Duahia Taudia Edia Henanadai
Iehova ese Iesu ena mauri davalaia boubouna amo iseda kara dika ia gwauatao karana ita laloa neganai, dahaka dainai Keristani taudia ese kongregesen ena elda taudia dekenai edia kara dika idia gwauraia hedinarai be gau badana?
Davida bona Bataseba dekenai ia vara gauna amo, ita itaia diba Davida ia helalo-kerehai momokani dainai, Iehova ese Davida ena kara dika ia gwauatao, ena be unai kara dika ia bada herea. Peroveta tauna Natana be ia dekenai ia lao neganai, Davida ese ena kara dika ia gwauraia hedinarai, ia gwau: “Lohiabada dekenai lau kara dika vadaeni.”—2 Samuela 12:13.
To, kara dika taudia ese edia kara dika gwauraia hedinarai karana be Iehova ese ia abia dae bona edia dika ia gwauatao sibona lasi, to mai lalokau ida heduru gaudia ia henia danu, kerere tauna be lauma dalanai ia goada ia lao lou totona. Davida dekenai heduru be peroveta tauna Natana amo ia mai. Hari, kongregesen lalonai be lauma dalanai idia goada elda taudia idia noho. Hahediba tauna Iamesi, ia gwau: “[Lauma dalanai] umui ta ia gorere, a? Ia ese ekalesia gunalaia taudia do ia boiria be namo. Idia ese ia dainai do idia guriguri, bona ia dekenai dehoro do idia atoa, Lohiabada ena ladana dekenai. Inai guriguri mai abidadama danu ese gorere tauna do ia hanamoa. Lohiabada ese iena mauri do ia hanamoa, bona iena kara dika do ia gwauatao.”—Iamesi 5:14, 15.
Mai edia diba elda taudia ese edia kara dika dainai idia lalohisihisi taudia edia hisihisi idia hamaragia diba. Kara dika tauna idia kara henia neganai, idia hekwarahi Iehova ena kara idia tohotohoa totona. Idia ura lasi idia kara auka henia, herevana sisiba aukana do idia henia be maoro. To, mai hebogahisi ida idia laloa unai tauna ese dahaka heduru ia abia haraga be namo. Mai haheauka ida Dirava ena Hereva idia gaukaralaia karana amo, kerere tauna ena lalohadai idia hamaoromaoroa toho. (Galatia 6:1) Ena be ta ese guna ena kara dika ia gwauraia hedinarai lasi, to reana elda taudia ese idia hereva henia dainai do ia helalo-kerehai, Natana ese ia hereva henia neganai Davida ia karaia bamona. Elda taudia ese idia henia heduruna ese kerere tauna ia durua ia kara dika lou lasi totona, bona kara dika ia karaia noho karana amo idia vara gau dikadia ia koua.—Heberu 10:26-31.
Ta ese haida dekenai ena dika, ia hemarailaia gauna, ia gwauraia hedinarai bona gwauatao karana ia tahua be auka. Lalona ena goada ia noho be namo. To, ia gwauraia hedinarai lasi dainai ia vara gauna be nega sisina mani ita laloa. Ena kara dika be kongregesen ena elda taudia dekenai ia gwauraia hedinarai lasi tauna ta ia gwau: “Ia ore lasi lalohisihisina lau mamia. Egu haroro gaukara lau habadaia, to unai hemami dikana ia do noho.” Ia laloa guriguri amo Iehova dekenai ena dika ia gwauraia hedinarai be hegeregere, to ia hedinarai goevagoeva unai sibona be hegeregere lasi, badina ena hemami be King Davida ena bamona. (Salamo 51:8, 11) Unai dainai elda taudia amo Iehova ena lalokau heduruna ita abia be namo herea!