Lauma Helaga Ena Hereva Do Oi Kamonai
“Bema idiba kahanai o lauri kahanai do umui raka siri neganai, emui Hadibaia Tauna ena gadona do umui kamonai, do ia gwau, ‘Dala be inai, ia dekenai do umui raka lao.’ ”—ISAIA 30:21.
1, 2. Gunaguna amo ema bona hari, Iehova be edena dala ai taunimanima ia hereva henia?
PUERTO RICO motumotuna dekenai be tanobada ena reidio teleskoup badana ia noho ia be mai ena disi tamona bona daudau amo regerege ia kamonai diba. Lagani momo herea lalonai, saiens taudia edia ura be unai gauna badana amo speis taudia idaudia ese idia siaia hereva do idia kamonai. To unai bamona hereva ta idia do kamonai lasi. To, ita ibounai be taunimanima idia noholaia lasi gabuna amo hereva goevagoevadia ita kamonai diba—bona ita kamonai totona reidio teleskoup be anina lasi. Unai hereva ia siaia Tauna ese taunimanima edia lalohadai kava hegeregerena idia laloa speis taudia idaudia ia hereaia momokani. Unai bamona hereva ia siaia Tauna be daika, bona daidia ese unai hereva idia abia? Unai hereva ese dahaka ia hahedinaraia?
2 Baibel ena sivarai lalonai nega momo taunimanima be Dirava ese ia siaia herevadia idia kamonai. Nega haida Dirava ena gwaukau gaukarana idia karaia lauma taudia ese idia hahedinaraia. (Genese 22:11, 15; Sekaraia 4:4, 5; Luka 1:26-28) Nega toi, Iehova ena gado regena idia kamonai. (Mataio 3:17; 17:5; Ioane 12:28, 29) Dirava be peroveta taudia amo ia hereva danu, bona idia momo ese Iena siahu amo idia gwauraia herevadia idia torea. Hari inai negai, ita be Baibel ita abia, ia lalonai unai hereva momo bona Iesu bona ena hahediba taudia ese idia hadibaia gaudia danu idia noho. (Heberu 1:1, 2) Momokani, Iehova ese ia havaraia taudia dekenai diba ia henia.
3. Dahaka dainai Dirava ese ena hereva ia siaia, bona dahaka ita karaia be namo?
3 Unai hereva, Dirava ena lauma amo ia vara herevadia ibounai, ese ita itaia diba gaudia idia herevalaia momo lasi. Idia ese mai anina bada gaudia idia herevalaia, hari inai negai bona vaira neganai iseda mauri dekenai mai anina bada gaudia unai. (Salamo 19:7-11; 1 Timoteo 4:8) Iehova ese unai hereva ia gaukaralaia ena ura ia halasia bona ita ia hakaua totona. Idia be peroveta tauna Isaia ena hereva ia guguru dalana ta, ia gwau: “Bema idiba kahanai o lauri kahanai do umui raka siri neganai, emui Hadibaia Tauna ena gadona do umui kamonai, do ia gwau, ‘Dala be inai, ia dekenai do umui raka lao.’ ” (Isaia 30:21) Iehova ese ita ia doria lasi ena “hereva” ita kamonai henia totona. Dirava ena hakaua herevana ita badinaia bona ena dala dekenai ita raka be ita sibona do ita abia hidi. Unai dainai Buka Helaga ese ita ia hagoadaia Iehova amo idia mai hereva do ita kamonai. Apokalupo bukana ese nega 7 ita ia hagoadaia ‘lauma ena hereva do ita kamonai.’—Apokalupo 2:7, 11, 17, 29; 3:6, 13, 22.
4. Dirava be guba dekena amo maoromaoro ita dekenai ia hereva be mai anina, a?
4 Hari inai negai, Iehova be guba dekena amo maoromaoro ita dekenai ia hereva lasi. Baibel negadiai danu, unai hoa dalana ai ia halasia herevadia be nega ta ta sibona idia kamonai, nega haida lagani handred momo idia lao guna bena idia kamonai lou. Idaunegai amo ema bona hari, Iehova be nega momo dala haida amo ena taunimanima ia hereva henia. Unai be momokani hari iseda negai danu. Iehova ese hari inai negai ita ia hereva henia daladia toi mani ita laloa.
