Iehova Ia Hanamoa Taudia ese Tanobada Ibounai Lalonai Ia Idia Hanamoa
“Unai neganai lau ese bese idauidau edia gado do lau haidaua bona gado goevadaena do lau henidia, Iehova ena ladana do idia noinoi henia totona.”—SEPANAIA 3:9, NW.
1. Dahaka dainai hadikaia sivaraidia idia guguru Iuda bona bese ma haida dekenai?
IEHOVA ena lauma ese Sepanaia ia hakaua hahemaoro hereva aukadia ia henia totona! Iuda besena bona ena siti badana, Ierusalema, edia gunalaia taudia bona edia taunimanima momo ese Iehova ena ura idia karaia lasi dainai, unai hadikaia sivaraidia idia vara idia dekenai. Kahirakahira idia noho besedia, hegeregere Pilistia, Moaba, bona Amono ese Iehova ena badu idia mamia danu. Dahaka dainai? Badina be lagani handred momo lalodiai Iehova ena taunimanima idia dagedage henia bada. Unai badina tamona dainai, tanobada ibounai ia lohiaia besena Asuria ia hadikaia ore, bona do idia hanamoa lou lasi.
2. Sepanaia 3:8 ai, Dirava ese daidia ia hereva henia?
2 To idaunegai Iuda dekenai, kara maoromaoro taudia haida idia noho. Unai taudia ese Dirava ena hahemaoro karana kara dika taudia dekenai idia naria mai edia ura ida, bona toana be inai hereva amo unai taudia ia hereva henia, ia gwau: “Lau totona do umui naria noho. Do lau toreisi, bona bese idauidau do lau samania dinana do umui naria. Badina dina ta lau ese bese idauidau do lau gogoa hebou, bona basileia ibounai do lau haboua, egu badu be idia edia latanai do lau bubua totona, egu badu mai ena siahu ibounai. Badina be egu mama ena badu, ena lahi dekena amo, lau ese tanobada ena kahana ibounai do lau gabua ore.”—Sepanaia 3:8.
“Gado Goevadaena” Daidia Totona?
3. Sepanaia be lauma ena siahu amo, edena helaro sivaraina ia henia?
3 Oibe, Sepanaia ese Iehova ena hahemaoro sivaraidia ia henia. To Dirava ena lauma ese unai peroveta tauna ia hagoadaia, helaro namona ta ia gwauraia hedinarai totona danu—Iehova idia abidadama henia noho taudia do ia hagoadaia bada sivaraina unai. Sepanaia 3:9 (NW ) ai, Iehova Dirava ia gwau: “Unai neganai lau ese bese idauidau edia gado do lau haidaua bona gado goevadaena do lau henidia, Iehova ena ladana do idia noinoi henia totona, bona iena hesiai gaukara mai edia lalo-tamona ida do idia karaia hebou totona.”
4, 5. (a) Kara maoromaoro lasi taudia dekenai dahaka do ia vara? (b) Unai amo daika ese namo do ia davaria, bona dahaka dainai?
4 To taunimanima haida be gado goevadaena do idia abia lasi. Peroveta hereva ese idia ia herevalaia, ia gwau: “Badina be unai neganai umui emui huanai dekena amo, hekokoroku bona dagedage taudia ibounai do lau kokia ore.” (Sepanaia 3:11) Unai dainai hekokoroku taudia, Dirava ena taravatu idia negea bona kara dika idia karaia taudia unai, do ia kokia. Unai amo, daika be namo do idia abia? Sepanaia 3:12, 13 ia gwau: “Badina be lau [Iehova] ese emui lalonai idia noho manau taudia, bona hekokoroku lasi taudia do lau rakatania, idia be umui emui huanai do idia noho. Idia ese lau Lohiabada idia abidadama henia noho. Vadaeni unai do mauri noho Israela taudia ese, kara dika ta do idia karaia lasi. Hereva koikoi ta do idia gwauraia lasi, bona kara koikoi do idia karaia lasi. Noho namo do idia davaria, bona do idia mahuta namonamo. Idia ese tau ta dekenai do idia gari henia lasi.”
