Dika Gabuna Dekenai Oi Noho Lasi!
LAHI ororo idia stadilaia taudia edia gaukara be gau idauidau idia tahua namonamo bona lahi ororona ena toana idia hahedinaraia gaudia idia laloa namonamo, bena do ia pou ena hadibaia herevana idia gwauraia. (Fugen Ororona ia pou murinai, pulisi ese taunimanima idia koua, dika gabuna dekenai idia vareai lasi totona.) Unai hegeregerena, Baibel tahua taudia ese “tanobada dokona” ena toa idia tahua bona ma haida idia hadibaia unai dika gauna ia vara gwauraia.—Mataio 24:3.
Tanobada ibounai lalonai do ia vara dika badana ia herevalaia Baibel bukana ena karoa tamona lalonai, ita ese unai dika vairanai idia vara gaudia idauidau ita duahia diba: “Bese ta ese do ia toreisi, bese ta do ia tuari henia. Bona basileia ta ese do ia toreisi, basileia ta do ia tuari henia. Gabu idauidau dekenai hitolo bada do ia vara, tano danu do ia mareremarere. . . . Peroveta koikoi taudia momo danu do idia toreisi, taunimanima momo do idia hakaua kerere. Kara dikadia danu do idia vara gabu idauidau dekenai, vadaeni taunimanima momo edia lalokau be do ia keru. . . . Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.”—Mataio 24:7-14.
Ita itaia unai peroveta herevadia idia guguru ena be ita be niusi tahua namonamo taudia lasi. Lagani 1914 amo, ita ese unai ibounai ita itaia namonamo. Lagani 1900 murinai ema bona hari, ita ese tanobada ibounai lalonai tuari badadia rua, bese tamona taudia idia tuari heheni karadia momo, gabu tamona tuaridia, bona bese o tomadiho dainai ia vara tuaridia ita itaia. Unai bamona tuari dainai taunimanima be aniani dekenai idia hegeregere lasi, bona idia vara kava dika idauidau dainai taunimanima idia dabu tauanina durua gaudia dekenai. Taunimanima momo be tano mareremarere dainai idia mase. Tomadiho orea idaudia mai edia gunalaia koikoi taudia bona edia murinai idia raka goadagoada taudia idia hedinarai. ‘Kara dikadia be gabu idauidau dekenai idia vara’ dainai taunimanima be lalokau idia hahedinaraia lasi, bona hari taunimanima ese dekena tauna be guna bamona idia kara henia lasi.
Toa ena kahana ma ta, tanobada ibounai haroro gaukarana, ia guguru noho. Inai magasin ena rau ginigunana oi kehoa bona do oi itaia inai hereva “Iehova Ena Basileia Ia Harorolaia” be hereva kwarana ena kahana ta. Gima Kohorona, gado 132 dekenai idia halasia bona ena kopi milioni 22 ia hanaia idia karaia, be tulu badana ta tanobada ibounai dekenai “basileia ena sivarai namona” idia gwauraia taudia dekenai. Unai sivarai namona be guba bona tanobada ia Havaraia Tauna, Iehova Dirava, ese guba Basileia ia haginia vadaeni inai nega dikana do ia haorea bona tanobada dekenai paradaiso do ia mailaia totona. Momokani, kahirakahira Dirava ese kara ta do ia karaia ena toana be hari ita itaia diba, ia hahedinaraia inai nega dikana lalonai idia noho taudia be dika idia davaria gwauraia.—Mani 2 Timoteo 3:1-5; 2 Petero 3:3, 4; Apokalupo 6:1-8 itaia.
Iehova Ena Dina mai Garina
Iehova ena hahemaoro negana ia ginidae neganai dahaka do ia vara? Ia sibona ese ia gwauraia hedinarai goevagoeva do ia vara gauna oi kamonai henia: “Lau ese unai dina do ia mai ena toadia, be guba bona tanobada dekenai do lau atoa. . . . Taunimanima momo edia rarana do ia bubua. Lahi bona kwalahu bada danu, be tanobada dekenai do idia vara. Dina be do ia dibura, bona hua be do ia kakakaka lao, rara ena toana bamona. Bema inai bamona toa umui itaia neganai, do umui diba Lohiabada ena dina be kahirakahira. Unai dina badana dekenai, taunimanima ibounai do idia gari bada herea.”—Ioela 2:30, 31.