“Buka Helaga Ibounai be Dirava Ena Lauma amo Ia Vara”
5. Hari inai negai Iehova ese ena hereva ia halasia dalana badana be dahaka, bona edena dala ai ia amo namo ita abia?
5 Dirava ese taunimanima ia hereva henia dalana badana be Baibel amo. Ia be Dirava ena lauma amo ia vara, bona ia lalonai idia noho hereva iboudiai ese iseda namo idia havaraia. (2 Timoteo 3:16, NW ) Baibel ese taunimanima momo herea edia sivarai ia hahedinaraia, idia be edia ura kwalimu hegeregerena Iehova ena hereva idia kamonai eiava idia kamonai lasi. Unai bamona haheitalai ese ita idia hadibaia dahaka dainai Dirava ena lauma ena hereva ita kamonai be mai anina bada. (1 Korinto 10:11) Baibel ese aonega daladia ia hahedinaraia danu, bona sisiba ia henia iseda mauri lalonai gau idauidau ita abia hidi neganai do ita laloa totona. Ia be hegeregere Dirava ena gadona ita kamonai, iseda taiana dekenai ia gwau: ‘Dala be inai, ia dekenai do oi raka.’
6. Dahaka dainai Baibel ese ma toretore iboudiai ia hereaia?
6 Baibel amo lauma ese ia gwauraia herevadia ita kamonai totona ita duahia loulou be gau badana. Baibel be hari inai negai idia noho buka namodia, momo ese idia ura henia gaudia, ta sibona lasi. Baibel be Dirava ena lauma amo ia vara bona ia ese Dirava ena lalohadai ia hahedinaraia. Heberu 4:12 ia gwau: “Dirava ena hereva be ia mauri noho, bona ia be mai ena siahu. Ia be mai ena matana momokani. Iena matana ese kaia mai ena kahana ruaosi ena matana ia hereaia momokani. Ia ese tau ta ia gwadaia neganai, unai tau ena lalona momokani dekenai ia vareai. Ia vareai ela bona lalona bona lauma ruaosi ia hapararaia. Bona ia ese iseda lalona bona iseda kudouna ena ura ibounai ia tahua diba.” Baibel ita duahia neganai, iena hereva be kaia bamona iseda lalohadai bona ura korikori ia gwadaia, bona ia hahedinaraia iseda mauri be Dirava ena ura hegeregerena eiava lasi.
7. Dahaka dainai Baibel duahia karana be mai anina bada, bona ita idia hagoadaia edena negai ita duahia?
7 Nega ia heau lalonai bona iseda mauri lalonai idia vara gaudia—namodia bona dikadia—dainai, “iseda lalona bona iseda kudouna ena ura” idia idau idia lao diba. Bema Dirava ena Hereva ita stadilaia hanaihanai lasi, reana iseda lalohadai bona hemami do idia idau bona idia be Dirava ena hakaua herevadia hegeregerena lasi. Unai dainai, Baibel ese ita ia hagoadaia: “Umui sibona emui kara do umui tahua, bona emui mauri do umui tohoa, umui be abidadama korikori taudia o lasi.” (2 Korinto 13:5) Bema ita ura lauma ena hereva ita kamonai noho, namona be dina ibounai Dirava ena Hereva ita duahia sisibana ita badinaia.—Salamo 1:2.
8. Sibona eda lalohadai Baibel duahiduahi karana dekenai ita tahua totona edena hereva aposetolo Paulo ena amo ese ita ia durua?
8 Baibel idia duahia taudia dekenai mai anina bada herevana be inai: Nega oi atoa oi duahia gaudia oi lalohadailaia totona! Namo lasi inai sisiba, dina ibounai Baibel do ita duahia, ita badinaia toho dainai karoa momo ita duahia haraga sibona to edia anina ita lalo-pararalaia lasi. Ena be Baibel ita duahia loulou be gau badana, to namo lasi sediual ita badinaia totona sibona ita duahia; namona be ita ura momokani Iehova bona ena palani ita diba. Unai dainai, sibona eda lalohadai ita tahua totona aposetolo Paulo ena hereva ita gaukaralaia diba. Ena Keristani tadikaka ia tore henidia, ia gwau: “Tamana ena vairanai lau tui diho. . . . Dirava lau noia, umui ese umui abidadama henia dainai, Keriso be umui emui kudouna lalonai do ia noho. Lau noia danu lalokau ese umui emui kudouna do ia hahonua, vadaeni do umui gini goada, ramu ese au badana ia dogoatao, ia gini goada bamona. Vadaeni umui, bona Dirava ena taudia ibounai, ese emui goada bona aonega dekena amo, Keriso ena lalokau ena lababa, bona ena lata, bona ena ataiai, bona ena dobu, do umui diba momokani. Oibe, lau ura Keriso ena lalokau do umui diba. Unai lalokau ese diba ibounai ia hereaia. Dirava lau noia, umui ese Keriso ena lalokau do umui diba momokani, unai neganai iena gau namodia dekenai ia honu dekena amo Dirava ese umui do ia hahonua.”—Efeso 3:14, 16-19.
