Gilead Ena Klas Namba 108 Idia Hagoadaia Hesiai Gaukara Helagana Do Idia Karaia

NEGA momo Baibel lalonai Dirava tomadiho henia karana idia herevalaia neganai, inai hereva “hesiai gaukara helagana” idia gaukaralaia. Greek gado ai unai hereva ena anina be Dirava ena hesiai gaukara. (Roma 9:​4, NW ) Taunimanima 5,562 be Watchtower Bible School of Gilead ena klas namba 108 ena kosi haorea program ena hereva henia taudia idia kamonai henia, bona edia sisiba namona ese sikuli idia haorea taudia idia durua Iehova Dirava ena hesiai gaukara helagana idia karaia totona.a

Theodore Jaracz, Iehova ena Witnes taudia edia Hakaua Oreana tauna ta, be seamani tauna. Unai program be ane namba 52, “Iseda Tamana Ena Ladana,” amo idia kehoa. Unai ane ena kahana iharuana ia gwau: “Ai ura emu ladana do ai hahelagaia.” Unai ese kosi idia haorea stiuden taudia (tano idauidau 10 amo idia mai taudia) edia ura ia hahedinaraia, unai be idia dibaia gaudia be edia misinari gaukarana lalonai, tano idauidau 17 ai, do idia gaukaralaia.

Tadikaka Jaracz ese ena hereva ia hamatamaia neganai hua ima lalonai stiuden taudia be Baibel idia stadilaia goada karana ia herevalaia, unai kara ese ia hegaegaelaidia tano idaudia dekenai hesiai gaukara idia karaia totona. Unai ese ia durudia ‘hereva ibounai idia laloa namonamo,’ anina be Dirava ena Hereva ena diari ai guna idia dibaia gaudia idia tahua namonamo ‘bona hereva namodia do idia dogoatao momokani.’ (1 Tesalonika 5:​21) Ia hagoadadia mai edia kamonai ida Iehova bona iena Hereva do idia badinaia, bona idia dibaia gaukarana do idia karaia noho. Unai ibounai idia karaia lalonai, dahaka ese idia do ia durua?

Sisiba Namona Hesiai Gaukara Helagana Idia Karaia Totona

Lon Schilling, Betele Haheaua Komiti tauna ta, ena hereva ena sinado be “Hahetoho Lalonai Do Oi Laloa Manada Noho, A?” Ia ese laloa manada karana, Dirava ena aonega ia hahedinaraia karana, ena namo ia herevalaia. (Iamesi 3:​17) Laloa manada karana ena anina be ta ese lalohadai ta ia dogoatao auka lasi, ia kara maoro, laloa maoromaoro, hebogahisi, bona haheauka. Tadikaka Schilling ia gwau: “Laloa manada taudia ese ma haida idia kara henia lalonai idia laloa maoromaoro. Idia kara auka lasi bona idia kara manoka lasi.” Dahaka ese misinari taudia ia durua idia laloa manada totona? Namona be sibona idia laloa mai manau ida, dala ia kehoa neganai ma haida edia hereva idia kamonai bona diba idia abia, bona ma haida edia lalohadai idia laloa namonamo to Dirava ena hakaua herevadia idia hamakohia lasi.​​—⁠1 Korinto 9:​19-​23.

Samuel Herd, Hakaua Oreana tauna ma ta, ese program ena hereva iharuana ia henia, ena lalona veria sinado be “Laloaboio Lasi Oi Aniani be Namo!” Ia hahedinaraia bema ta ia ura hesiai gaukara helagana do ia goadalaia noho, namona be lauma aniani namona do ia ania. Tadikaka Herd ia gwau: “Nega sisina murinai, lauma dalanai emui gaukara ia bada ia lao, badina umui abia haroro bona hadibaia gaukarana do umui goadalaia. Unai dainai, lauma aniani abia karana do umui habadaia be namo, emui goada do ia hegeregere totona.” Lauma aniani ania loulou karana ese misinari tauna do ia durua, lauma dalanai ia daradoko lasi bona ena hanua do ia laloa momo lasi totona. Unai ese ta ia durua ena mauri ia moalelaia bona ena hesiai gaukara helagana ia karaia noho totona.​​—⁠Filipi 4:​13.