Unai dina, gari bona dika bada herea dinana, ia pou lahi ororona o tano mareremarere edia dika ia hanaia gauna, be kahirakahira do ia ginidae. Peroveta tauna Sepanaia ia gwau: “Lohiabada ena dina badana be ia kahirakahira vadaeni inai. Ia be ia mai noho haraga. . . . Iena badu siahuna ena lahi ese, tanobada ena kahana ibounai do ia gabua ore. Ia ese tanobada dekenai noho taudia ibounai, be do ia hadikaia ore haraga. Ia ese idia do ia haorea momokani.” Ena be Iehova ena badu dinana ai “edia siliva o edia golo ese do idia hamauridia diba lasi,” to unai dina mai garina amo roho mauri dalana be ia noho.—Sepanaia 1:14-18.
Unai dala hahedinaraia totona, Sepanaia ia gwau: ‘Iehova ena badu ena siahu be, emui latanai do ia diho lasi neganai, Iehova ena badu dinana be umui dekenai ia do ginidae lasi neganai, umui manau taudia ibounai e, Iehova do umui tahua. Kara maoromaoro umui karaia, bona umui manau. Unai neganai sedira iena badu dinana dekenai, Iehova ese umui do ia naria.’ (Sepanaia 2:2, 3) Ita roho mauri diba bema Iehova ita tahua, kara maoromaoro ita tahua, bona manau ita tahua. Daidia be hari inai negai Iehova idia tahua?
Iehova ena Witnes taudia edia haroro gaukarana dainai ai diba oi ese inai ladana “Iehova” oi kamonai neganai idia oi laloa. Reana inai magasin be idia ta amo oi abia. Taunimanima idia diba idia be kara goeva taudia bona mauri dala maorona idia badinaia. Idia hekwarahi noho “mauri matamata” idia atoa totona, anina be manau karana idia hahedinaraia danu. (Kolose 3:8-10) Idia gwau, unai ia vara ena badina be Iehova ena tanobada oreana ese idia ia hadibaia dainai, bona tanobada ena kahana ibounai dekenai Iehova ena Witnes taudia edia kongregesen ese unai gaukara idia karaia. Oibe, ‘tanobada ena kahana ibounai dekenai ia noho Keristani oreana’ dekenai oi heau mauri diba.—1 Petero 5:9.
Hari Oi Heau Mauri
Iehova tahua karana amo ita heau mauri totona, namona be iena turadia ai ita lao. Unai ena anina be dahaka? Baibel ia haere: “Umui diba lasi, a, bema umui ura tanobada danu umui turana karaia neganai, inai be umui ese Dirava umui tuari henia noho?” (Iamesi 4:4) Dirava ena turadia ai ita lao totona, namona be inai tanobada dikana ura henia karana ita dadaraia, ia be Dirava gwau-edeede henia lalohadaina ia hahedinaraia.
Baibel ese ita ia sisiba henia: “Tanobada do umui ura henia lasi, bona tanobada ena gaudia danu do umui ura henia lasi. Bema tanobada umui ura henia noho neganai, Tamana Dirava umui ura henia lasi inai. Badina be tanobada gaudia ibounai, tauanina ena ura dikadia, matabodaga ena ura dikadia, bona hekokoroku, inai gaudia be Tamana Dirava dekena amo idia mai lasi. Idia be tanobada dekena amo idia mai noho. Tanobada, mai ena gau dikadia, taunimanima idia ura dikadika gaudia, be kahirakahira do idia ore. To Dirava ena ura ia karaia noho tauna be do ia noho ela bona hanaihanai.” (1 Ioane 2:15-17) Hari inai negai taunimanima momo be tauanina ena ura ese idia doridia—mahuta hebou urana idia biagua lasi, moni idia ura henia bada, bona siahu idia gaukaralaia kerere. To ta be Iehova ena kahana dekenai ia gini totona, unai ura ia dadaraia be namo.—Kolose 3:5-8.