9. Iehova ena amo diba ita abia urana be edena bamona ita havaraia bona habadaia diba?
9 Momokani, ita haida ese duahiduahi karana ita moalelaia lasi, ma haida ese idia moalelaia bamona. To, herevana eda hemami be edena bamona, Iehova ena amo diba ita abia urana ita havaraia bona habadaia diba. Aposetolo Petero ia gwau Baibel ena diba abia urana ita abia be namo, bona namona be unai ura ita havaraia bema ia noho lasi. Ia gwau: “Beibi matamata ese rata ia ura dikadika bamona, umui ese lauma ena rata goevagoeva do umui ura henia.” (1 Petero 2:2) Baibel stadilaia karana do ita “ura henia” totona sibona eda kara ita biagua namonamo be namo. Aniani matamata be nega momo ita tohoa murinai ita ura henia matamaia hegeregerena, iseda lalohadai duahiduahi bona stadi karadia dekenai ia namo ia lao diba bema sibona eda kara ita biagua bona sediual namona ita badinaia.
“Aniani Neganai Edia Aniani Do Ia Henia”
10. Daidia be “hesiai tauna mai ena kamonai, bona mai ena kara maoromaoro” oreana taudia, bona hari inai negai Iehova ese edena dala ai idia ia gaukaralaia?
10 Hari inai negai Iehova ese ita ia hereva henia totona ia gaukaralaia dalana ma ta be Iesu ese Mataio 24:45-47 lalonai ia herevalaia. Unuseniai ia ese lauma amo ia vara Keristani kongregesen ia herevalaia—“hesiai tauna mai ena kamonai, bona mai ena kara maoromaoro” ese maduna ia abia ‘aniani neganai aniani do ia henia’ totona. Unai orea taudia ta ta be Iesu ena ‘ruma taudia.’ Idia bona “mamoe idaudia” taudia “hutuma bada herea” be hagoadaia hereva bona hakaua hereva idia abia. (Apokalupo 7:9, NW; Ioane 10:16) Unai aniani neganai idia abia aniani momo be idia printaia gaudia amo idia abia, hegeregere Gima Kohorona, Awake!, bona ma buka bona buklet haida. Lauma aniani ma haida be distrik bona sekit hebouhebou bona kongregesen heboudia ai idia henia hereva bona haheitalai amo idia abia.
11. Edena dala ai ita hamomokania “hesiai tauna mai ena kamonai, bona mai ena kara maoromaoro” amo lauma ese ia halasia herevana ita kamonai namonamo?
11 “Hesiai tauna mai ena kamonai, bona mai ena kara maoromaoro” oreana amo ia mai dibana be iseda abidadama hagoadaia bona iseda lalona hadibaia totona ita abia. (Heberu 5:14) Reana unai sisiba badinaia daladia ibounai idia hahedinaraia lasi, unai amo ita ta ta sibona ese badinaia dalana do ita lalohadailaia. Nega haida, sisiba ita abia iseda kara ta ita haidaua totona. Edena bamona lalohadai ita hahedinaraia be namo, bema ita ura hesiai tauna oreana amo lauma ese ia halasia herevana ita kamonai namonamo? Aposetolo Paulo ia haere, ia gwau: “Umui idia hakaua taudia do umui kamonai henia, bona edia hereva do umui badinaia.” (Heberu 13:17) Momokani, unai idia karaia taudia ibounai be goevadae lasi taudia. To, Iehova ia moale badina ena hesiai taudia, herevana idia goevadae lasi, ia gaukaralaidia diba inai nega dokona lalonai ita idia hakaua totona.
Iseda Lalona Ena Mamina ese Ita Ia Hakaua
12, 13. (a) Iehova ese ita dekenai ia henia hakaua gauna ma ta be dahaka? (b) Lalona ena mamina ese Dirava ena Hereva idia diba lasi taudia edia mauri lalonai danu, dahaka namo ia havaraia?
