Gilead Hahediba Dalana Abidadama Helagana Dekenai
“ISEDA stiuden taudia be abidadama helagana dekenai diba namona idia abia.” Unai hereva amo Watchtower Bible School of Gilead ena klas namba 95 edia kosi haorea program idia kehoa, unai be Sunday, September 12, 1993 ai. Unai daba ai, Betele taudia bona idia boiridia taudia 4,614 be Jersey City Assembly Hall dekenai idia hebou, bona George Gangas ese hebou kehoa gurigurina ia henia. Tadikaka Gangas be lagani 65 lalodiai Betele tauna ta; hari iena mauri lagani be 97 bona ia be Hakaua Oreana ena buruka herea tauna.
Hakaua Oreana tauna ma ta, Albert Schroeder, be program ena seamani; ia gwau: “Hua ima lalodiai Gilead kosi be abidadama helagana dekenai idia haginia.” Ia hahedinaraia Iuda 20 dekenai ia herevalaia “abidadama helagana” be Baibel ena hereva momokanidia iboudiai. Unai dainai Gilead kosi be Iehova ena Hereva, Baibel, dekenai idia haginia; unai be kosi ena buka badana.
Stiuden Taudia be Diba Ma Haida Idia Abia
Hereva henia tauna ginigunana be John Stuefloten, Watchtower Farms Committee tauna ta; iena hereva ena sinado be “Aonega Taudia ese Ita Idia Veria Namo Ita Davaria Totona.” Baibel ia gwau “aonega taudia ida ia raka hebou tauna be do ia aonega.” (Hereva Lada-isidia 13:20) Gilead kosi idia karaia neganai, stiuden taudia be hora 900 bona ma haida lalodiai Baibel idia stadilaia. Tadikaka Stuefloten ese stiuden taudia ia nanadaidia, ia gwau: “Vaira negadia ai, Iehova ena siahu be edena bamona umui do ia veria? Umui be tano 18 dekediai do umui lao, bona unai gabu taudia be 170 milion bamona. Unai dainai, unai taudia be edena bamona do oi hasiahudia?” Iehova ena aonega idia hahedinaraia neganai, misinari matamata taudia be ma haida do idia durudia diba Iehova idia tomadiho henia totona, ia be ia doko lasi aonega ena Badina.
Murina hereva be Hakaua Oreana tauna Lloyd Barry ese ia henia, bona ena sinado be “Taunimanima Idauidau Ibounai Edia Mauri Dalana Hegeregerena Umui Halaodia.” (1 Korinto 9:22) Lagani 45 gunanai bamona, Tadikaka Barry be Gilead ena klas namba 11 stiuden tauna ta. Klas namba 95 taudia idia moale badina tano idauna ta ai diba ia abia misinari tauna gunana ta be sisiba namona ia henidia. Stiuden taudia ia hagoadadia idia lao tano matamatana ena teritori taudia bamona ai idia lao haraga; anina be edia kastom bona edia gado dekenai diba idia abia haraga. Ia gwau unai idia karaia dala namona be unai tano taudia idia bamodia bona idia ida basileia gaukara idia karaia hebou, bona danu edia kastom dekenai diba idia abia bona ia maoro negadia ai idia badinaia.
Unai murinai, Faktori Komiti tauna Dean Songer be lalona veria hereva, “Maduna ta amo Idia Atoa Siri,” ia henia. Tadikaka Songer be lagani 35 bona ma haida lalodiai ful-taim hesiai gaukarana ia karaia, bona ia diba edena bamona gau tamona ia tahua, edena bamona lalona veria oho lasi mauri dalana ia noholaia, bona ia diba edena dala ai tiokratik gaukarana ia karaia bona tanobada gaudia ia laloa lasi. Bona stiuden taudia ia henia sisiba ena anina be unai. Iehova ena dubu ai ane idia abia taudia be Levi taudia ma haida ese idia karaia gaukaradia amo idia atoa siri, idia be edia gaukara idauna sibona idia karaia totona. (1 Sisiga 9:33) Unai hegeregerena, Gilead misinari taudia be tanobada gaukara idia karaia lasi, edia gaukara idauna idia laloa hanaihanai totona. Tadikaka Songer be inai sisiba amo hereva ia hadokoa, ia gwau: “Namona be emui mauri lalonai umui tahua gauna umui itaia namonamo, bona emui mauri dalana umui hametaua lasi. Umui be maduna ta amo idia atoa siri taudia dainai, emui maduna be dina ai bona hanuaboi ai umui gaukara, Iehova umui hanamoa.”