Reana oi ese nega ta ta inai magasin oi duahia, bona reana ena lalohadai Baibel peroveta herevadia dekenai oi abia dae. To, reana oi ura lasi ma kara haida oi karaia Iehova ena Witnes taudia oi bamoa totona. To bema ita vairanai dika ta ia vara gwauraia, hadibaia herevana ita kamonai sibona be hegeregere, a? Fugen Ororona ia pou bona ia dainai idia vara gaudia amo ita diba, namona be hadibaia herevana dainai kara ta ita karaia. Mani oi laloatao, niusi ripotilaia taudia bona laulau abia taudia 15 be diba idia ura abia dainai edia mauri idia haboioa. Momokani, laulau abia tauna ta be ena kamera ena gigia gauna ia dogoatao noho lalonai ia mase. Lahi ororo stadilaia tauna ta—guna ia gwau, “Bema dina ta do lau mase, lau ura unai lahi ororo ataiai lau mase”—be ena ura hegeregerena ena mauri ia haboioa. Idia ibounai be edia gaukara bona edia ura gaudia idia laloa bada. To, edia mauri idia haboioa—hadibaia herevana idia badinaia lasi ena davana unai.
Hari inai negai taunimanima momo ese Dirava ena lalohadai inai nega dikana do ia haorea be idia kamonai bona unai hereva ena anina idia lalo-pararalaia sisina. Reana idia laloa, ‘gabeai do ia mai, to hari lasi.’ Iehova ena dina be gabeai negana ta ai idia atoa unai amo harihari idia ese idia laloa bada gaudia be idia karaia noho diba.
Baruku be unai hekwakwanai tamona ia davaria. Baruku be idaunegai peroveta tauna Ieremia ena toretore tauna dainai, mai gari lasi ida Israela taudia dekenai Ierusalema be kahirakahira dika do ia davaria herevana ia gwauraia. To, nega ta ena gaukara dekenai ia hesiku. Ena kerere dainai, Iehova ese ia hamaoroa: “Oi ese gau namo herea, oi sibona totona, oi tahua noho, a? Lau Lohiabada lau gwau: Inai bamona tahua kara do oi karaia lasi.” Reana ia be kohu, ladana bada, eiava tauanina dalanai noho namona ia tahua, to namona be Baruku ese ‘sibona totona gau namo herea ia tahua lasi.’ Ia be gau tamona sibona ia laloa bada be namo, Dirava ena ura hegeregerena taunimanima ia durudia Iena kahana dekenai idia gini totona. Unai dainai, ia “mauri” diba. (Ieremia 45:1-5) Unai hegeregerena, ita ese ‘sibona totona gau namo hereadia ita tahua lasi,’ to namona be Iehova ita tahua, unai amo do ita mauri diba.
Fugen Ororona ai, pulisi taudia 12 bona ma haida bona volantia lahi habodoa taudia be idia do gaukara noho lalonai unai siahu momokani lahi ororona ese idia ia hadikaia. Idia ura heduru idia henia toho bona dika idia davaria gwauraia taudia idia durua. Idia be namo sibona idia ura havaraia tatau bona hahine bamona, edia nega bada idia henia inai tanobada ena noho hanamoa totona. Ena be edia ura be namo herea, to “gau ta ia gagevagageva neganai, oi hamaoromaoroa diba lasi.” (Hadibaia Tauna 1:15) Inai nega ena oromana gagevana ita hamaoromaoroa diba lasi. Dirava ese do ia haorea momokani tanobada oromana ita hanamoa toho karana amo inai ‘tanobada ena turana’ ai ita lao be aonega karana, a?
Oi Heau Siri Murinai, Oi Gini Siri
Dika ia davaria gwauraia oromana dikana amo ita heau siri be gau ta, to “Keristani taudia ibounai” edia orea namona lalonai ita noho be ma gau ta. (1 Petero 2:17) Namona be edia gabu idia rakatania murinai, idia giroa lou edia uma be Fugen Ororona badinai idia itaia biru taudia ita laloatao. Reana, idia ura bada do idia giroa lou “vaia” guna idia noholaia maurina hegeregerena do idia noho. To oi itaia idia giroa lou be aonega karana lasi. Reana unai be dika gabuna idia vareai toho negana ginigunana lasi. Reana nega sisina lalonai unai dika gabuna dekenai idia noho bona gau ta ia vara lasi. Ma nega ta, reana nega sisina daudau idia noho, bona unai neganai danu be gau ta ia vara lasi. Toana be, daudau lasi murinai idia ese idia ia naria gabu namona idia rakatania karana idia manadalaia bona unai dika gabuna dekenai nega sisina daudau idia noho.
