Australia Ena Motumotu Haida ai “Sivarai Namona” Idia Harorolaia
IESU ia gwau: “Basileia ena Sivarai Namona be tanobada ibounai dekenai do idia harorolaia.” (Mataio 24:14) Iehova ena Witnes taudia ese Iesu ena hahegani idia badinaia bona taunimanima dekenai Baibel ena hereva idia hadibaia, herevana edeseniai idia noho. (Mataio 28:19, 20) Iehova ena Witnes taudia be mai edia ura ida unai gaukara idia karaia, ena be nega haida sibona edia moni idia gaukaralaia bona metau idauidau idia davaria.
Hegeregere, Nathan bona Carly be edia noho dalana idia haidaua, unai amo Torres Strait ena motumotu haida dekenai idia noho taudia idia haroro henia diba. Lagani 2003 ai, Australia ai Iehova ena Witnes taudia edia brens opesi ese Nathan bona Carly idia boiria Thursday Island ai ia noho kongrigeisen ta ida idia gaukara hebou totona. Thursday Island be Australia bona New Guinea huanai ia noho.
Lagani 2007 ai, unai famili be bouti gunana ta, ladana Teisan-Y idia hoia. Sibona edia moni idia gaukaralaia unai bouti idia hanamoa bona gabu daudau ai idia noho motumotu 10 dekenai idia lao haroro totona, to idia be Thursday Island dekenai idia noho. Henunai be Nathan ese edia loaloa ena sivarai ia gwauraia.
January 2008: Hari dina lau be dingi amo Bamaga dekenai lau lao, ena daudau be kilomita 80 bamona, unuseniai Witnes taudia siks lau udaia. Hari ai be bouti, Teisan-Y dekenai ai guia bona Warraber bona Poruma motumotu ai lao henia noho. Bouti ena tanika be petrol amo ai hahonua—tanika ena lita be 5,500 bona lita tamona ena davana be K6.00 bamona. Bouti be hora ta lalonai kilomita 10 ia heau. To lai bona hurehure be lasi.
Ai ginidae neganai, bouti ena dogo ai negea davara ai, bona dingi dekenai ai guia bona Warraber ai lao, unai motumotu ena kaunsolo ai noia gwaumaoro ia henia ai haroro totona. Ia be dubu ena pasto ta, to ai dekenai gwaumaoro ia henia dainai unai gabu ai idia noho taudia ai haroro henia. Poruma dekenai danu unai bamona ai karaia bona gwaumaoro idia henia ai haroro totona. Taunimanima be ai idia abia dae bona idia ura dikadika emai buka bona magasin idia duahia. Ai be Baibel stadi momo ai hamatamaia.
April 2008: Ai be palani ai karaia motumotu toi Dauan, Saibai, bona Boigu dekenai ai lao totona, idia be Papua New Guinea ena boda kahirakahira idia noho. Lai bona hurehure bada dainai, ai be unai motumotu toi dekenai ai lao lasi, to Mabuiag Motumotu ai lao. Mabuiag bona emai noho gabuna ena daudau be kilomita 70, to hurehure bada dainai ai be rif momo gabudia amo kilomita 140 bamona ai heau ela bona ai ginidae.
Hurehure badana ta ese dingi be bouti, Teisan-Y, amo ia kokia. Ai be hurehure badadia lalonai bouti amo ai giroa lou dingi ai abia totona. Bouti ai idia guia taudia momo idia gorere.
Mabuiag ai, gwaumaoro idia henia unai motumotu dekenai ai haroro totona, bona unai gabu taudia edia heabidae karana dainai ai dekenai ia vara hekwakwanai ai laloaboio. Hahine ta be mai moale ida ai harorolaia sivaraina ia kamonai, bona buka bona magasin ma haida ia abia unai amo ia gaukara gabuna ena laiberi dekenai ia atoa diba.
May ia lao October 2008: Lai bona hurehure be bada dainai, motumotu ma haida dekenai ai lao diba lasi. Unai dainai unai nega ai gaukaralaia emai dekena taudia ai haroro henia, ai gaukara, bona bouti ai hanamoa.
Bouti hanamoa namonamo totona, bouti badadia idia kamokau gabuna, Weipa dekenai ai lao bona treila badana ta amo bouti ai veria daekau. Bouti hanamoa totona be mai ena hekwarahi! Unai gabu dekenai idia noho Iehova ena Witnes taudia be ai idia durua, hegeregere bouti ena paipa idia hanamodia, idia penia, bona kapenta gaukara idia karaia. Ma haida be aniani idia mailaia. To ma haida be ai dekenai kohu bona aniani idia henia, unai amo haroro totona do ai loaloa lou neganai unai gaudia ai gaukaralaia diba. Edia heduru bona heabidae karana be mai anina bada.
December 2008: Palani ai karaia lou Dauan, Saibai, bona Boigu motumotu ai lao henia totona. Lai bona medu bada ai hanaia, bona rif amo ai lao totona mapu ai gaukaralaia. Hora 12 bamona ai heau lao Dauan dekenai, ia be motumotu mai hairaina ta. Unai motumotu ena ororo be ori ese ia koua. Dauan ai idia noho taudia be mai edia ura ida emai sivarai idia kamonai, bona dala ai karaia ruma dekenai ai giroa lou neganai telefon amo idia ida Baibel ai herevalaia.