Ia murinai hereva ia henia tauna be Hakaua Oreana tauna Daniel Sydlik, bona iena hereva ena sinado be “Ma Haida Hadibadia Mauri Ena Anina Namona Idia Abia Totona.” Stiuden taudia ia hagoadadia “hahediba herevadia umui hadibalaidia sibona lasi, to gari lasi dekenai taunimanima umui hadibadia dahaka idia karaia be namo Dirava ena ura hegeregerena idia mauri totona.” Hahediba karaia taudia be taunimanima edia lalona idia hamareredia bona idia veridia be namo. Ia gwau: “Namona be Keristen karadia hadibadia umui laloa bada, taravatu maragidia momo hadibalaidia umui laloa bada lasi.” Bona hereva dokona ai, ia be ma ia gwau: “Lalokau tadikaka e, gau badana be umui sibona dekenai bona ma haida dekenai lalokau hahedinaraia dalana umui hadibaia, badina ia be hatamonaia gauna hereadaena.”—1 Korinto 13:1-3; Kolose 3:14.
Hua ima lalodiai kosi idia karaia neganai, stiuden taudia be edia Gilead tisa taudia rua idia ura henidia bada. Guna, Jack Redford be misinari tauna ta, bona ia hereva guna, iena hereva be “Umui be Dala Maorona Umui Abia Hidi.” Idaunegai Iuda taudia edia nega ai, Keristen aposetolo ai ia do lao lasi neganai, Paulo be mai ena dagi badana, ladana bada, siahu, bona moni bada. To Filipi 3:8 dekenai, Paulo ese unai ibounai ia gwauraia “anina lasi gauna,” eiava “momoru.” Haroro gaukara ia laloa bada, bona dala maorona ia abia hidi. To hari inai nega taudia momo be idau, edia mauri lalonai idia abia hidi gaudia ese ia hahedinaraia idia laloa tanobada kohu be anina bada to mauri hanaihanai be anina bada lasi. Gilead misinari taudia be dala maorona idia abia hidi vadaeni. Jack Redford ena hereva dokona be inai: “Diabolo ena tanobada ese umui ia henia gauna be misinari hesiai gaukarana ida oi hahegeregerea diba lasi. Unai mai anina bada hahenamo oi naria namonamo, bona tanobada oi rakatania sibona ena momoru ia naria totona!”
Idia hanaia lagani 32 lalodiai, Ulysses Glass be Gilead tisa tauna ta. Stiuden taudia dekediai iena sisiba dokona ia henia; iena hereva ena sinado be “Dirava Sibona ese Au Ia Karaia Diba,” bona Salamo 1:3 amo hereva ia abia. Hari inai negai masini dekenai gau momo idia karaia, to Dirava bamona idia karaia diba lasi, au idia karaia diba lasi. Keristen momokani taudia be au bamodia, Iehova ese ia hadoa bona ia dairia gaudia. Tadikaka Glass ia gwau hua ima lalodiai, stiuden taudia be “Dirava ena Hereva ese ia henia mauri ranuna amo idia dairia,” hegeregerena lauma dalana ai uma eiava paradaiso ta ena au bamodia. To, idia be misinari taudia dainai, namona be edia “ramuna, lauma dalanai, idia naria, dika ese ia abia garina.” Ia hagoadadia ‘Iehova ena amo ia mai mauri ranuna idia inua noho badina Dirava sibona ese au ia karaia diba.’
