2000—Lagani Badana, A?
LAGANI 2000 be mai anina bada laganina, a? West tanodia dekenai idia noho taudia idia laloa ia be lagani tausen ihatoina ena matamana. Unai lagani moalelaia totona gau momo idia hegaegaelaia. Elektronik dina gaudia badadia idia atoa, sekeni ta ta do idia duahia ela bona lagani tausen ma ta ena dina ginigunana. Lagani Matamata Dinana moalelaia totona pati badadia idia hegaegaelaia. Lagani tausen ta ena dokona idia herevalaia T-siedi mai edia laulau be taoni ena sitoa maragidia bona siti ena hoihoi rumadia dekenai idia hoihoilaia.
Dubu, badadia bona maragidia, be unai lagani lalonai idia karaia moale karadia dekenai do idia vareai. Lagani vaira ena matamana kahanai, Pope John Paul Iharuana be Israel do ia vadivadi henia, idia gwauraia “Roman Katolik Oreana ena lagani tausen iubili negana moalelaia negana lalonai” Roman Katolik taudia hakaua totona. Idia gwau, vadivadi taudia milioni rua mai kahana ia lao milioni 6, tomadiho idia laloa bada taudia bona unai gauna idia ura itaia taudia, be palani idia karaia lagani vaira lalonai Israel idia lao totona.
Dahaka dainai taunimanima momo be palani idia karaia Israel idia lao henia totona? Pope ena hereva ia gwauraia Vatican Tauna Roger Cardinal Etchegaray, ia gwau: “Lagani 2000 be Keriso bona ena mauri unai tano dekenai moalelaia laganina. Unai dainai, ita hoa lasi, Pope ese unai gabu ia vadivadi henia be maoro.” Edena dala ai Keriso be mai anina lagani 2000 lalonai? Taunimanima idia laloa lagani 2000 Keriso ena vara amo be lagani 2,000 ia ore. To, unai be momokani, a? Unai be do ita itaia.
Tomadiho haida edia taunimanima dekenai lagani 2000 be mai anina bada laganina. Idia laloa lagani vaira eiava vairadia ai, Iesu be do ia giroa lou Olive Ororona dekenai bona Aramagedono tuarina, Apokalupo bukana ese ia gwauraia tuarina, be Megido ena koura dekenai do ia havaraia. (Apokalupo 16:14-16) Unai nega idia naria noho dainai, United States dekenai idia noho taudia handred momo be edia ruma bona edia kohu momo idia hoihoilaia bona Israel dekenai idia lao. Sivarai ta ese ia hahedinaraia, United States ena haroro tauna badana ta ia gwauhamata Iesu ena lou mai sivarai be televisen dekenai do ia halasia—mai kala danu—edia ruma idia rakatania diba lasi taudia totona!
West tanodia dekenai, lagani tausen ihatoina dainai idia karaia palani be idia bada idia lao. To, tano ma haida dekenai, taunimanima be dina ta ta maurina idia noholaia sibona. Unai taudia—kahirakahira tanobada taudia ibounai—idia abia dae lasi Nasareta tauna Iesu be Mesia. Bona reana idia ese B.C. ia lao A.D. nega duahia dalana idia abia dae lasi.a Hegeregere, Muslim taudia momo be sibona edia kalenda idia badinaia dainai, idia dekenai lagani vaira be lagani 1420—lagani 2000 lasi. Muslim taudia be peroveta tauna Muḥammad ese Mecca ia rakatania bona Medina ia heau lao ena nega amo edia lagani idia duahia matamaia. Oibe, tanobada taudia ibounai be kalenda idauidau 40 bamona idia gaukaralaia.
Lagani 2000 be mai anina Keristani taudia dekenai, a? Momokani January 1, 2000, be mai anina bada dinana, a? Hereva gabena ese unai henanadai do ia haerelaia.
[Footnote]
a B.C. ia lao A.D. nega duahia karana dekenai, Iesu ia do vara lasi negana lalonai idia vara gaudia dekenai inai maka “B.C.” (before Christ) idia atoa; unai murinai idia vara gaudia dekenai inai maka “A.D.” (Anno Domini—“iseda Lohiabada ena lagani ai.”) To, diba bada taudia haida idia ura tomadiho lasi gaudia ia gwauraia “B.C.E.” (before our Common Era) bona “C.E.” (of our Common Era) idia gaukaralaia.