Mauri Sivaraina

Ai Gaukara Hebou

MELBA BARRY ESE IA SIVARAILAIA

July 2, 1999 ai, egu adavana bona lau be Iehova ena Witnes taudia edia hebouhebou badana lalonai ai noho, emai headava laganidia 57 lalonai nega tausen momo ai lao vadaeni bamona. Lloyd be Friday ai, Hawaii distrik hebouhebouna ena hereva dokona ia henia. Karaharaga, ia moru. Ena be idia hekwarahi ia idia durua totona, to ia mase.a

HAWAII dekenai lalokau Keristani tadikaka bona taihu be lau dekenai idia mai bona lau idia durua unai dika do lau haheaukalaia totona! Lloyd ena kara ese idia momo edia mauri ia haidaua, bona tanobada hegegemadai tadikaka momo herea edia mauri ia haidaua danu.

Ia mase bena idia hanaia laganidia kahirakahira rua lalonai, ai ruaosi ai noho hebou laganidia namodia lau laloa lou​​—⁠momo be emai misinari gaukara gabudia dekenai bona Iehova ena Witnes taudia edia hedikwota Brooklyn, New York dekenai. Egu matamata negana Sydney, Australia dekenai, bona Tanobada Ibounai Tuarina ia matamaia lalonai, lau bona Lloyd ai ura headava gwauraia neganai, ai davaria hekwakwanai lau laloa lou danu. Gau ginigunana be, Witnes ta ai lau lao dalana bona 1939 ai Lloyd lau hedavari henia dalana do lau gwauraia.

Witnes ta ai Lau Lao Dalana

James bona Henrietta Jones be egu lalokau tama sina bona lau idia naria. Lagani 1932 ai, egu mauri lagani be 14 sibona neganai, sikuli lau haorea. Unai neganai tanobada hegegemadai bisinesi momo idia moru. Lau gaukara matamaia egu famili, egu tadidia rua danu, lau durua totona. Lagani haida murinai, gaukara mai ena davana namona lau davaria bona hahine matamatadia haida lau biagua.

Unai nega lalonai, 1935 ai, Sinana be Iehova ena Witnes tauna ta amo Baibel ia herevalaia buka ta ia abia bona nega sisina murinai ia diba hereva momokani ia davaria. Ai ibounai ai laloa ia kavakava ai ia lao. To, dina ta ai, lau ese buklet ta, ena ladana be Where Are the Dead?, lau itaia bona ena ladana ese egu lalona ia veria. Unai dainai hehuni dalanai buklet lau duahia. Unai buklet ese lau ia durua! Unai murinai Sinana lau bamoa bona pura ena huanai idia karaia hebouna, idia gwauraia Model Study, lau lao henia matamaia. Buklet ena ladana Model Study​​—⁠gabeai idia be toi​​—⁠lalonai be henanadai bona haere, bona Baibel siridia ese haere idia hamomokania.

Unai nega lalonai, April 1938 ai, Joseph F. Rutherford, Iehova ena Witnes taudia edia hedikwota ena gwaukau tauna ese Sydney ia vadivadi henia. Iena pablik tok be lau lao henia tok ginigunana. Sydney Town Hall dekenai do ai abia gwauraia, to dagedage taudia edia kara dainai, ai gaukaralaia gwauraia gabuna ena gwaumaoro idia kokia. To, unai hereva be gabu badana, Sydney Sports Ground dekenai ia henia. Dagedage taudia edia kara dainai taunimanima momo idia diba hebou do ia vara, unai dainai taunimanima 10,000 bona ma haida idia mai, to unai namba ita laloa neganai ita hoalaia badina unai neganai Australia dekenai Witnes taudia be 1,300 sibona.

Nega sisina murinai​​—⁠lau idia hadibaia lasi​​—⁠to haroro gaukara lau karaia bona unai be egu nega ginigunana. Emai grup be haroro gabunai idia ginidae neganai, grup ia gunalaia tadikaka ese lau ia hamaoroa, “Unai be oi ese do oi karaia rumana.” Hahine ese iduara ia kehoa neganai lau gari, lau nanadaia, “Mani emu kara, hora gauna oi sekea, bona lau oi hamaoroa nega be hida?” Ruma lalonai ia vareai, hora gauna ia sekea, bona ia giroa lou bona lau ia hadibaia. Unai ese egu vadivadi ia hadokoa. Motuka dekenai lau giroa lou.