5 Idaunegai Iuda dekenai ia noho abidadama taudia oredia ese namo do idia davaria. Dahaka dainai? Badina inai hereva idia badinaia dainai, ia gwau: “Umui manau taudia ibounai e, Lohiabada ena oda umui kamonai henia noho taudia e, Lohiabada do umui tahua mai noinoi danu. Kara maoromaoro do umui karaia, bona Lohiabada ena vairanai do umui manau. Unai neganai sedira iena badu dinana dekenai, Lohiabada ese umui do ia naria.”—Sepanaia 2:3.
6. Sepanaia ena peroveta herevana ena hagugurua negana ginigunana ai dahaka ia vara?
6 Sepanaia ena peroveta herevana ena hagugurua negana ginigunana ai, Dirava ese abidadama lasi Iuda besena ia panisia dalana be Tanobada ena Basileia Badana, Babulonia, ia koua lasi bona lagani 607 B.C.E. ai, Iuda ena taunimanima ia abia mauri. Idia haida, Ieremia bona ma haida, idia hamasea lasi, bona ma haida be unai igui hesiai negana lalonai Iehova idia abidadama henia noho. Bena, lagani 539 B.C.E. ai, King Sairasi ena lohia henunai, Mede bona Parasa taudia ese Babulonia idia hamorua. Lagani rua murinai, Sairasi ese ia henia oda ta be Iuda taudia oredia dekenai dala ia kehoa edia tano dekenai idia giroa totona. Gabeai, Ierusalema ena dubu idia haginia lou, bona dala ia noho hahelaga taudia ese taunimanima dekenai Taravatu idia hadibaia lou diba. (Malaki 2:7) Unai dainai Iehova ese ia hanamoa lou taudia oredia ia durua noho—to gau badana be ia idia abidadama henia noho.
7, 8. Sepanaia 3:14-17 ena peroveta herevadia be daika dekenai idia momokani, bona dahaka dainai unai bamona oi haere?
7 Sepanaia ese unai namo lou karana do idia moalelaia taudia ia perovetalaia, ia gwau: “Siona taudia e, mai moale bada danu ane do umui abia. Israela taudia e, do umui boiboi. Ierusalema taudia e, mai emui kudoudia ibounai do umui moale! Lohiabada ese emui matakani ia haorea vadaeni. Ia ese umui idia hadikaia gwauraia taudia ia negedia lao vadaeni. Lohiabada, Israela ena King, be umui dekenai ia noho. Gau ta do umui gari henia lou lasi. Unai dina ia ginidae neganai, Ierusalema dekenai do idia gwau, ‘Siona taudia e, do umui gari lasi. Emui imadia do umui ha-aukaia, do umui manoka lasi. Lohiabada, emui dirava be umui dekenai ia noho, bona iena siahu ese kwalimu umui dekenai ia henia noho. Lohiabada ese umui do ia moalelaia bada, bona iena lalokau dekena amo, mauri matamata umui dekenai do ia henia. Umui totona Dirava do ia moale, mai ena ane abia danu.’ ”—Sepanaia 3:14-17.
8 Unai peroveta herevadia ese Babulonia idia rakatania bona edia tano korikori dekenai idia giroa lao orena taudia ia herevalaia. Sepanaia 3:18-20 ese unai ia hahedinaraia goevagoeva, ia gwau: “ ‘Lau ese dika bada dinana ena gari, be umui dekena amo do lau haorea. Emui hemarai danu do lau kokia ore. Unai dina ia ginidae neganai, lau ese umui idia dagedage henia noho taudia ibounai, edia davana do lau henia. Aena dika taudia do lau hamauria, bona gabu daudau dekenai idia noho hesiai mai guia danu taudia, be do lau haboua, bona edia gabu korikori dekenai do lau mailaidia lou. Edia hemarai be hanamoa dekenai do lau halaoa, bona tanobada taudia ibounai ese idia do idia hanamoa. Unai dina ia mai noho! Lau ese gabu idauidau dekenai, bese idauidau edia huanai umui noho taudia, do lau mailaia lou, emui gabu korikori dekenai. Emui ladana do lau hanamoa bona habadaia, tanobada kahana ibounai dekenai, bona emui noho namo ma do lau havaraia lou.’ Lau inai Lohiabada lau hereva vadaeni.”