Lawrence Bowen, Gilead sikuli ena hadibaia tauna ta, ese kosi idia haorea stiuden taudia ia hagoadaia “Matamana Dekenai Umui Lao Lou.” Unai ena anina be dahaka? Unai program idia kamonai taudia ibounai ia noia Aonega Herevadia 1:7 (NW ) idia kehoa, badina unai siri ia gwau Dirava gari henia karana be diba ena matamana. Hereva ia henia tauna ia gwau: “Iehova ia mauri noho herevana ia dadaraia gauna ta be diba korikorina lasi bona lalo-parara maorona ia havaraia lasi.” Tadikaka Bowen ese Dirava ena Hereva, Baibel, ena hereva idauidau be kahana momo amo idia karaia laulau ida ia hahegeregerea. Bema ta ese ena kahana idauidau be edia gabu korikori dekenai ia atoa hebou, laulau namona ta ia hedinarai. Kahana momo ia atoa neganai, laulau danu ia hedinarai goevagoeva bona ena laloa bada karana ia habadaia momokani. Unai ese ibounai ia durua diba, Dirava ena hesiai gaukara helagana idia karaia totona.

Wallace Liverance, Gilead Sikuli ena rejistra tauna, ese unai kahana ena hereva ginigabena ia henia. Iena hereva ena sinado be “Tanikiu Karana be Emu Boubou Gauna Bamona Dirava Dekenai Oi Henia.” Ia be Iesu ese lepera taudia 10 ia hanamoa sivaraina ia herevalaia. (Luka 17:​11-​19) Tamona sibona be Dirava hanamoa bona Iesu ia tanikiu henia totona ia giroa lou. Tadikaka Liverance ia gwau: “Ita daradara lasi, ma haida danu be edia tauanina ena namo lou karana idia hoalaia mai moale ida. Sibona edia noho goevana idia laloa, to toana be idia ura gauna tamona be hahelaga tauna ese idia do ia gwauraia goeva.” Bema ta ese hereva momokani ia dibaia, bena lauma dalanai ia goeva bona unai kara ia laloa bada, Dirava ena kara namodia dainai do ia tanikiu henia be namo. Gilead ena klas namba 108 ena stiuden taudia idia hagoadaia, Dirava ena gaukara idauidau bona kara namodia idia laloa dobu totona, bena edia hesiai gaukara bona sibona edia ura dadaraia karana amo do idia hahedinaraia Dirava idia tanikiu henia.​​—⁠Salamo 50:​14, 23; 116:​12, 17.

Karaia Dalana Ena Ekspiriens

Mark Noumair, Gilead Sikuli ena hadibaia tauna ma ta, ese program ena kahana ta ia karaia. Ia be stiuden taudia edia sikuli negana lalonai, haroro gaukara ai idia davaria ekspiriens ia hahedinaraia. Gilead sikuli dekenai idia do vareai lasi neganai, stiuden taudia edia ful-taim hesiai gaukara laganidia edia averes ese 12 ia hanaia. Sikuli dekenai idia noho neganai, edia mauri dala be idauidau taudia ida Baibel stadi momo idia hamatamaia, unai ese ia hahedinaraia stiuden taudia ese ‘taunimanima idauidau edia mauri dalana abia dae’ karana idia diba.​​—⁠1 Korinto 9:​22.