To, unai gaukara lau hadokoa lasi, bona nega sisina murinai lau be hanaihanai ma haida ida Basileia sivaraina lau herevalaia. (Mataio 24:14) March 1939 ai, aiemai dekena hahine, Dorothy Hutchings, ena digu gauna lalonai bapatiso amo egu gwauhamata Iehova dekenai lau hamomokania. Tadikaka ta ia noho lasi dainai, lau bapatiso daudau lasi murinai, Keristani tadikaka idia naria kongregesen maduna lau abidia.

Nega momo ai be ta ena ruma dekenai hebou ai karaia, to nega ta ta pablik tok totona ruma badana ta ai rentaia. Betele, aiemai brens opesi amo, mai ena toana namona tadikaka ta be emai kongregesen maragina ta dekenai ia mai bona hereva ta ia henia. To lau diba lasi gauna be, ia mai be mai ena badina ma ta danu​​—⁠lau do ia dibaia namonamo totona. Oibe, unai dala amo Lloyd lau hedavari henia.

Lloyd Ena Famili Lau Hedavari Henidia

Nega sisina murinai, lau ura Iehova ena ful-taim hesiai gaukara lau karaia. To, painia gaukara (ful-taim haroro gaukara) lau karaia totona aplikeisen lau siaia neganai, lau idia noia bema lau ura Betele dekenai do lau gaukara. Unai dainai September 1939 ai, Tanobada Ibounai Tuarina Iharuana ia hamatamaia huana dekenai, Strathfield, Sydney ena kahana ta ai, ia noho Betele famili lalonai lau vareai.

December 1939 ai, hebouhebou totona New Zealand dekenai lau lao. Lloyd be New Zealand tauna dainai, ia be unuseniai ia lao danu. Bouti tamona dekenai ai laolao, bena ai diba heheni namonamo. Lloyd be dala ia karaia iena sinana bona tamana bona ena taihuna rua be Wellington ena hebouhebou dekenai bona gabeai edia ruma Christchurch dekenai do lau hedavari henidia.

Emai Gaukara Idia Taravatua

Saturday, January 18, 1941 ai, Commonwealth gavamani taudia be edia motuka koremadia 6 amo brens opesi dekenai idia mai, ena kohu idia abia totona. Unai neganai lau be Betele ena vareai gabuna ena naria rumana maragina dekenai lau gaukara noho, bona lau ese idia lau itaia guna. Hora 18 gunanai, ai idia hamaoroa vadaeni emai gaukara do idia taravatua, unai dainai kahirakahira buka bona faila ibounai be brens amo ai kokia. Murina purana ai, Betele famili taudia ima, bona Lloyd be idia ta, be dibura dekenai idia atoa.

Lau diba dibura dekenai idia noho tadikaka edia ura gauna badana be lauma aniani. Lloyd lau hagoadaia totona, egu lalona lau hadaia ia dekenai “lalokau revarevadia” do lau torea. Matamanai, unai bamona revareva ena hereva lau torea, to gabeai Gima Kohorona ena hereva ta lau torea hanai bena inai bamona lau sainia, iena lalokau. Hua hani mai kahana murinai, Lloyd idia ruhaia.

Ai Headava Bona Ai Gaukara Noho

Lagani 1940 ai, Lloyd ena sinana be Australia ia vadivadi henia, bona Lloyd ese ia hamaoroa ai laloa do ai headava. Ia hamaoroa do ia headava lasi be namo, badina inai nega ena dokona be kahirakahira. (Mataio 24:​3-14) Iena ura gauna be ena turadia dekenai danu ia gwauraia, to nega ta ta ai idia hamaoroa ia headava lasi be namo. Vadaeni, February ena dina ta 1942 ai, Lloyd ese lau​​—⁠bona emai palani do idia gwauraia lasi Witnes taudia hani​​—⁠be hehuni dalanai headava hamomokania opesina dekenai ai lao, bona ai headava. Unai neganai, Australia dekenai Iehova ena Witnes taudia ese gavamani ena gwaumaoro idia abia lasi headava idia hamomokania totona.

