Inai Oi Laloatao, A?

Vanegai idia halasia Gima Kohorona magasin edia hereva be mai moale ida oi duahia, a? Vadaeni, mani oi tohoa bema inai henanadai oi haerelaia diba:

• Ta ida hepapahuahu ita hamaoromaoroa totona, dahaka be gau badana?

Gau ginigunana be ita lalo-parara ita ibounai be lalohadai bona kara kereredia ita badinaia diba. Namona be ita tahua namonamo bema ita be unai kerere ena badina to tau ma ta lasi.​​—⁠8/15, rau 23.

• Kara 3:​21 ese ia gwauraia ‘gau ibounai karaia matamata negadia’ be edena negai do idia vara?

Hanamoa lou negana be mai ena kahana rua. Kahana ginigunana be, lagani 1919 amo ema bona hari Iehova ese lauma paradaisona ia hanamoa lou. Hanamoa lou negana iharuana do ia vara paradaiso be tanobada ai do ia haginia lou neganai.​​—⁠9/1, rau 17, 18.

• Aonega Herevadia 6:​6-8 ena hereva hegeregerena, dimairi be mai edia biaguna lasi, to edena dala ai idia be haheitalai namona ita dekenai?

Dimairi oreana ta lalonai, dimairi edia kwini ia noho, to iena gaukara tamona sibona be gatoi ia havaraia bona ia be unai dimairi oreana ena sinana. Namona be dimairi bamona ita gaukara goadagoada, bona ita hekwarahi iseda gaukara ita hanamoa totona, ena be ta ese iseda gaukara ena namo ia tahua lasi.​​—⁠9/15, rau 26.

• Iosaia be tuari lalonai ia mase dainai, Hulida ena peroveta herevana Iosaia be “mai maino” danu do ia mase herevana, King Taudia Iharuana 22:20 dekenai, be ia maoro, a?

Oibe, maino ai ia mase ena anina be ia mase guna bena gabeai lagani 609-​607 B.C.E. ai dika do ia vara, unai neganai Babulonia ese Ierusalema ia koua hegege bona ia hadikaia ore.​​—⁠9/15, rau 30.

• Solomona ese headava hahine ia gwauraia “oi ura henia dia hahinena bona oi moale henia ororo nanigosi,” edena bamona unai be hereva namona? (Aonega Herevadia 5:​18, 19)

Ororo nanigosi hahinena ena tauanina be manada bona ena toana be mai hairaina. To, nadi gabudiai, taunimanima idia lao diba lasi bona aniani be bada lasi gabudia dekenai, ia mauri diba bona natudia ia havaraia.​​—⁠10/1, rau 30, 31.

• Henry Grew bona George Storrs be daidia?

Unai tatau rua be lagani 1800 murinai idia noho bona idia be Bible Student taudia goadadia. Grew ia diba Toi Tamona, mase diba lasi soulina, bona hel ena lahi hahediba herevadia be Baibel amo idia mai lasi. Storrs ia lalo-parara haida be tanobada dekenai mauri hanaihanai do idia abia. Idia ruaosi be Charles Taze Russel ese lagani 1879 ai inai magasin ia halasia matamaia vairanai idia gaukara.​​—⁠10/15, rau 26-​30.

• Sibona edia rara medikol daladia ai idia gaukaralaia karana be Iehova ena Witnes taudia ese edena bamona idia laloa?

Idia abia dae gaudia be Baibel amo dainai, sibodia edia rara idia haboua lasi bona gabeai rara idia henia hanai neganai idia abia dae lasi. Keristani ta ta ese opereisen ta, medikol tohoa karana ta, eiava gorere hanamoa dalana ta idia karaia lalonai, iena rara do idia gaukaralaia dalana do ia abia hidi. Baibel ese dahaka ia gwauraia rara dekenai ia laloa namonamo bona namona be ia laloatao ena mauri ibounai be Dirava dekenai ia gwauhamatalaia.​​—⁠10/15, rau 30, 31.

• Inai lagani matamanai, tahua karana ta ese ia hahedinaraia, Iehova ena Witnes taudia tanobada hegegemadai lalonai ese dahaka mai anina bada gauna idia ura abia?

Moni be hegeregere lasi ogogami tanodia dekenai, idia ura Kingdom Hall 11,000 idia haginia. Tano momo ai, Keristani taudia ese kontribusen monina idia henia unai hebou gabudia idia haginidia totona.​​—⁠11/1, rau 30.

• Baibel idia torea gadodia ai, edena hereva haida idia gaukaralaia tomadiho karana herevalaia totona?

Hereva ta be lei·tour·giʹa, idia hahanaia “taunimanima durua gaukarana.” Ma ta be la·treiʹa idia hahanaia “hesiai gaukarana helagana.” (Heberu 10:11; Luka 2:​36, 37)​​—⁠11/15, rau 11, 12.

• Adamu bona Heva edia Baibel sivaraina amo dahaka mai anina bada gauna ita dibaia?

Iehova amo ta ia siri bona sibona ia naria toho be kavakava karana.​​—⁠11/15, rau 24-​7.

• Edena Baibel herevadia ese idia hamomokania Dirava ese ena hesiai taudia ia hasiahudia?

Davida, Habakuku bona aposetolo Paulo ese idia hahedinaraia Iehova ese idia ia hasiahudia. (Salamo 60:12; Habakuku 3:​19; Filipo 4:​13) Unai dainai, ita diba momokani Dirava ia ura bona ia hegeregere ita do ia hagoadaia totona.​​—⁠12/1, rau 10, 11.