Iesu Keriso ia gwau unai bamona gauna be “tanobada dokona” dekenai do ia vara. Ia gwau: “Badina be unai neganai, abata badana do ia ginidae lasi neganai, idia aniani noho, idia inuinu noho, idia headava noho, ia mai bona Noa be lagatoi dekenai ia guia dinana. Taunimanima ese idia laloa lasi dahaka do ia vara, idia kara dika noho, ia mai bona abata badana ia ginidae, vadaeni abata ranu ese ibounai ia abia lao. Taunimanima ena Natuna do ia mai neganai danu unai bamona do ia vara.”—Mataio 24:3, 38, 39.
Mani oi laloa Iesu ia gwau idia aniani, idia inuinu, bona idia headava. Iehova ena matana ai unai gaudia ta ia kerere lasi. To kerere gauna be dahaka? Noa ena negai idia noho taudia be “idia laloa lasi,” edia mauri lalonai idia karaia hanaihanai gaudia sibona idia laloa. Dika negana lalonai, ta ese “vaia” ia noholaia mauri dalana hegeregerena do ia noho diba lasi. Dika do ia davaria tanobadana amo oi heau siri, eiava ia amo oi parara murinai, do oi giroa lou bona ia amo gau haida do oi abia urana oi tuari henia be namo. (1 Korinto 7:31) Reana oi be lauma dalanai noho gabuna namona murimurinai oi loaloa bona oi giroa lou be dika ta oi davaria lasi bona ta ese oi ia itaia lasi. To, toana be unai ese oi do ia hagoadaia bona ia hakaua tanobada dekenai ma oi giroa lou, unuseniai nega sisina daudau do oi noho totona. Daudau lasi murinai inai lalohadai ia vara diba: “Dokona be hari do ia mai lasi.”
Danu, niusi gwauraia taudia bona laulau karaia taudia idia naria noho lalonai, lahi ororona amo idia aru diho gaudia ese ia hamasea takisi taria taudia toi oi laloa. Hari inai negai haida be tanobada dekenai idia giroa lou taudia idia bamoa. Herevana edia badina be dahaka, to ia hedinarai goevagoeva ita idia veria dainai dika gabuna dekenai ita giroa lao be aonega karana lasi.
Fugen Ororona ia pou bona idia mase taudia ibounai be dika idia davaria lasi gabuna idia rakatania bona dika gabuna dekenai idia vareai. Ena be idia diba ororo be dina ta ai do ia pou, to idia ta ia laloa lasi unai dina dekenai do ia pou. Tanobada dokona ena toana idia itaia dainai, taunimanima momo idia diba Iehova ena dina be nega ta ai do ia mai to idia laloa ia be kahirakahira lasi. Haida idia laloa unai dina be “hari dina” lasi. Unai bamona lalohadai be dika ia havaraia diba.
Aposetolo Paulo ia sisiba ‘Iehova ena dina be henaoa tauna bamona do ia ginidae.’ Namona be ita gima, ‘Iehova ena dina ita naria noho, bona do ia ginidae haraga totona ita gaukara goada noho, mai goevagoeva bona kerere lasi, bona maino danu Dirava ena vairanai do ita noho.’ (2 Petero 3:10-14) Dirava ese inai tanobada dikana ia haorea murinai, Dirava ena Basileia henunai tanobada paradaisona do ia vara. Herevana iseda lalona dekenai dahaka badina ese ita ia veria dika gabuna dekenai ita lao totona, to namona be ita lao lasi, badina reana tanobada dekenai ita giroa lou dinana be Iehova ena dina.
Iehova ena Witnes taudia ida oi heau mauri bona idia ida oi noho.
[Pictures on page 7]
Iehova ena Witnes taudia ida oi heau mauri bona idia ida oi noho
[Picture Credit Line on page 4]
Iwasa/Sipa Press