9. Edena dala ai Iehova be iena ladana ia habadaia Iuda dainai?
9 Dirava ena taunimanima edia inai taudia, idia badinai idia noho besedia unai, edia hoa mani oi laloa! Basileia goadana Babulonia ese Iuda dekenai idia noho taudia ia abia mauri, toana be idia do ia ruhaia lasi. Danu, edia tano ia noho kava. To Dirava ena siahu amo, lagani 70 murinai, edia tano dekenai idia giroa lao, to edia inai besedia ese dika do idia davaria. Iehova ese ena abidadama orena taudia ia abia giroa neganai, ena ladana ia habadaia! Ia ese edia ‘ladana ia hanamoa bona habadaia, tanobada kahana ibounai dekenai.’ Unai hanamoa lou karana ese Iehova bona iena ladana idia abia taudia ia hanamoa bada!
Iehova Ena Tomadiho Ia Abia Isi
10, 11. Sepanaia ena hanamoa lou peroveta herevana ena guguru negana badana be edena negai, bona dahaka dainai unai ita diba?
10 Hanamoa lou karana ma ta be aposetolo taudia edia negai, unai neganai Iesu ese Israela taudia oredia ia haboua tomadiho momokanina lalonai. Unai ese do idia vara gaudia ia laulaulaia, badina unai hanamoa lou karana ena hagugurua negana badana be dohore. Mika ena peroveta herevana ia gwau: “Nega gabeai dinadia neganai, Dubu helaga ia gini ena ororo, be ataiai herea do ia lao. Ororo ibounai edia lata be ia ese do ia hanaia. Bese idauidau taudia momo, be inai ororo dekenai do idia mai.”—Mika 4:1.
11 Edena negai unai do ia vara? Peroveta herevana ia gwau, ‘dina gabedia’ ai—oibe, hari inai “nega ena dokona” ai do ia vara. (2 Timoteo 3:1) Inai tanobada ena oromana dikana ia do ore lasi, bona taunimanima ese dirava koikoidia idia do tomadiho henia negana lalonai do ia vara. Mika 4:5 ia gwau: “Bese ta ta ibounai ese sibodia edia dirava, edia dirava idia tomadiho henia bona kamonai henia.” Bona tomadiho momokani taudia be edena bamona? Mika ena peroveta herevana ese ia haerelaia, ia gwau: “To ita ese Lohiabada, iseda Dirava do ita tomadiho henia, bona kamonai henia, ela bona hanaihanai.”
12. Dina gabedia ai, edena dala ai tomadiho momokanina be ataiai ia noho?
12 Unai dainai, inai dina dokodia ai, Iehova ena ‘Dubu helaga ia gini ena ororo, be ataiai herea ia lao vadaeni. Ororo ibounai edia lata be ia ese ia hanaia.’ Iehova ena ataiai herea tomadiho momokanina ia haginia lou, ia gini goada, bona tomadiho idauidau ibounai ia hanaia. Bona, Mika ese ia perovetalaia hegeregerena, “momo, be inai ororo dekenai do idia mai.” Tomadiho momokanina idia badinaia taudia ese ‘Iehova do idia tomadiho henia, bona kamonai henia, ela bona hanaihanai.’
13, 14. Edena negai inai tanobada ena “gabeai dinadia” idia matamaia, bona unai murinai tomadiho momokani dekenai dahaka ia vara?
