Dahaka Dainai Kara Dika Ita Ripotilaia?

WEST Africa dekenai, haida edia hereva ta be inai: “Kara ta ia gwauraia hedinarai tauna be taunimanima edia inai tauna ai ia lao.” Olu dekenai unai bamona ia vara, ia ese ena kakana be edia taihuna ia sihari henia dainai ia samania neganai. Iena kakana ese ia lolo henia: “Oi be koikoi tauna!” Bena Olu ia botaia dikadika, edia ruma amo ia lulua, bona Olu ena dabua ibounai ia gabua. Hanua taudia be ena kakana ena kahanai idia gini. Hanua dekenai idia lalo-namo henia lasi dainai, Olu be hanua ia rakatania. Gabeai hari kekeni ia rogorogo neganai, taunimanima idia lalo-parara Olu ia hereva momokani. Olu ena kakana ese ena kara ia gwauraia hedinarai, bona Olu be ma idia lalo-namo henia lou. To unai neganai reana kara idauna ta ia vara diba. Reana unai neganai Olu idia alaia diba.

Momokani, Iehova idia lalokau henia lasi taudia be edia kara kerere hahedinaraia karana idia abia dae lasi. Taunimanima edia kara dika tauanina ena kara ta be sisiba aukana do idia dadaraia bona ia henia tauna idia badu henia. (Ioane 7:7 itaia.) Unai dainai momo be idia hereva lasi, nadi bamona, ena be siahu taudia dekenai ma haida edia kara dika idia gwauraia be namo, unai kara dika do idia hamaoromaoroa totona.

Sisiba Aukana Ena Namo Laloa Bada

To, Iehova ena taunimanima edia lalohadai sisiba aukana dekenai be idau. Dirava badinaia tatau bona hahine ese Keristani kongregesen lalonai idia kerere taudia durua dalana, Iehova ese ia karaia dalana, idia laloa bada. Idia lalo-parara unai matahakani henia karana be ia ese ena hebogahisi ia hahedinaraia dalana ta.​—⁠Heberu 12:​6-​11.

King Davida ena mauri lalonai ia vara karana ta amo unai ita haheitalaia diba. Ena be ia mero negana amo ia be kara maoromaoro tauna, to nega ta ia moru, kara dika badana ia karaia. Kara ginigunana be ia heudahanai. Bena, iena kerere ia hunia totona, dala ia karaia unai hahine ena tau do idia hamasea. To Iehova ese peroveta tauna Natana dekenai Davida ena kara dika ia hahedinaraia, bena ia ese Davida dekenai mai gari lasi ida ia herevalaia. Natana ese haheitalai mai siahuna ta ia gwauraia, Davida ia nanadaia dahaka do idia karaia bema taga tauna ta be mai ena mamoe momo to ogogami tauna ta ena mamoe natuna tamona, ia ura henia gauna, ia abia bena ia alaia iena turana ia ubua totona. Davida, guna mamoe ia naria tauna, be ia badu dikadika. Ia gwau: “Unai bamona ia karaia tauna harihari do ia mase be namo.” Bena Natana ese haheitalai ena anina lalonai Davida ia gwauraia, ia gwau: “Unai kohu momo tauna be oi!”​—⁠2 Samuela 12:​1-7.

Davida ese Natana ia badu henia lasi; eiava koua hereva ia gwauraia lasi o hepapahuahu karana ta ia karaia lasi. Lasi, to Natana ena sisiba ese iena lalona ia hadibaia. Iena kudouna ia gwadaia dainai, Davida ia gwau: “Lohiabada dekenai lau kara dika vadaeni.”​—⁠2 Samuela 12:⁠13.

