Edia Tauanina be Maragi, Edia Hebogahisi be Bada

BEMA oiemu lata be sentimita 76 sibona, oi diba lasi taudia dekenai Dirava ena Basileia oi harorolaia be edena bamona? Laura ese oi ia hamaoroa diba. Iena mauri lagani be 33 bona unai be iena lata, sentimita 76 sibona. Ia bona ena tadina kekenina, María, ena mauri lagani be 24 bona ena lata be sentimita 86, be Quito, Ecuador dekenai idia noho. Mani edia Keristani hesiai gaukara lalonai idia davaria hekwakwanai be ita dekenai idia gwauraia.

“Ai be emai haroro teritori bona Keristani heboudia dekenai ai lao totona, kilomita kahana ta bamona ai raka lao bena basi ta ai abia. Basi ese ai ia atoa gabuna amo, ma kilomita kahana ta bamona ai raka basi iharuana ai abia totona. To madi, unai raka gabuna dekenai be sisia dikadia ima idia noho. Sisia ai gari henidia badina ai dekenai edia bada be hosi edia bada bamona. Idia ai lulua totona, ai ese au ta ai abia lao, bona basi ai do abia lasi neganai unai au ai hunia unai amo ruma dekenai ai giroa lou neganai do ai gaukaralaia lou diba.

“Basi dekenai ai daekau be hekwarahi gauna ta. Basi naria gabuna dekenai ai be ororo maragina ta latanai ai gini bena basi dekenai ai guia. Basi taria taudia haida be unai ororo maragina badinai idia stopu, to haida be lasi. Unai neganai, ai ruaosi amo latana ese kwadogina ia durua ai daekau totona. Basi iharuana ai abia totona, ai ese ia bisi motuka dalana ai hanaia​—⁠emai aena maragidia amo ai hanaia be mai ena hekwarahi. Aiemai tauanina ia maragi dainai, baege mai ena buka ena metau be hekwarahi gauna. Unai baege ia metau lasi totona, ai ese Baibel maragina ai abia bona buka bona magasin haida sibona ai abia.

“Ai maragi negana amo, ai ruaosi be taunimanima vairanai ai hedinarai nega momo lasi. Aiemai dekena taudia idia diba ai diba lasi taudia ai hereva henidia neganai ai gari. Unai dainai ai idia itaia edia iduara dekenai ai pidipidi neganai idia hoa, bona nega momo idia kamonai. To, ai idia diba namonamo lasi gabudia dekenai, nega momo taunimanima idia laloa ai be taunimanima maragidia sibona, unai dainai, nega haida ai idia laloa bada lasi ena be ai abia lao herevana idia kamonai be gau badana. To, Iehova ena lalokau ai laloa ese ai ia hagoadaia sivarai namona harorolaia gaukarana ai karaia noho totona. Danu, Aonega Herevadia 3:​5, 6 ai laloa dobu ese ai ia hagoadaia.”

Laura bona María edia haheitalai ese ia hahedinaraia bamona, herevana tauanina idia hametaua gaudia idia noho to bema ita hesiku lasi, Dirava do ita hanamoa diba. Aposetolo Paulo be Dirava ia guriguri ena “ginigini ta,” reana tauanina ena dika ta, be ia amo do ia kokia. To Dirava ese ia hamaoroa: “Lauegu hariharibada be oi dekenai ia hegeregere momokani vadaeni. Badina be lauegu siahu be manokamanoka tauna lalonai ia hedinarai momokani.” Oibe, Dirava ita hesiai henia diba totona tauanina ena dika ta do ia kokia be anina lasi. Dirava dekenai tabekau momokani karana ese ita do ia durua iseda noho dalana hegeregerena do ita gaukara goada totona. Paulo ese ena “ginigini” tauanina dekenai be unai bamona ia laloa dainai, ia gwau diba: “Lau manoka neganai, unai be Dirava ena goada lau abia.” (2 Korinto 12:​7, 9, 10) Lagani haida murinai Paulo ia gwau: “Keriso ese lau ia hasiahua, vadaeni gau ibounai lau goadalaia diba.”​—⁠Filipi 4:⁠13.

Hari inai nega lalonai, Dirava ese ia idia abidadama henia tatau, hahine, bona natudia amo gaukara badana ta ia hagugurua noho. Dala idauidau ai idia momo edia tauanina idia dika. Ena be idia ibounai edia helaro be Dirava ena Basileia henunai edia gorere do ia hanamoa, to idia naria lasi Dirava ese edia hekwakwanai ia haorea guna bena gabeai iena hesiai gaukara lalonai gau ta idia karaia.

Tauanina hamanokaia gaudia haida dainai oi hisihisi noho, a? Oi lalo-goada! Emu abidadama dainai oi be Paulo, Laura, bona María hegeregerena do oi karaia diba. Idia ita gwauraia diba, idaunegai abidadama tatau bona hahine ita gwauraia bamona: “Edia manokamanoka idia negea, goada idia abia.”​—⁠Heberu 11:⁠34.

[Pictures on page 8]

María

Laura

[Picture on page 9]

María ese Laura ia durua basi dekenai ia daekau totona

[Pictures on page 9]

“Sisia ai gari henidia badina ai dekenai edia bada be hosi edia bada bamona”

Henunai: Laura bona María bona idia ida Baibel idia stadilaia taudia