13 Baibel ena peroveta herevadia, idia guguru herevadia, ese idia hamomokania inai tanobada ena “gabeai dinadia”—ena dina dokodia—be lagani 1914 ai idia hamatamaia. (Mareko 13:4-10) Histori ese ia hahedinaraia unai neganai Iehova ese abidadama horoa taudia oredia be tomadiho momokanina dekenai ia haboua, bona unai taudia edia helaro be guba dekenai do idia lao. Unai murinai, “hutuma bada herea . . . bese idauidau bona iduhu idauidau bona kopina idauidau bona gado idauidau amo” taudia ia haboua—bona edia helaro be tanobada dekenai mauri hanaihanai do idia abia.—Apokalupo 7:9, NW.
14 Tanobada Ibounai Tuarina Ginigunana ena nega amo ema bona hari, Iehova tomadiho henia taudia, iena ladana idia abia taudia unai, be iena hahekau idia badinaia bona idia goada idia lao. Tanobada Ibounai Tuarina Ginigunana murinai, Iehova idia tomadiho henia taudia be tausen haida sibona, to hari idia be milioni 6 bamona, bona edia kongregesen 91,000 be tano 235 ai idia noho. Lagani ta ta ai, unai Basileia harorolaia taudia ese hora bilioni ta ia hanaia idia gaukaralaia taunimanima vairanai Dirava idia hanamoa totona. Ia hedinarai goevagoeva Iehova ena Witnes taudia ese Iesu ena peroveta herevadia idia hagugurua: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.”—Mataio 24:14.
15. Sepanaia 2:3 be edena dala ai ia guguru?
15 Sepanaia 3:17 ia gwau: “Emui Dirava be umui dekenai ia noho, bona iena siahu ese kwalimu umui dekenai ia henia noho.” Hari dina dokodia ai, Iehova ena hesiai taudia be lauma dalana ai idia taga bona unai idia moalelaia diba badina be edia siahu ibounai Diravana be idia “dekenai ia noho.” Lagani 537 B.C.E. ai, idaunegai Iuda ia namo lou negana lalonai unai be momokani, bona hari ia momokani danu. Unai dainai, harihari ita itaia diba edena dala ai Sepanaia 2:3 be dala badana ai do ia guguru iseda nega lalonai, badina ia gwau: “Umui manau taudia ibounai e, . . . Lohiabada do umui tahua mai noinoi danu.” Lagani 537 B.C.E. ai, “ibounai” ena anina be Babulonia ena igui hesiai gaukara idia rakatania Iuda taudia oredia ibounai. Harihari unai hereva be tanobada ibounai lalonai idia noho manau taudia, Basileia harorolaia gaukarana idia abia dae bona Iehova ena ruma ena “ororo dekenai idia mai” taudia unai, ia gwauraia.
Tomadiho Momokanina Ia Tubu
16. Hari inai nega lalonai, iseda inai taudia ese Iehova ena hesiai taudia edia taga idia itaia neganai, reana dahaka idia laloa?
16 Lagani 537 B.C.E. murinai, kahirakahira idia noho besedia ese Dirava ena hesiai taudia hanamoa lou gaukarana, edia tano dekenai idia giroa lao bona tomadiho momokani idia badinaia lou karana, idia itaia neganai idia hoa. To, unai hanamoa lou gaukarana be dala maragina ai ia vara. Hari inai negai taunimanima haida—Dirava ena hesiai taudia idia inai henia taudia danu—ese Iehova ena hesiai taudia edia orea ena tubu daekau dalana, ena taga lauma dalanai, bona ena heau noho dalana idia itaia dainai, edia hereva be dahaka? Reana unai inai taudia haida edia hemami be Farisea taudia edia hemami hegeregerena. Taunimanima be Iesu dekenai idia lao neganai, Farisea taudia edia hereva be inai: “Umui itaia, . . . tanobada ibounai be iena murina dekenai idia raka vadaeni.”—Ioane 12:19.