Ena be ai headava dainai Betele gaukara do ai karaia noho lasi, to ai idia noia bema ai ura spesel painia gaukara do ai karaia. Mai moale ida unai gaukara ai abia dae, bona taoni maragina ta, ladana Wagga Wagga, dekenai ai lao. Emai haroro gaukara idia do taravatua noho, bona moni dalanai heduru ai abia lasi, unai dainai emai laloa hekwarahi be Iehova dekenai ai henia.​​—⁠Salamo 55:⁠22.

Baisikele mai ena helai gaudia rua amo ai lao gunika, taunimanima namodia haida ai davaridia, bona idia danu ai hereva daudau. Idia momo ese Baibel stadi idia abia dae lasi. To, sitoa ia naria tauna ta ese ai karaia gaukarana ia laloa bada bona pura ta ta ai ia ese ai dekenai au huahua bona uma aniani ia henia. Wagga Wagga dekenai hua 6 ai noho murinai, ai idia boiria lou Betele dekenai.

May 1942 ai, Betele famili ese Strathfield ena opesi idia rakatania bona tadikaka edia ruma idauidau dekenai idia lao. Pura haida idia ore murinai, ruma ta amo idia lao ruma ma ta dekenai, gavamani taudia do idia davaria lasi totona. August ai, Lloyd bona lau be Betele dekenai ai giroa lou neganai, unai bamona ruma ta dekenai ai lao idia danu ai noho totona. Dina lalonai, emai gaukara be ai hunia printa gabuna dekenai ai gaukara. To June 1943 ai, emai gaukara dekenai idia atoa taravatu idia kokia.

Misinari Gaukara Totona Ai Hegaegae

April 1947 ai, ai be Watchtower Bible School of Gilead aplikeisen ai abia, unai gabu be South Lansing, New York, U.S.A., dekenai ia noho. Unai ai naria noho lalonai, aiemai gaukara be Australia dekenai kongregesen idauidau do ai vadivadi henia, lauma dalanai idia ai hagoadadia totona. Hua haida murinai, ai idia boiria Gilead ena klas namba 11 dekenai do ai vareai totona. Pura toi sibona idia noho emai gau haida do ai hamaoromaoroa bona emai kohu do ai haboua totona. December 1947 ai, emai bese bona turadia ai rakatania bona aiemai klas dekenai idia boiria Australia taudia ma 15 ida, New York dekenai ai lao.

Emai hua haida Gilead Sikuli dekenai idia ore haraga, bona emai misinari gaukara be Japan dekenai do ai karaia. Japan dekenai do ai lao totona, gwaumaoro pepadia idia hegaegaelaia, to unai idia karaia haraga diba lasi dainai, Lloyd be Iehova ena Witnes taudia edia loaloa naria gaukara ia karaia lou. Aiemai gaukara be Los Angeles siti amo ia diho lao Mexico ena hetoa dekenai idia noho kongregesen do ai vadivadi henia. Ai be motuka lasi, unai dainai pura ta ta ai, lalokau Witnes taudia ese edia motuka amo kongregesen ta ta dekenai ai idia abia lao. Guna ai karaia sekit badana lalonai, ena kahana be hari English gado distrik toi bona Spanish gado distrik toi ai idia haria, bona unai distrik ta ta lalonai, sekit 10 idia noho!

Karaharaga, October 1949 ia ginidae, bona ai be guna tuari taudia abia lao boutina amo Japan dekenai ai lao. Bouti ena kahana ta be tatau totona bona ena kahana ma ta be hahine bona natudia totona. Dina ta ia do noho ela bona Yokohama dekenai do ai ginidae neganai, lai gubana ia vara. Lai gubana ese ori ia kokia, bona murina dinana, October 31 ai, dina ia daekau neganai, Mount Fuji ena hairai ibounai ai itaia. Emai gaukara gabuna matamatana ese ai ia welkam henia bamona!