12 Iehova ese ita ia hakaua gauna ma ta ia henia—iseda lalona ena mamina. Taunimanima ia havaraia neganai diba ia henia maoro bona kerere idia itaia totona. Ita ibounai lalonai unai gauna ia noho. Aposetolo Paulo be Roma taudia ia tore henia neganai, ia gwau: “Iuda lasi taudia be Mose ena Taravatu idia diba lasi, to idia haida ese sibodia edia laloa diari dekena amo taravatu idia badinaia. Inai taudia ese madi Taravatu idia davaria lasi, to edia laloa maoro dekena amo sibodia edia taravatu idia haginia. Idia edia kara ese ia hedinaraia, Dirava ena Taravatu be edia kudouna dekenai ia noho vadaeni. Idia edia kudouna ena laloa ese ia hamomokania Dirava ena Taravatu be edia kudouna lalonai ia noho. Unai dainai nega haida edia lalona dekenai idia gwau, ‘Egu kara ia kerere,’ bona nega haida edia lalona dekenai idia gwau, ‘Egu kara be ia maoro.’ ”—Roma 2:14, 15.
13 Iehova idia diba lasi taudia haida edia lalohadai bona kara be sisina Dirava ena kara maoromaoro taravatudia hegeregerena. Ia be hegeregere edia lalonai gado regena maragina ese dala maorona dekenai idia ia hakaua. Bema unai be momokani Dirava ena Hereva idia diba lasi taudia dekenai, vadaeni unai gado regena maragina ese Keristani taudia momokanidia ia hakaua badabada be namo, ani! Momokani, Keristani tauna ena lalona ena mamina, bema Dirava ena Hereva amo ia hadibaia bona Iehova ena lauma helaga ida ia gaukara hebou, be hakaua gauna namona.—Roma 9:1.
14. Edena dala ai Baibel amo ita hadibaia lalona ena mamina ese ita ia durua, Iehova ena lauma ena hakaua dalana ita badinaia totona?
14 Lalona ena mamina namona, Baibel amo ita hadibaia gauna, ese ita dekenai lauma ia ura ita raka dalana do ia hadibaia diba. Reana nega haida Buka Helaga bona Baibel idia herevalaia bukadia ese ita dekenai ia vara gauna idia herevalaia lasi. To, reana iseda lalona ena mamina ese ita ia hadibaia bona sisiba henia, ita ia hadikaia dalana ita abia hidi lasi totona. Bema unai bamona ia vara to iseda lalona ena mamina ita dadaraia, unai be hegeregere Iehova ena lauma ena hereva ita dadaraia. To, bema iseda Keristani lalona ena mamina badinaia karana ita manadalaia, dala maorona ita abia hidi diba, herevana unai gauna ia sisibalaia herevana ta idia torea lasi. To gau badana be ita laloatao, bema Dirava ese hakaua herevana eiava taravatu ia henia lasi, namo lasi ita laloa iseda tadikaka sibona ese ia abia hidi diba gaudia dekenai eda lalona ena mamina do ia badinaia be namo.—Roma 14:1-4; Galatia 6:5.
15, 16. Dahaka dainai reana iseda lalona ena mamina ia gaukara namonamo lasi, bona unai ia vara lasi totona dahaka ita karaia be namo?
15 Lalona ena mamina namona, Baibel amo ita hadibaia gauna, be harihari gauna namona Dirava ena amo. (Iamesi 1:17) To kara maoromaoro dalana ai ita ia hakaua namonamo totona hadikaia gaudia amo ita gimaia be gau badana. Iseda gabu taudia edia kastom, sene karadia, bona mauri daladia, Dirava ena taravatu ida idia hegeregere lasi karadia unai, bema ita badinaia, iseda lalona ena mamina do idia hakererea bena dala maorona dekenai ita do ia hakaua lasi. Reana gau haida do ita laloa maoromaoro diba lasi bona reana sibona ita koia bona do ita laloa gau dikana ta be gau namona.—Ioane 16:2 itaia.
16 Bema iseda lalona ena mamina ita dadaraia noho, ena regena be do ia manoka ia lao bena gabeai ita dekenai kara maoromaoro do ia hadibaia diba lasi. Salamo torea tauna be unai bamona taudia ia herevalaia, ia gwau: “Inai taudia edia kudoudia be auka.” (Salamo 119:70) Edia lalona ena mamina idia dadaraia taudia be idia laloa maoromaoro diba lasi. Dirava ena hakaua herevadia ese idia hakaudia lasi bona dala maorona idia abia hidi diba lasi. Unai ia vara lasi totona, gau badana be iseda Keristani lalona ena mamina ita badinaia, gau maragidia lalonai danu.—Luka 16:10.