Natana ese Davida ena kara dika ia gwauraia hedinarai, bona Dirava ena sisiba ia henia dainai, namo ia havaraia. Ena be Dirava ese Davida be ena kerere ena anina dikana amo ia koua lasi, to ia helalo-kerehai bona Iehova ese ia abia dae lou. Davida ese unai sisiba aukana be edena bamona ia laloa? Inai bamona ia torea: “Tau namona ese, iena bogahisihisi dekena amo, lau do ia dadabaia, o lau dekenai do ia gwau henia, be namo.”​—⁠Salamo 141:⁠5.

Hari iseda nega lalonai danu, Iehova ena hesiai taudia be kara dika badadia lalonai do idia vareai diba, lagani momo herea idia abidadama taudia danu. Idia momo idia diba elda taudia ese idia durudia diba dainai, idia dekenai idia lao heduru tahua totona. (Iamesi 5:​13-​16) To nega haida kara kerere tauna be ena kara dika do ia hunia toho, King Davida ia karaia hegeregerena. Ita be dahaka do ita karaia bema kongregesen lalonai kara kerere badadia edia sivarai ita diba?

Daika Ena Maduna?

Elda taudia be kara dika sivaraina ta idia diba neganai, ia karaia tauna dekenai idia lao heduru henia totona bona ena kara idia hamaoromaoroa. Keristani kongregesen lalonai unai bamona taudia idia hahemaoro henia be elda taudia edia maduna. Kongregesen ena lauma dalana idia gimaia namonamo dainai, aonega lasi dalana o dala kererena ai ia raka tauna idia durua bona sisiba henia.​​—⁠1 Korinto 5:​12, 13; 2 Timoteo 4:2; 1 Petero 5:​1, 2.

To bema oi be elda ta lasi bona Keristani tauna ma ta ese kara dika badana ta ia karaia sivaraina oi diba be edena bamona? Hakaua herevadia be Iehova ese Israela besena dekenai ia henia Taravatuna lalonai. Unai Taravatu ia gwau bema ta be tomadiho momokani negea karana, siahu taudia gwau-edeede henia, ala-ala, eiava kara dika badana ma ta ia itaia, iena maduna be ia diba gauna do ia ripotilaia bona hamomokania herevadia ia gwauraia. Levitiko 5:1 ia gwau: “Bema tau ta ese ia itaia gauna o ia diba gauna ta ia herevalaia diba kota gabuna dekenai, to ia herevalaia lasi, unai tau be ia kerere.”​—⁠Deuteronomi 13:​6-8; Eseta 6:2; Aonega Herevadia 29:⁠24 itadia.

Ena be Keristani taudia hari inai negai be Mose ena Taravatu henunai lasi, to ena hakaua herevadia ese idia ia hakaua diba. (Salamo 19:​7, 8) Vadaeni bema emu Keristani tadikaka ta ena kara dika badana ena sivarai oi diba, dahaka oi karaia be namo?

Oi Karaia Karana

Gau ginigunana be, kara dika badana ia vara sivaraina oi abia dae ena badina korikorina ta ia noho be mai anina bada. Aonega tauna ia gwau: “Oiemu badibadinai noho tauna do oi samania kava lasi, bona ia totona do oi hereva koikoi lasi.”​—⁠Aonega Herevadia 24:⁠28.

Reana emu lalona do oi hadaia maoromaoro elda taudia dekenai do oi lao. Unai bamona oi karaia be kerere lasi. To, nega momo lalokau karana be unai kerere tauna dekenai oi lao. Reana oi diba gaudia haida be sisina idau. Eiava reana elda taudia ese unai kara idia tahua noho vadaeni. Unai tauna ida mai emu manau ida umui herevalaia. Bema mai badina ta dainai oi laloa kara dika badana ta ia vara, oi hagoadaia elda taudia ia itaia heduru ia abia totona, bona oi hahedinaraia dahaka dainai unai ia karaia be aonega dalana. Ma haida dekenai unai kara oi herevalaia lasi, badina unai be udu mauri karana.