Japan Taudia ida Ai Gaukara

Bouti ena kamokau gabuna dekenai ai lao kahirakahira neganai, huina korema taudia handred momo ai itaia. Regerege bada ai kamonai neganai, ai laloa idia be ‘regerege bada taudia!’ Idia ibounai be au amo idia karaia tamaka idia atoa bona bouti idia mai gabudia be au amo idia karaia danu dainai, idia raka neganai regerege be bada. Yokohama dekenai, hanuaboi ta ai noho murinai, ai misinari taudia be trein dekenai ai guia bona emai misinari gaukara gabuna Kobe dekenai ai lao. Unuseniai Don Haslett, emai Gilead klas amo tauna, be hua haida gunanai Japan dekenai ia ginidae, bona misinari rumana ta ia rentaia. Unai ruma be mai ena hairai, ia bada, North America taudia edia ruma bamona, bona ia be sitori rua​​—⁠to ruma gauna ta be lasi!

Mahuta bedi ai abia totona, unai gabu ena tano dekenai idia vara ava latadia ai utua bona foloa latanai ai atoa. Unai amo emai misinari maurina ai hamatamaia, aiemai sutkeisi dekenai ai abia lao gaudia sibona idia noho. Ai be gida idia araia gaudia maragidia, edia ladana be hibachi, ai abia siahu do idia henia bona aniani do ai nadua totona. Hanuaboi ta ai, Lloyd be misinari taudia rua, Percy bona Ilma Iszlaub ia davaria, kwalahu dikana dainai idia maserea. Ia ese ia hanogaia totona uindo ia kehoa bona lai paraka namona idia abia. Nega ta lau danu be gida ia araia gauna lau gaukaralaia aniani lau nadua totona bona lau maserea. Gau haida be gabeai lau manadalaia.

Gado dibaia karana be gau ginigunana, bona hua ta lalonai Japan gado be dina ta lalonai hora 11 ai stadilaia. Unai murinai, haroro gaukara ai hamatamaia totona, sentens ta eiava rua be pepa dekenai ai torea. Egu haroro dinana ginigunana ai, lau ese Miyo Takagi, hahine namo hereana ta, lau hedavari henia, ia be mai hebogahisi ida lau ia abia dae. Lou henia lau karaia neganai, lau bona Miyo be Japan bona English gado diksenari ta ai gaukaralaia bona ai hekwarahi ela bona Baibel stadi namona ai hamatamaia. Lagani 1999 ai, Japan ena brens opesi idia habadaia bona ena hahelagaia hebouna lau lao henia neganai, Miyo bona lau stadi henia taudia namodia ma haida lau itaia lou. Lagani 50 idia ore vadaeni, to idia be Basileia harorolaia goadagoada taudia, edia goada hegeregerena Iehova idia hesiai henia noho.

April 1 1950 ai, Kobe dekenai taunimanima 180 bamona be emai Memorial, Keriso ena mase laloatao hebouna dekenai idia lao. Ai hoa bada, badina daba ai, taunimanima 35 be haroro gaukara idia karaia totona idia mai. Misinari ta ta be matamata taudia toi eiava hani idia abia idia haroro hebou totona. Ruma taudia be lau​​—⁠gado ia lalo-parara lasi idau bese hahine​​—⁠idia hereva henia lasi to lau idia bamoa taudia, Memorial dekenai idia lao Japan taudia, idia hereva henia. Idia herevahereva daudau, to dahaka idia herevalaia lau lalo-parara lasi. Lau moale badina unai matamata taudia haida be edia diba idia habadaia bona haroro gaukara idia karaia noho ema bona hari.

Hahenamo Bona Gaukara Momo

Kobe dekenai emai misinari gaukara ai karaia ela bona lagani 1952 ai, bena ai idia siaia lao Tokyo dekenai, unuseniai Lloyd be brens opesi naria gaukarana ia karaia. Gabeai, ena gaukara dainai, Japan ibounai lalonai bona tano ma haida dekenai ia lao. Gabeai, Nathan H. Knorr be hedikwota amo Tokyo ia vadivadi henia negana ta ai, lau ia hamaoroa: “Oi diba emu adavana ena murina soun vadivadi be edeseniai? Australia bona New Zealand.” Ma ia gwau: “Do oi lao diba danu, bema laolao ena davana oi henia.” Lau moale bada! Badina lagani 9 gunanai emai gabu ai rakatania.