Idia Kamonai Bona Badinaia Taudia Idia Moale
17. Ia hereva “gadona” ita kamonai henia bona Baibel amo ita hadibaia lalona ena mamina ita badinaia neganai, edena hahenamo ita abia?
17 Ia hereva “gadona”—Buka Helaga bona hesiai tauna mai ena kamonai bona kara maoromaoro oreana amo idia halasia—ita kamonai karana ita manadalaia bona Baibel amo ita hadibaia lalona ena mamina ita badinaia neganai, Iehova ese ita do ia hanamoa bona ita dekenai ena lauma do ia henia. Bena, unai lauma helaga ese ita do ia durua, Iehova ese ita ia hadibaia gaudia ita abia dae bona lalo-pararalaia totona.
18, 19. Edena dala ai Iehova ena hakaua dalana dainai namo ita abia iseda hesiai gaukara lalonai bona iseda mauri lalonai?
18 Iehova ena lauma ese ita ia hagoadaia danu, idia vara gaudia aukadia be mai aonega bona gari lasi ida ita hanaia totona. Aposetolo taudia dekenai ia karaia bamona, Dirava ena lauma ese iseda lalona ia hagoadaia diba bona ita ia durua, hanaihanai Baibel ena hakaua herevadia hegeregerena ita karaia bona ita hereva totona. (Mataio 10:18-20; Ioane 14:26; Kara 4:5-8, 13, 31; 15:28) Iehova ena lauma bona sibona eda hekwarahi dainai mauri lalonai anina bada gaudia ita abia hidi neganai do ita kwalimu diba, bona unai dainai ita abia hidi gaudia be mai gari lasi ida do ita badinaia. Hegeregere, reana oiemu mauri dalana oi haidaua gwauraia, lauma gaudia dekenai emu nega oi habadaia totona. Eiava anina bada gaudia, emu mauri idia haidaua diba gaudia, oi laloa noho, hegeregere adavana oi ura abia hidi, moni gaukara matamata oi lalohadailaia, eiava oi ura ruma oi hoia. Gau ta oi abia hidi lalonai, namo lasi emu hemami sibona hegeregerena oi karaia, to namona be Dirava ena lauma ena hereva oi kamonai bona ena hakaua hegeregerena oi karaia.
19 Keristani tadikaka amo, elda taudia amo danu, ita abia hadibaia herevadia bona sisiba ita laloa bada. To, namo lasi hanaihanai ita naria ela bona ma haida ese ita idia hadibaia. Bema ita diba aonega dalana be dahaka bona edena dala ai iseda lalohadai bona kara ita haidaua be namo Dirava ita hamoalea totona, namona be ita karaia sibona. Iesu ia gwau: “Inai bema umui diba, bona bema umui karaia, be do umui namo.”—Ioane 13:17.
20. Ia hereva “gadona” idia kamonai henia taudia be edena hahenamo idia abia?
20 Ia hedinarai goevagoeva, Dirava hamoalea dalana ita dibaia totona, Keristani taudia be guba amo gado regena korikorina idia kamonai eiava aneru ese ia vadivadi henidia be anina lasi. Edia hahenamo be Dirava ena Hereva idia abia bona Ia ese horoa oreana amo lalokau dalanai idia ia hakaua. Bema unai “gadona” idia kamonai henia bona Baibel amo idia hadibaia lalona ena mamina idia badinaia, Dirava ena ura karaia lalonai do idia kwalimu. Bena do idia itaia aposetolo Ioane ena gwauhamata ia guguru, ia gwau: “Dirava ena ura ia karaia noho tauna be do ia noho ela bona hanaihanai.”—1 Ioane 2:17.
Riviu Kwadogina
• Dahaka dainai Iehova ese ia havaraia taudia ia hereva henia?
• Baibel duahia loulou karana amo dahaka namo ita abia diba?
• Hesiai oreana amo ita abia dibana be edena bamona ita laloa be namo?
• Dahaka dainai Baibel amo ita hadibaia lalona ena mamina ita dadaraia lasi be namo?
[Picture on page 13]
Dirava amo hereva ita abia totona taunimanima ese idia karaia gaudia be anina lasi
[Credit Line]
Courtesy Arecibo Observatory/David Parker/Science Photo Library
[Picture on page 15]
Iehova be Baibel amo bona “hesiai tauna mai ena kamonai, bona mai ena kara maoromaoro” oreana amo ita ia hereva henia