Bema unai tauna be nega sisina daudau lalonai elda taudia dekenai ia lao lasi, vadaeni namona be do oi lao. Elda ta o rua be oi ripotilaia tauna ida unai kara do idia herevalaia. Elda taudia be unai kara do idia “tahua namonamo,” kerere ia vara momokani eiava. Bema kerere ia vara, Baibel ena sisiba hegeregerena do idia kara.​—⁠Deuteronomi 13:​12-​14.

Samani herevana ta hamomokania totona, kerere sivaraina idia diba taudia rua edia hereva be hegeregere. (Ioane 8:​17; Heberu 10:28) Bema unai tauna ese samani herevana ia gorea bona ma ta lasi ese oiemu hereva ia hamomokania, Iehova ena imana dekenai do umui rakatania. (1 Timoteo 5:​19, 24, 25) Unai ia vara badina ita diba Iehova ena matana ai gau ta “ita hunia diba lasi” bona bema unai tauna ia kerere, gabeai ena kara dika “davana” do ia abia.​—⁠Heberu 4:13; Numera 32:⁠23.

Reana unai tauna ese samani herevana ia gorea bona oi sibona be iena kerere oi gwauraia hedinarai tauna. Unai neganai oi do idia gwauraia diba ladana hadikaia tauna, a? Lasi, bema oi ese unai kara lalonai idia vareai lasi taudia dekenai oi herevalaia lasi. To gau idauidau naria bona hamaoromaoroa siahuna bona maduna idia abia taudia dekenai kongregesen ia hadikaia diba gauna ta oi ripotilaia be ladana hadikaia karana lasi. Unai kara ena anina korikori be ita ura hanaihanai kara maorodia ita karaia bona Dirava ita badinaia.​—⁠Luka 1:​74, 75 itaia.

Kongregesen Lalonai Ita Helaga Noho

Kara kerere ita ripotilaia ena badina ta be kongregesen ia goeva noho totona. Iehova be Dirava goevana, Dirava helagana. Ia ura ia idia tomadiho henia taudia ibounai be lauma dalanai idia goeva bona edia kara ia goeva. Iena lauma amo ia havaraia Herevana ia gwau: “Dirava do umui kamonai henia. Guna, umui be do diari umui diba lasi neganai, emui tauanina ena ura dikadia ese umui idia biagua. Unai bamona do umui karaia lou lasi. To emui kara ibounai lalonai do umui helaga, umui ia boiria Diravana ese ia helaga hegeregerena. Badina be Buka Helaga lalonai Dirava sibona ia gwau, ‘Do umui helaga, badina lau be lau helaga noho.’ ” (1 Petero 1:​14-16) Miro karadia o kara dika idia karaia taudia ese kongregesen ibounai idia hamiroa diba bona ia latanai Iehova ena lalo-namo do ia noho lasi ela bona hamaoromaoroa karana ta idia karaia eiava unai taudia idia kokia.​—⁠Iosua, karoa 7 itaia.

Aposetolo Paulo ena revareva Korinto Keristani kongregesen dekenai ese idia hahedinaraia kara kerere idia ripotilaia dainai, unuseniai Dirava ena taunimanima hagoevaia karana ia vara. Revareva ginigunana ai, Paulo ia gwau: “Sivarai idia gwauraia loaloa noho, umui emui huanai be lebulebu kara ta ia noho. Inai bamona kara be Dirava diba lasi taudia danu idia karaia lasi. Kara be inai: Tau ta ese iena tamana ena adavana danu idia heudahanai.”​—⁠1 Korinto 5:⁠1.