Stiuden taudia edia ekspiriens idia gwauraia murinai, Charles Molohan bona William Samuelson ese Betele ena ruma bese taudia bona guna Gilead kosi idia haorea loaloa taudia haida idia henanadai henia. Idia henanadai henia tauna ta be Robert Pevy, Gilead ena klas namba 51 ia haorea murinai, Philippines dekenai hesiai gaukara ia karaia. Klas taudia ia hamaoroa, ia gwau: “Bema hekwakwanai ta ia vara, taunimanima ibounai be edia lalohadai unai hekwakwanai hanaia totona do idia henia. Nega ibounai ta ena lalohadai ese oiemu lalohadai ia hereaia, bona iena lalohadai do ia hahedinaraia. To, bema Baibel ena hereva oi itaia bona Dirava ena lalohadai oi tahua, ta ena lalohadai ese unai ia hereaia lasi. Nega ibounai unai haere be maoro.”

Lauma gaudia idia hahedinaraia program namona ena dokonai, John Barr, Hakaua Oreana tauna ta, ese hereva ta ia henia, iena sinado be “Iehova Ia Abia Dae Hesiai Gaukara Helagana Umui Karaia.” Ia hahedinaraia edena bamona haroro gaukara lalonai hesiai gaukara helagana ita hahedinaraia, bena kudou maoro taudia ita durua diba Dirava be dala maorona ai idia tomadiho henia totona. Tadikaka Barr be Iesu ena hereva Mataio 4:​10 amo ia duahia murinai, ia gwau, “Bema Iehova sibona do ita tomadiho henia, idia hedinarai goevagoeva lasi kaivakuku tomadiho henia karadia idauidau, hegeregere ma ta ena kohu ura henia karana, taga ura henia dikadika karana, bona sibona abia-isi karana, ita dadaraia be gau badana. Lagani 1940 murinai laganidia amo ema bona hari, iseda misinari taudia be unai bamona idia karaia be ita laloa neganai ita moale bada! Bona ai diba umui Gilead ena klas namba 108 haorea taudia be edia haheitalai namona do umui tohotohoa. Umui be Iehova ena hesiai gaukara helagana do umui karaia, bona ia sibona dekenai unai bamona ita karaia be maoro.”

Unai hereva be hagoadaia program ena kahana badana. Bena nega ia abia tanobada ena kahana idauidau amo hahenamo herevadia idia kamonai, kosi haorea pepana idia abia, bona klas taudia ese sikuli amo idia abia dibana dainai idia torea tanikiu revarevana idia duahia totona. Sikuli idia haorea taudia idia hagoadaia, edia gaukara gabudia bona Iehova ena hesiai gaukara do idia rakatania lasi. Bena unai program idia kamonai taudia ibounai, tano idauidau 25 amo idia mai taudia danu, ese ane bona guriguri amo program idia koua.

[Footnote]

[Box on page 23]

Klas Taudia

Edia tano idauidau: 10

Idia lao henia tanodia idauidau: 17

Klas taudia ibounai: 46

Edia mauri lagani edia averes: 34

Lagani hida hereva momokani lalonai, edia averes: 16

Lagani hida ful-taim hesiai gaukara idia karaia, edia averes: 12

[Picture on page 24]

Watchtower Bible School of Gilead Ena Klas Namba 108

Inai lista ai, laini edia namba be vairana kahana amo ia daekau murina kahana, bona laini ta ta ai idia gini taudia edia ladadia be laurina kahana amo ela bona idibana kahana.

(1) Amadori, E.; Cook, O.; Byrne, M.; Lee, A. (2) Newsome, D.; Pederzolli, A.; Bigras, H.; Kato, T.; Gatewood, D. (3) Eade, D.; Eade, J.; Wells, S.; Jamison, J.; Gonzales, M.; Gonzales, J. (4) Kato, T.; Lohn, D.; Niklaus, Y.; Preiss, S.; Foster, P.; Ibarra, J. (5) Amadori, M.; Manning, M.; James, M.; Boström, A.; Gatewood, B.; Newsome, D. (6) Foster, B.; Jamison, R.; Hifinger, A.; Koffel, C.; Koffel, T.; Byrne, G. (7) Hifinger, K.; Manning, C.; Cook, J.; Boström, J.; Lohn, E.; Pederzolli, A. (8) James, A.; Wells, L.; Preiss, D.; Niklaus, E.; Lee, M.; Ibarra, P.; Bigras, Y.