Hereva dokona ia henia tauna be Carey Barber, Hakaua Oreana tauna ta. Lagani 70 lalodiai ful-taim hesiai gaukarana ia karaia, bona Tadikaka Barber be ia diba momo inai hereva ia henia totona, “Iehova Sibona Oi Tomadiho Henia.” Taunimanima momo be Iehova sibona dekenai idia tomadiho lasi. (Deuteronomi 5:9) To, Tadikaka Barber ese ia hahedinaraia hegeregerena, ena be ita goevadae lasi, “Dirava sibona ita tomadiho henia dalana ia noho.” Ma ia gwau: “Ta ia gwau diba lasi: ‘Diabolo ese lau ia doria dainai lau karaia.’ ” To bema ita tuari henia lasi, Diabolo ese ita ia hamorua diba. (Iakobo 4:7) Iehova ena gaukara dekenai gaukara momo ita karaia be dala badana Satana bona iena tanobada ita tuari henia totona, bona Iehova sibona ita tomadiho henia totona.
Misinari Dagi Idia Abia
Stiuden taudia iboudiai 46 be misinari dagi idia abia neganai, daba ena program ia ore. Headava tatau mai edia adavadia 23 be kosi haorea pepa idia abia, bona unai pepa ia gwau kosi haorea taudia be “diba idia abia taunimanima hadibadia totona, namo karadia habadaia totona bona noho hanaihanai mainona, taravatu badinaia bona kara maoromaoro gaukarana, taunimanima iboudiai dekenai.” Gilead ena klas namba 95 taudia be do idia lao henidia tano 18 lalodiai, unai gaukara namona do idia karaia toho. Idia lao gabudia be tanobada ena gabu idauidau ai, bona unai be Asia, Africa, Europe, Latin America, bona Caribbean dekenai.
Adorahi ai, Haroro Dipatmen Komiti tauna Charles Woody ese Gima Kohorona Stadi kwadogina ia karaia murinai, Gilead stiuden matamatadia be edia program idia karaia, ena sinado be “Gilead ese Ai Ia Hegaegaelaia Misinari Hadibalaia Gaukarana Karaia Totona.” Unai hereva be “Ita Abia Hidi Diba Daladia” ena drama amo ia doko.
Unai lalona hagoadaia program murinai, misinari matamata taudia idia hegeregere tanobada ena gabu iboudiai idia lao bona ma haida ida “abidadama helagana” idia henia totona.
[Box on page 26]
Sikuli Ena Lista
Edia tano idauidau: 7
Idia lao henidia tanodia idauidau: 18
Klas taudia iboudiai: 46
Tatau mai edia adavadia: 23
Edia lagani ena averes: 30.06
Orea lalonai noho laganidia ena averes: 12.92
Ful-taim hesiai gaukara idia karaia laganidia ena averes: 9.4
[Picture on page 26]
Watchtower Bible School of Gilead Ena Klas Namba 95
In the list below, rows are numbered from front to back, and names are listed from left to right in each row.
(1) Buelow, D.; Donzé, V.; Innes, S.; Fulk, N.; Billingsby, M.; Hoddinott, L.; Nygren, B.; Eriksson, L. (2) Boker, J.; Thomas, M.; Stedman, S.; Billingsby, D.; Waugh, I.; Purves, M.; Luttrell, M. (3) Jacobsen, T.; Boker, J.; Martínez, L.; Nilsson, E.; Purves, P.; Holt, L.; Larsen, M.; Jones, L. (4) Numminen, P.; Numminen, H.; Buelow, M.; Olson, W.; Holt, S.; Donzé, G.; DesJardins, C.; DesJardins, D. (5) Larsen, K.; Martínez, D.; Nygren, P.; Waugh, P.; Jones, D.; Hoddinott, J.; Thomas, G. (6) Innes, B.; Fulk, R.; Eriksson, A.; Nilsson, S.; Stedman, J.; Olson, K.; Jacobsen, F.; Luttrell, J.