Kahirakahira Lalohisihisi Lasi Tanobadana Do Ia Vara

MAURI be ia auka ia lao, bona lalohisihisi ena badina be momo. Ita lalo-hekwarahi neganai, do ita davaria iseda hemami ita biagua be auka. Mauri idia lalokau henia taudia idia moale lasi diba danu! Mani haheitalai haida ita laloa.

Idaunegai, peroveta tauna Mose ia lalo-manoka dainai Dirava ia hamaoroa: “Mani do oi bogahisihisi lau dekenai, lau do oi alaia mase, vadaeni oiemu badu be do lau mamia lou lasi.” (Numera 11:15) Peroveta tauna Elia be ena inai taudia amo ia heau mauri neganai, ia gwau: “Mani lauegu mauri do oi hadokoa, lau mase namo!” (1 King Taudia 19:⁠4) Bona peroveta tauna Iona ia gwau: “Lohiabada e, oi lau noia inai, lauegu mauri do oi haorea. Badina do lau mase be namo, do lau mauri be dika.” (Iona 4:⁠3) To Mose, Elia, eiava Iona ese sibona idia hamasea lasi. Idia ibounai ese Dirava ena taravatu, “taunimanima oi alaia lasi” idia diba. (Esodo 20:13) Edia abidadama Dirava dekenai be ia goada dainai, idia diba hekwakwanai ibounai be mai edia hamaoromaoroa dalana bona mauri be Dirava ena harihari gauna.

Hari ita davaria hekwakwanaidia be edena bamona? Lalo-metau eiava gorere sibona lasi, to nega haida ruma bese taudia, dekena taudia, eiava gaukara hebou taudia ese idia kara dika henia dainai ita haheauka. Baibel ese inai bamona taudia ia herevalaia: “Dika idauidau ibounai dekenai idia honu, kara gagevagageva, kara dika, taunimanima alaia, heatu, koikoi kara, taunimanima hadikaia laloa. Danu idia ese kohu momo taudia idia mama henia. Taunimanima edia dika idia kikilaia momo. Haida idia herevalaia neganai, ta ta edia ladana idia hadikaia, Dirava dekenai idia badu henia, idia badu kava, idia hekokoroku, bona idia laloa momo edena bamona dika ma haida do idia karaia. Edia tamana bona sinana dekenai idia kamonai henia lasi. Idia be aonega lasi, edia gwauhamata idia badinaia lasi, idia lalokau henia lasi, taunimanima dekenai idia bogahisihisi lasi.” (Roma 1:​28-​31) Dina ta ta ibounai unai bamona taudia ese ita idia gegea dainai toana be mauri be mai ena metau. Hagoadaia bona heduru idia ura abia taudia be edena bamona ita durudia diba?

Ita Ura Dikadika Ita Kamonai

Hekwakwanai idauidau bona hisihisi dainai ta ena laloa maoromaoro karana ia haboioa diba. Aonega tauna ia gwau: “Kara auka dainai aonega tauna be kavakava kara ia karaia diba.” (Hadibaia Tauna 7:​7, NW ) Unai dainai sibona ia ura hamasea tauna ena hereva ita laloa bada be namo. Herevana ia ese ia abia hekwakwanai be ena hemami, tauanina, eiava ena harana dekenai, eiava lauma dalanai hekwarahi ta ia davaria, to reana heduru ia abia haraga be namo. Momokani, gorere hanamoa daladia bona karadia be idauidau, bona ta ese sibona ia abia hidi edena hanamoa karadia do ia abia dae.​​—⁠Galatia 6:⁠5.

Herevana dahaka ese sibona hamasea hemamina ia havaraia, to lalo-parara, hebogahisi, bona do ia manau tauna oi hereva henia neganai oi do ia durua. Oiemu hekwakwanai idia ura kamonai ruma bese taudia bona turadia ese reana oi idia durua diba. Haida edia hemami ita laloa bona ita kara namo henidia sibona lasi, to Dirava ena Hereva amo hagoadaia herevadia ita gwauraia ese edia helaro idia haboioa taudia ia durua diba.