Haraga herea emai bese be revareva amo ai hadibaia. Egu sinana ese moni amo lau ia durua tiketi lau abia totona. Lloyd bona lau be emai gaukara ai karaia goadagoada, bona ai be moni lasi emai famili do ai vadivadi henia totona. Unai dainai unai be emai guriguri ena haere. Oi laloa diba, Sinana be lau ia itaia neganai ia moale bada. Ia gwau, “To, lagani toi murinai do oi mai lou totona, lau ese egu moni do lau haboua.” Ia ai rakatania neganai unai lalohadai be emai lalona dekenai ia noho, to madi, July gabena lalonai ia mase. Lauegu ura be tanobada matamata dekenai ia do lau hedavari lou!

Misinari gaukara be egu gaukara tamona ela bona lagani 1960 ai, to revareva ta lau abia, ia gwau: “Hari dina amo, oiemu gaukara be Betele famili ibounai edia dabua do oi huria bona do oi aeania.” Unai neganai emai Betele famili be 12 bamona, unai dainai lau be Betele gaukara bona egu misinari gaukara danu lau karaia diba.

Lagani 1962 ai, emai Japan sitaelo rumana idia kokia, bona murina laganina ai Betele Rumana, mai ena sitori 6, be unai gabu dekenai idia haginia. Egu gaukara be Betele tadikaka matamatadia lau durua edia daiutu idia goeva bona sibodia edia gaudia idia atoa namonamo karana idia dibaia totona. Vaia, Japan dekenai, edia ruma ai memero dekenai unai gaudia idia hadibaia lasi. Idia laloa momo gauna be edukeisen bona edia sinana ese idia totona gau ibounai idia karaia. Karaharaga idia diba lau be edia sinana lasi. Gabeai, idia momo be orea lalonai maduna badadia matamatadia idia abia.

Siahu bada dinana ta ai, Baibel stiuden hahinena ta be brens ia vadivadi henia bona digu gabudia lau huria namonamo noho lalonai lau ia itaia. Ia gwau, “Mani emu kara, inai gaukara ia naria tauna oi hamaoroa hesiai kekenina ta do lau abia bona emu gaukara do ia karaia bona ena davana do lau henia.” Ia lau hamaoroa iena hebogahisi lau laloa bada, to Iehova ena orea lalonai lau abia gaukara ibounai be mai egu ura ida do lau karaia.

Unai neganai, Lloyd bona lau idia boiria, Gilead klas namba 39 dekenai do ai lao totona! Lagani 1964 ai, egu mauri lagani be 46 neganai, sikuli dekenai do lau giroa lou be hahenamo badana! Unai kosi idia henia ena badina badana be brens opesi dekenai idia gaukara taudia idia durua edia maduna do idia huaia namonamo totona. Hua 10 kosi ia ore murinai, Japan dekenai ai giroa lou. Unai nega ai, Basileia harorolaia taudia Japan dekenai be 3,000 mai kahana.

Lagani 1972 ai, unai tubu daekau haraga karana dainai unuseniai Witnes taudia be 14,000 mai kahana, bona Tokyo ena saut kahana, Numazu dekenai, sitori ima brens opesi idia haginia. Mount Fuji ena toana namona be Betele amo ai itaia diba. Hua ta lalonai, Japan gado magasin milion ta mai kahana be ia bada herea printa masini matamatana amo ai printaia. To nega daudau lasi murinai, gaukara idauna do ai abia.

Lagani 1974 ai, Lloyd be Iehova ena Witnes taudia edia hedikwota Brooklyn dekena amo revareva ta ia abia, idia noia Hakaua Oreana gaukarana do ia karaia. Matamanai lau laloa: ‘Ai ruaosi emai noho hebou negana ena dokona be inai. Lloyd be guba helaro ia abia bona lau be tanobada helarona lau abia, bona kahirakahira o gabeai ai ruaosi do ai parara. Reana Lloyd be ia sibona Brooklyn dekenai do ia lao be namo.’ To daudau lasi murinai unai lalohadai lau hamaoromaoroa bona March 1975 ai, mai egu ura ida Lloyd lau bamoa.