17. Toretore tauna ta be Iehova ena Witnes taudia ia herevalaia neganai, dahaka ia gwau, bona orea ena tubu be edena bamona?
17 Profesa Charles S. Braden be ena buka ta, These Also Believe, lalonai ia gwau: “Iehova ena Witnes taudia be tanobada ibounai lalonai haroro gaukara idia karaia vadaeni. Mai momokani ida ita gwau diba inai tanobada ena tomadiho oreana ma ta ese Iehova ena Witnes taudia edia Basileia ena sivarai namona harorolaia goadagoada karana bona edia haheauka idia hahedinaraia lasi. Toana be unai orea do ia goada lao noho.” Iena hereva be maoro momokani! Unai hereva be lagani 50 gunanai ia torea, bona unai neganai tanobada hegegemadai idia haroro Witnes taudia edia namba be 300,000 sibona. Harihari bema iseda gaukara ia itaia dahaka do ia gwau, badina be sivarai namona harorolaia taudia edia namba be nega 20 amo idia habadaia bona hari milioni 6 bamona idia noho?
18. Gado goevadaena be dahaka, bona Dirava ese daidia dekenai ia henia?
18 Dirava be iena peroveta tauna amo inai gwauhamata ia henia: “Unai neganai lau ese bese idauidau edia gado do lau haidaua bona gado goevadaena do lau henidia, Iehova ena ladana do idia noinoi henia totona, bona iena hesiai gaukara be mai edia lalo-tamona ida do idia karaia hebou totona.” (Sepanaia 3:9, NW ) Hari dina gabediai ai, Iehova ena Witnes taudia ese Iehova ena ladana idia noinoi henia, bona mai lalo-tamona ida ena hesiai gaukara idia “karaia hebou,” bona ta ese edia lalokau heheni karana ia hamakohia diba lasi. Iehova ese idia dekenai gado goevadaena ia henia. Unai gado goevadaena ena anina be Dirava bona Dirava ena ura edia sivarai momokanina ita lalo-pararalaia namonamo. Iehova sibona ese unai lalo-parara ia henia diba, bona iena lauma helaga amo unai ia karaia. (1 Korinto 2:10) Iena lauma helaga be daika dekenai ia henia? Iena lohia dalana idia “kamonai henia taudia” sibodia dekenai ia henia. (Kara 5:32) Iehova ena Witnes taudia sibodia be mai edia ura ida, edia kara ibounai lalonai Dirava idia badinaia, ia be edia Lohia. Unai dainai idia be Dirava ena lauma idia abia bona gado goevadaena, hereva momokanina Iehova bona ena ura namodia dekenai, idia herevalaia. Bona tanobada ibounai lalonai, unai gado goevadaena idia gaukaralaia Iehova hanamoa gaukarana idia goadalaia totona.
19. Gado goevadaena herevalaia ena anina be dahaka?
19 To gado goevadaena herevalaia ena anina be hereva momokani ita abia dae bona ma haida dekenai ita hadibaia sibona lasi, to namona be iseda kara be Dirava ena taravatu bona hakaua herevadia hegeregerena. Horoa Keristani taudia be Iehova idia tahua bona gado goevadaena gaukaralaia karana idia gunalaia. Idia karaia vadaeni gaudia mani oi laloa! Ena be horoa taudia edia namba ia diho lao 8,700 henunai, to taunimanima ma milioni 6 bamona ese edia abidadama idia tohotohoa dalana be Iehova idia tahua bona gado goevadaena idia gaukaralaia danu. Idia be ia bada ia lao hutuma bada herea, bese idauidau amo, bona unai taudia ese Iesu ena mauri davalaia boubouna idia abidadama henia, Dirava ena lauma dubuna ena tanobada ariara ai hesiai gaukara helagana idia karaia, bona nega daudau lasi murinai inai kara maoromaoro lasi tanobadana dekenai do ia vara ‘hisihisi badana’ amo do idia roho mauri.—Apokalupo 7:9, 14, 15.
