Iehova Ena Hakaua Dalana amo Namo Ita Abia

POLAND AI ABIA HIDI NAMONA LAU KARAIA

“LAUEGU mauri lagani be 15 neganai, lau bapatiso, bona hua 6 murinai, heduru painia gaukara lau karaia matamaia. Bena lagani ta murinai, regula painia gaukara totona pepa lau hahonua. Haisikuli lau haorea murinai, tadikaka lau noidia pablisa momo lasi gabuna dekenai lau lao totona. Lau ura egu hanua bona egu tubuna hahine lau rakatania. Ia be Iehova ena Witnes hahinena lasi, bona lau be ia ida lau noho. To madi, sekit naria tauna ese lau ia hamaoroa egu asainmen be egu hanua ai do lau haroro! Unai nega ai, ia dekenai egu hemami lau gwauraia hedinarai lasi. To, egu kwarana lau atoa diho bona lau raka oho, sekit tauna ena hereva lau laloa totona. Egu bamona lau hamaoroa: ‘Reana lau be Iona bamona lau kara noho. To Iona be gabeai Nineva dekenai ia lao. Lau danu ese lau abia asainmen do lau karaia.’

“Lagani 4 egu taoni ai painia gaukara lau karaia vadaeni, bona unai hakaua dalana lau badinaia dainai lau moale. Lau laloparara lau be lalohadai kererena lau abia. Hari lau moale bada. Hua tamona lalonai, Baibel stadi 24 lau karaia. Iehova lau tanikiu henia, badina guna egu tubuna hahine be lau ia koua, to hari ia ida Baibel lau stadilaia.”

FIJI AI MOALE GAUNA TA IA VARA

Fiji ai, Baibel stadi ta be inai abia hidi do ia karaia, ia be Keristani hebouhebou dekenai do ia lao eiava ena adavana ida varavara ta ena vara dinana ena pati dekenai do ia lao. Iena adavana ia lalotamona ia be hebouhebou dekenai do ia lao. Stadi hahinena ese ena adavana ia hamaoroa hebouhebou ia ore murinai, idia do ia bamoa. To, hebouhebou amo ia lou mai neganai, ia laloa bema ia lao, unai ese ena hetura karana Iehova ida do ia hadikaia, unai dainai ia lao lasi.

Iena adavana ese ena varavara ia hadibaia, ia ese ena hahine ia hamaoroa, iena “Witnes hebouna” ia ore murinai, idia do ia bamoa, to idia haere, “Do ia mai lasi. Iehova ena Witnes taudia be vara dinana ena pati idia moalelaia lasi!”a

Iena adavana ia moale bada, badina iena hahine ese ia abia dae gaudia bona ena lalomamina ia badinaia. Iena abidadama karana dainai, gabeai ia ese ena adavana, bona ma haida ia haroro henia diba. Dahaka ia vara? Iena adavana ese Baibel stadi ia abia dae bona iena hahine ida hebou ia lao henidia matamaia.