Lauma Heduruna Lalohisihisi Taudia Totona

Baibel duahiduahi ena heduru oi dibaia neganai reana do oi hoa. Ena be ia be kwarana gorere hanamoa bukana ta lasi, to Baibel ese ita ia durua diba mauri ita laloa bada totona. King Solomona ia gwau: “Unai dainai lau diba taunimanima edia dala namona tamona be inai: Do idia moale, bona idia edia mauri dina ibounai lalonai, kara namodia do idia karaia. Ita ibounai ese iseda gaukara ena anina do ita moalelaia, do ita aniani bona inuinu. Inai be Dirava ena harihari gauna.” (Hadibaia Tauna 3:​12, 13) Moale ia havaraia gaukarana ese ia hahedinaraia mauri be anina namona gauna, to unai sibona lasi, gau maragidia​​—⁠hegeregere hodahoda namona, dina ena diari, palaoapalaoa, au, bona manu​​—⁠be Dirava ese ia henia harihari gaudia, bona unai ita moalelaia diba danu.

Heduru gauna badana be, Baibel ese ita ia hadibaia Iehova Dirava bona iena Natuna, Iesu Keriso, ese ita idia laloa. (Ioane 3:​16; 1 Petero 5:​6, 7) Unai dainai, Salamo torea tauna ia gwau: “Lohiabada do ita hanamoa. Ia ese dina ibounai iseda maduna metaudia ia huaia noho. Ia ese ita ia hamauria noho.” (Salamo 68:19) Ena be sibona ita laloa maragi bona ita laloa ita be anina lasi, to Dirava ese ita ia boiria ia ita guriguri henia totona. Ita abia dae diba mai ena manau bona momokani ida iena heduru ia noia tauna be Dirava ese do ia dadaraia lasi.

Hari inai negai, ta ese hekwakwanai lasi maurina ia davaria diba lasi. (Iobu 14:⁠1) To, Dirava ena Hereva ena hereva momokanina ese taunimanima momo ia hadibaia sibona hamasea karana be edia hekwakwanai ia hamaoromaoroa dala maorona lasi. Aposetolo Paulo ese ia lalo-hekwarahi bada dibura naria tauna ia durua dalana mani oi laloa. Unai tauna “ia noga, ia toreisi, ia itaia iduara ibounai idia kehoa. Ia laloa dibura taudia ibounai be idia heau vadaeni. Inai dainai iena kaia ia veria daekau, ia sibona do ia alaia gwauraia.” Karaharaga unai dibura naria tauna ia laloa sibona ia hamasea be namo, to iena kerere dainai do idia hahemaraia bona reana metairametaira do idia hamasea be namo lasi. Aposetolo tauna ia boiboi: “Oi sibona oi hadikaia lasi, badina be ai ibounai iniseni ai noho.” Paulo be unai hereva sibona ia gwauraia lasi. Momokani, ia bona Sila ese unai dibura naria tauna ena lalona idia hagoadaia bona iena henanadai idia haerelaia. Ia gwau: “Lohia taudia e, dahaka lau karaia Dirava ese lau do ia hamauria totona?” Idia haere, idia gwau: “Lohiabada Iesu oi abidadama henia, bona hamauria do oi abia, oi bona oiemu ruma bese taudia danu.” Bena idia ese unai tauna bona ena ruma bese dekenai Iehova ena hereva idia gwauraia, unai dainai “ia, mai ena ruma bese taudia ibounai danu nega tamona bapatiso idia abia.” Unai dibura naria tauna bona ena ruma bese idia moale bada bona edia mauri dekenai anina matamata idia abia.​​—⁠Kara 16:​27-​35.

Hari inai negai, ita moale bada badina ita diba hari idia vara kara dikadia be Dirava ena kerere dainai lasi! Iena Hereva ese lauma dikana ta, “ladana be Diabolo bona Satani” ia hahedinaraia, ia ese “tanobada taudia ibounai ia koia noho.” To iena nega ia kwadogi noho. (Apokalupo 12:​9, 12) Kahirakahira, lalohisihisi ibounai, Satani bona ena demoni ese tanobada taudia ibounai dekenai idia mailaia gaudia, be Dirava ese do ia haoredia. Bena Dirava ia gwauhamatalaia tanobada matamatana mai kara maoromaoro danu ese helaro be lasi mamina bona sibona hamasea karana idia havaraia gaudia do ia haorea momokani.​​—⁠2 Petero 3:​13.