20. Abidadama horoa taudia bona hutuma bada herea taudia vairanai dahaka ia noho?
20 Nega daudau lasi murinai, hutuma bada herea be Dirava ena kara maoromaoro tanobada matamatana dekenai do idia vareai. (2 Petero 3:13) Iesu Keriso bona guba maurina idia abia 144,000 horoa taudia, ia danu guba dekenai king bona hahelaga gaukara idia karaia taudia, be tanobada lohiaia taudia matamatadia ai do idia lao. (Roma 8:16, 17; Apokalupo 7:4; 20:6) Bena hisihisi badana amo idia roho mauri taudia do idia gaukara noho tanobada be paradaiso ai do ia lao totona, bona Dirava ia henia gado goevadaena do idia herevalaia noho. Inai hereva be mai anina idia dekenai: “Lau sibona [Iehova] ese oiemu noho taudia do lau hadibaia, vadaeni mauri namona bona maino do idia davaria. Kota maoromaoro bona kara maoromaoro ese oi do ia hagoadaia.”—Isaia 54:13, 14.
Do Ia Vara Hadibaia Gaukara Hereadaena
21, 22. (a) Kara 24:15 ena hereva hegeregerena, daidia ese gado goevadaena do idia dibaia be namo? (b) Edena hadibaia gaukara hereadaena be tanobada dekenai, Basileia ena siahu henunai, do ia vara?
21 Tanobada matamatana ai, hutuma badana ma ta ese gado goevadaena do idia dibaia bona Kara 24:15 ese idia ia herevalaia, ia gwau: “Mase taudia dohore idia toreisi lou, kara maoromaoro taudia, bona kara maoromaoro lasi taudia danu.” Guna, taunimanima bilioni momo idia mauri bona idia mase vadaeni, to Iehova idia diba namonamo lasi. Ia heau namonamo dalana ai, ia ese idia do ia hamauria lou. Bona unai bamona toreisi lou taudia ese gado goevadaena do idia dibaia be namo.
22 Unai hadibaia gaukara badana lalonai ita vareai neganai, hahenamo badana ta do ita abia! Taunimanima edia histori ibounai lalonai, unai be hadibaia gaukara hereadaena. Unai gaukara ibounai be Keriso Iesu ena Basileia siahuna henunai do ita karaia. Unai dainai, gabeai taunimanima ese Isaia 11:9 ena hagugurua negana do idia itaia, ia gwau: “Tanobada ibounai, be [Iehova] ena diba maoro dekena amo do ia honu momokani, davara be ranu dekenai ia honu bamona.”
23. Dahaka dainai ita gwau diba Iehova ena taunimanima be hahenamo momo idia abia?
23 Ita abia hahenamo be inai dina gabedia lalonai do ita abia nega namona totona ita hegaegae diba, unai neganai Iehova ena diba be tanobada ibounai do ia hahonua momokani! Bona hari ita abia hahenamo ma ta be ita be Dirava ena taunimanima, bona ita be Sepanaia 3:20 ena peroveta herevadia edia hagugurua negana badana ita itaia! Unai siri lalonai Iehova ena hagoadaia herevadia idia noho, ia gwau: “Emui ladana do lau hanamoa bona habadaia, tanobada kahana ibounai dekenai.”
Edena Bamona Do Oi Haere?
• Sepanaia ena hanamoa lou peroveta herevana ena hagugurua negadia be dahaka?
• Hari inai dina gabedia ai, edena dala ai tomadiho momokani be ia bada ia lao?
• Tanobada matamatana lalonai, edena hadibaia gaukara hereadaena do ia vara?
[Picture on page 25]
Iehova ena taunimanima be edia tano dekenai idia giroa, tomadiho momokani idia haginia lou totona. Hari, inai ena anina oi diba, a?
[Pictures on page 26]
Iehova ena Witnes taudia be “gado goevadaena” idia herevalaia amo, taunimanima dekenai Baibel ena hagoadaia sivaraina idia henia