Hahine ta ladana, Lettie, be emai magasin haida ia abia bona buka bona magasin ma haida totona revareva ia siaia. Australia ena brens opesi ese Lettie dekenai buka bona magasin idia siaia, danu emai kongrigeisen dekenai revareva ta idia siaia bona ai idia hadibaia Lettie ai lou henia totona. Gabeai Lettie ai davaria bona mai moale ida ia ai durua Baibel ia dibaia totona.
Saibai motumotu ai, kaunsolo ese ai ia koua ai haroro lasi totona. To ai lao hebou taudia dekenai gwaumaoro ia henia unai motumotu ai edia varavara idia vadivadi henia bona hereva henia totona. Lau be gavamani amo kontraka pepa ta lau abia Saibai ai idia noho rumadia lau penia totona, unai amo moni sisina lau abia.
Iseda taihu ta ladana Tassie, be PNG ena hanua ta amo ia mai, unai hanua bona Saibai edia daudau be kilomita 4. Australia ena gavamani be gwaubou ta idia karaia, PNG ai idia noho taudia be Saibai dekenai idia lao diba bona unuseniai bisinesi idia karaia. Tassie be ena hanua taudia momo ia hereva henia, to buka bona magasin be hegeregere lasi idia ibounai dekenai ia henia totona. Tassie be ena nega ginigunana ena hanua taudia ia itaia, badina ia be Iehova ena Witnes hahinena ta ai ia lao neganai idia ia itaia diba lasi. Ai ese bouti dekenai boksi ta mai ena buka bona magasin, Tok Pisin gado gaudia, ai abia bona Tassie ai henia. Tassie be PNG taudia 30 mai kahana dekenai Baibel ena sivarai ia herevalaia, bona kamonai taudia ese magasin bona buka ibounai idia abia. Edia hanua dekenai bouti idia lao diba bona reana Iehova ena Witnes taudia be nega ta unai gabu idia vadivadi lasi.
Boigu motumotu ai lao henia be mai ena hekwarahi. Kone ai lao henia ena daudau be kilomita 4 bamona bona ranu ena dobu be mita 2.5. Ranu ena dobu bouti ena henu kahana amo be mita 1.8. Lau bona tadikaka ta be dingi dekenai ai guia bona unai motumotu lao henia dalana ta ai tahua. Medu bada ia diho bona ai paripari! Hora rua lalonai ai be motumotu ena vareai dalana ai tahua.
Ai ginidae neganai, unai motumotu ai idia noho taudia ese ai idia hamaoroa, ai be mapu kererena ai gaukaralaia bona unuseniai gadi o neivi taudia idia lao lasi. Kaunsolo ia ura lasi unuseniai ai haroro, to ai lao hebou taudia dekenai gwaumaoro ia henia unai motumotu ai edia varavara idia vadivadi henia bona haroro henia totona. Kaunsolo ena ura ai matauraia bona varavara sibona ai vadivadi henia. Tau ta ese Baibel be Dahaka Ia Hadibaia?a bukana ia abia, maoromaoro ia duahia, bona ena Baibel murina kahanai henanadai haida ia torea matamaia. Unai tau be gabeai Thursday Island dekenai ia vadivadi neganai, ia ai hereva henia lou.
January 2009: Ai be Moa bona Mabuiag motumotu dekenai ai giroa lou bona kamonai taudia dekenai Baibel ena sivarai ai herevalaia. Unai motumotu rua dekenai ai idia abia dae. Moa motumotu ena hanua ta ladana, St. Paul ai idia noho taudia momo be ai idia hamaoroa, idia dekenai do ai giroa lou haraga. Kaunsolo ia gwau, unai hanua ai vadivadi henia negadiai ai haroro diba.
Torres Strait dekenai motumotu ibounai 17 idia noho. Unai motumotu ta ta ai idia noho taudia ibounai ai haroro henia diba lasi. To ai gaukara goada Australia ena motumotu haida dekenai iseda Havaraia Tauna, Iehova, ena ladana ai hanamoa totona.
[Footnote]
a Iehova ena Witnes taudia ese idia karaia.
[Map on page 23]
(For fully formatted text, see publication)
AUSTRALIA
Weipa
Bamaga
TORRES STRAIT MOTUMOTUDIA
PAPUA NEW GUINEA
[Credit Line]
Based on NASA/Visible Earth imagery
[Map on page 24, 25]
Bamaga
Thursday Island
Moa Motumotu
Warraber Motumotu
Poruma Motumotu
Mabuiag Motumotu
Saibai Motumotu
Dauan Motumotu
Boigu Motumotu
PAPUA NEW GUINEA
[Credit Line]
Based on NASA/Visible Earth imagery
[Picture on page 24]
Thursday Island dekenai ai ginidae
[Picture on page 24]
Ai raka lao Saibai Motumotu ai idia noho taudia ai vadivadi henia totona
[Picture on page 25]
Tok Pisin gado ai sivarai namona ai harorolaia