia vara. Iena tamana bona sinana be Watch Tower Bible and Tract Society ese ia halasia C. T. Russell ena buka bona magasin idia hahedinaraia Baibel ena hereva momokanidia idia ura henia bada. Unai dainai, Tadikaka Barry be Keristani ruma bese namona lalonai ia tubu daekau.

Ena be spot gadara bona edukeisen ia ura henia bona iunivesiti dekenai saiens ena kwalimu pepana ia abia, to Tadikaka Barry ese lauma gaudia ia laloa bada noho. Unai dainai, January 1, 1939 ai, ful-taim hesiai gaukara ia karaia matamaia, Australia dekenai Society ena opesi ai, Betele famili ena memba ta ai ia lao. Lagani 1941 ai, gavamani ese Society ena gaukara ia koua murinai, Tadikaka Barry be opesi dekenai ia gaukara noho, bona nega haida ia idia abia hidi abidadama tamona taudia hagoadaia herevadia ia torea totona. Danu, ia be haroro gaukara dekenai haheitalai namona ia hahedinaraia.

February 1942 ai, Tadikaka Barry ese ful-taim hesiai gaukara ia karaia taihu ta ia adavaia. Lagani momo lalodiai, tanobada ena kahana momo lalonai, iena lalokau adavana Melba be mai ena abidadama ida ia danu ia gaukara. United States ai, Watchtower Bible School of Gilead ena klas namba 11 dekenai idia lao bona unai amo, idia ese idau tanodia dekenai do idia karaia anina bada gaukarana idia abia dae. Edia gaukara gabuna be Japan​—⁠momo idia laloa unai be “tanobada ena dokona” gabuna ta. November 1949 ai, unuseniai idia ginidae murinai, Kobe ena kone siti dekenai misinari gaukara idia hamatamaia. Unai nega ai, Japan dekenai taunimanima 12 sibona ese sivarai namona idia harorolaia. Tadikaka Barry ese ena gabu matamatana ena gado bona noho daladia ia dibaia bona Japan taudia ia ura henia bada, bona lagani 25 lalonai idia ida ia gaukara. Iena lalokau “mauri hanaihanai idia ura kudou-maoro taudia” dekenai be Japan ai ia tubu Keristani tadikaka oreana ese idia itaia, bona unai ese ia durua, lagani momo lalonai brens naria gaukarana dekenai anina namona ia havaraia totona.

Lagani 1975 huanai, Japan ai Witness taudia be 30,000 bamona neganai, tadikaka bona taihu Barry be Brooklyn, New York dekenai, idia siaia lao. Tadikaka Barry be horoa Keristani tauna ta, bona ia idia boiria Iehova ena Witness taudia edia Hakaua Oreana tauna ta ai do ia lao. (Roma 8:​16, 17) Iena diba toretore gaukarana dekenai ese iena gaukara matamatana Toretore Dipatmen lalonai ia durua bada. Bona brens gaukara bona tano idaudia dekenai gaukara ia diba namonamo dainai, Hakaua Oreana ena Publishing Committee lalonai heduru bada ia henia diba.

Idia hanaia laganidia lalonai, Tadikaka Barry ese ena lalokau Asia bona unai gabu taudia dekenai ia dogoatao noho. Gilead Sikuli dekenai idia lao stiuden taudia bona Betele famili taudia danu be idia diba iena hereva ese misinari gaukara idia karaia taudia momo edia moale sivaraidia edia hereva badadia idia hahedinaraia. Tadikaka Barry be mai ena moale ida ena ekspiriens ia herevalaidia neganai, Basileia harorolaia gaukarana “tanobada ena dokona” gabudiai be ita itaia bamona. Unai gaudia haida be The Watchtower, September 15, 1960 lalonai, iena mauri sivaraina ese ia hahedinaraia.

Ita diba momokani Tadikaka Barry be ‘Keriso ida ia lohia’ negana lalonai danu, “mauri hanaihanai idia ura kudou-maoro taudia” ia do laloa bada noho. To momokani, ia idia diba bona lalokau henia taudia ibounai ese ia do idia laloa momo badina ia be lauma gaudia ia laloa bada tauna, mai ena lalona ibounai ida Iehova ia badinaia bona Dirava ena taunimanima ia lalokau henia. To, ita moale badina Tadikaka Barry be mai abidadama ida ia haheauka ela bona ena tanobada maurina ena dokona.​—⁠Apokalupo 2:⁠10.

[Picture on page 16]

Lloyd Barry bona John Barr lagani 1988 ai “Insight on the Scriptures” idia halasia neganai

[Picture on page 16]

Gilead klas namba 11 idia haorea taudia, lagani 40 murinai Japan dekenai idia hebou neganai