Hahenamo Hedikwota Ai

Ena be Brooklyn dekenai ia noho, to Lloyd be Japan ia laloa noho, bona ia be hanaihanai unai gabu dekenai ai abia ekspiriens ia herevalaia. To hari dala ia kehoa aiemai gaukara do ai habadaia totona. Lloyd ena mauri lagani ginigabedia 24 lalonai, soun gaukarana dekenai idia gaukaralaia momo, ena anina be tanobada ena tano momo dekenai do ia lao. Nega haida tanobada hegegemadai loaloana ia karaia neganai ia lau bamoa.

Iseda Keristani tadikaka tano ma haida dekenai vadivadi henia karana ese lau ia durua edia noho bona gaukara dalana lau laloa bada totona. Lau ese Africa ena not kahana dekenai mauri lagani 10 kekenina Entellia lau davaria, bona ena vairana toana do lau laloaboio lasi. Dirava ena ladana ia ura henia bona Keristani heboudia dekenai ia lao bona ia giroa lou totona, hora ta mai kahana do ia raka. Ena famili ese ia idia dagedage henia bada, to Entellia be Iehova dekenai ena mauri ia gwauhamatalaia. Ena kongregesen ai vadivadi henia neganai, hereva henia tauna ena pepa atai dekenai be golobu tamona, ena diari be maragi​​—⁠hebou gabuna be ia dibura. Unai dibura gabuna lalonai, tadikaka bona taihu edia ane abia karana namona ai kamonai henia bona ai hoalaia.

December 1998 ai, aiemai mauri lalonai ia vara gauna badana ta be Lloyd bona lau be Cuba dekenai “Dirava Ia Gwauraia Mauri Dalana” Distrik Hebouhebou idia lao henia taudia huanai ai noho diba. Tadikaka bona taihu be Brooklyn ena hedikwota amo haida ese idia vadivadi henia dainai, edia tanikiu bona moale idia hahedinaraia, bona edia kara ai laloa bada momokani! Mai boiboi goadana ida Iehova idia hanamoa taudia momo lau hedavari henia bona edia sivarai lau laloatao noho.

Egu Noho Gabuna be Dirava Ena Taunimanima Ida

Ena be egu gabu korikorina be Australia, to Iehova ena orea ese lau idia siaia gabudia dekenai idia noho taudia lau lalokau henia. Japan dekenai unai be momokani, bona hari United States dekenai lagani 25 bamona lau noho vadaeni, bona lau davaria iniseniai danu be Japan hegeregerena. Egu adavana ia mase neganai, lauegu lalohadai be Australia dekenai do lau giroa lou lasi, to Iehova ese lau ia atoa gabuna, Brooklyn Betele dekenai, do lau noho.

Hari egu mauri lagani be 80. Lagani 61 lalonai ful-taim hesiai gaukara lau karaia murinai, herevana edeseniai lau noho to lau ura Iehova do lau hesiai henia noho. Ia ese lau ia naria namonamo. Lagani 57 mai kahana lalonai, Iehova ia lalokau henia bamoa tauna namo hereana ta ida lau noho diba. Lau diba momokani Iehova ese ai do ia hanamoa noho, bona lau diba Ia ese emai gaukara bona ena ladana dekenai ai hahedinaraia lalokauna do ia laloaboio lasi.​​—⁠Heberu 6:⁠10.

[Footnote]

[Picture on page 25]

Lagani 1956 ai, lau bona egu sinana

[Picture on page 26]

Lagani 1950 murinai, lau, Lloyd, bona Japan pablisa taudia

[Pictures on page 26]

Lagani 1950 bena lagani 1999 ai, Japan dekenai lau davaria Baibel stiuden ginigunana, Miyo Takagi, ida lau noho

[Picture on page 28]

Japan dekenai, lau bona Lloyd be magasin gaukara ai karaia