Heduru Totona Idia Taitai Taudia Edia Durua Gauna

Hari inai negai danu, daradoko taudia ese Baibel amo heduru idia abia diba. (Roma 15:⁠4) Salamo torea tauna Davida ese ane ia abia, ia gwau: “Dirava e, bema tau ta be iena kara dika dainai ia lalohisihisi momokani, bona ia manau momokani neganai, oi ese ia do oi negea diba lasi.” (Salamo 51:17) Momokani, ita ese hahetoho haida ita davaria bona kara dika ena mamina ita mamia. To iseda hebogahisi, lalokau, bona laloa manada guba Tamana ita dibaia namonamo karana ese ita ia durua bena ita lalo-parara iena matanai ita be dava bada gaudia bamona. Dirava be iseda Turana badana bona Hadibaia Tauna badana ai ia lao diba. Bema ita ese turana karana namona Iehova Dirava ida ita karaia neganai, ia dainai do ita lalohisihisi lasi. Iseda Havaraia Tauna ia gwau: “Lau inai Lohiabada, emui Dirava. Emui namo habadaia dalana, be umui dekenai lau hadibaia noho. Emui raka dalana namona dekenai umui lau hakaua noho.”​​—⁠Isaia 48:⁠17.

Dirava tabekau henia karana ese taunimanima momo ia durua. Haheitalai haida be inai: Nega daudau lalonai Mara be ia hamanokaia daradoko ia mamia vadaeni, bena ena natuna merona tamona, be aksiden lalonai ia mase.a Ia gari bona sibona ia hamasea toho. To, hari, dina ibounai daba momokani ia toreisi bona ena ruma gaukara ia karaia. Miusiki kamonaia karana bona haida durua karana ia moalelaia. Inai helaro “mase taudia dohore idia toreisi lou, kara maoromaoro taudia, bona kara maoromaoro lasi taudia danu” ese iena lalokau merona ena mase ena hisihisi haida ia kokia bona ena abidadama Dirava dekenai ia hagoadaia. (Kara 24:15) Mara ia ura lasi aneru bamona guba dekenai ia noho dainai, Salamo 37:11 ena hereva ese ena kudouna ia hamarerea: “Manau taudia ese noho gabuna tano do idia abia, do idia helai namonamo, mai moale bona mai maino danu.”

Brazil hahinena ma ta, ladana Sandra, ia gaukara goada ena natuna toi dekenai sinana namona ai ia lao totona. Ia gwau: “Lau bisi bada herea dainai, egu tamana be karaharaga ia mase bona lau kamonai egu adavana be unai negai hahine ma ta danu ia turana karaia neganai, Dirava dekenai heduru noia karana lau laloa lasi.” Sandra ia lalohisihisi dainai sibona ia hamasea toho. Dahaka ese ia durua ia namo lou totona? Lauma gaudia ia laloa bada. “Hanuaboi ibounai lau do mahuta lasi neganai, Baibel lau duahia, bona haida edia sivarai lau duahia neganai edia mauri lau laloa. Danu lau ese Gima Kohorona bona Awake! magasin lau duahia, bona mauri sivaraidia lau moalelaia bada badina lau idia durua egu mauri lau moalelaia totona.” Ia diba Iehova be iena turana namona dainai, ia guriguri neganai ena ura gaudia ia gwauraia goevagoeva.

Lalohisihisi Lasi Vaira Negana

Ita diba taunimanima edia hisihisi do ia ore be heduru gauna badana! Dirava ena Basileia ena lohia henunai, hari inai negai taravatu utua karana, hahemaoro maoromaoro lasi karana, eiava inai henia kava karana dainai idia hisihisi natudia bona taunimanima badadia be do idia moale bada. Salamo ta ia perovetalaia bamona, Iehova ese ia abia hidi King, Iesu Keriso, ese ‘ogogami taudia do ia durua. Edia gau be lasi, bona edia durua be lasi taudia, do ia hamauria.’ Danu, “ia ese manoka taudia, bona ogogami taudia dekenai do ia bogahisihisi, bona gau lasi taudia be mase dekena amo, ia ese do ia hamauria.” Momokani, “ogogami taudia, be haida ese idia dagedage henia neganai, [ia] ese unai ogogami taudia do ia hamauria. Ia ese edia mauri do ia naria namonamo noho, badina edia mauri be gau namo herea ia dekenai.”​​—⁠Salamo 72:​12-​14.

Unai peroveta herevadia edia guguru negana be ia kahirakahira. Mauri hanaihanai unai bamona tanobada dekenai ena lalohadai ese oi ia hamoalea, a? Bema oibe, badina namona dainai oi moale diba bona Dirava ena harihari gauna, mauri, oi moalelaia diba. Bona bema oi ese inai lalona idia hagoadaia Baibel gwauhamatadia be ma haida dekenai oi hadibaia, oi ese inai hebogahisi lasi bona lalokau lasi tanobadana ai heduru idia noia taudia dekenai moale bada herea oi mailaia diba.

[Footnote]

[Picture on page 6]

Hari nega momo oi moale diba

[Picture on page 7]

Oi ese lalohisihisi lasi tanobadana oi naria noho, a?