Baibel ese ita ia hamaoroa lasi aposetolo tauna be daika amo unai sivarai ia kamonai. Reana Paulo ese unai kara ena sivarai be Stepana, Forotunato, bona Akaiko edia amo ia kamonai, badina idia be Korinto amo idia lao Efeso, Paulo ia noho gabuna. Paulo be Korinto Keristani kongregesen amo heduru tahua revarevana ta ia davaria danu. Herevana daika ena amo ia diba, to idia diba namonamo taudia ese Paulo dekenai idia ripotilaia neganai, ia be hakaua herevana ia henia diba. Ia tore henidia, ia gwau: “Unai kara dika tauna be emui orea dekena amo umui atoa siri.” Unai tauna be kongregesen murimurinai idia atoa siri.​—⁠1 Korinto 5:13; 16:​17, 18.

Paulo ena hakaua herevana ese anina namona ia havaraia, a? Oibe, namo bada ia havaraia! Unai kara kerere tauna be ena kerere ia lalo-pararalaia. Korinto taudia ia tore henia revareva iharuana ai, Paulo ese kongregesen taudia ia hamaoroa unai helalo-kerehai tauna ‘ena dika do idia gwauatao, bona iena lalona do idia hagoadaia be namo.’ (2 Korinto 2:​6-8) Unai dainai unai kerere idia ripotilaia karana amo kongregesen hagoevaia karana ia vara bona Dirava ida ena turana karana ia hadikaia tauna ese Dirava ena lalo-namo ma ia abia lou.

Paulo ese Korinto Keristani kongregesen dekenai ia siaia revareva ginigunana ai sivarai ma ta ita davaria. Unai neganai aposetolo tauna be unai kara idia ripotilaia taudia edia ladana ia gwauraia. Ia tore henidia, ia gwau: “Lauegu varavara taudia e, Kiloe ena varavara taudia ese umui emui sivarai lau dekenai idia hamaoroa. Idia gwau umui heai noho, heai noho.” (1 Korinto 1:11) Paulo ia diba unai heai, bona tatau abia isi kava karana, ese orea maragidia badinaia lalohadaina ia havaraia bona kongregesen ena lalo-tamona ia hadikaia diba. Unuseniai idia noho abidadama tamona tadikakadia edia namo lauma dalanai ia laloa bada dainai, Paulo be karaharaga kongregesen dekenai edia kara hamaoromaoroa sisibana ia torea.

Hari inai negai, tanobada hegegemadai kongregesen lalodiai tadikaka bona taihu momo herea be idia gaukara goada lauma dalanai kongregesen ia goeva noho totona, unai dainai idia ta ta idia hekwarahi Dirava ese idia ia lalo-namo henia noho totona. Unai ia vara totona haida be hisihisi idia davaria; haida idia kara maoromaoro noho dainai idia mase. Momokani kara dika ita laloa lasi o ita hunia ese ia hahedinaraia edia hekwarahi ita laloa bada lasi.

Kara Kerere Taudia Durua

Dahaka dainai kara dika momokani idia karaia taudia haida idia lao lasi kongregesen elda taudia dekenai? Nega momo ena badina be elda taudia dekenai idia lao ena namo idia lalo-pararalaia lasi. Haida idia laloa kerere, idia laloa bema edia kerere idia gwauraia hedinarai, kongregesen taudia iboudiai do idia diba. Haida be edia kara ena metau idia laloa kerere. Bona haida idia laloa ena be elda taudia edia heduru idia abia lasi, to sibodia edia kara do idia hamaoromaoroa diba.

To unai bamona kara kerere taudia be kongregesen elda taudia edia lalokau heduruna idia abia be namo. Iamesi be inai ia torea: “Umui ta ia gorere, a? Ia ese ekalesia gunalaia taudia do ia boiria be namo. Idia ese ia dainai do idia guriguri, bona ia dekenai dehoro do idia atoa, Lohiabada ena ladana dekenai. Inai guriguri mai abidadama danu ese gorere tauna do ia hanamoa. Lohiabada ese iena mauri do ia hanamoa, bona iena kara dika do ia gwauatao.”​—⁠Iamesi 5:​14, 15.

Unai be dala namo hereana kara kerere taudia idia durua lauma dalanai idia goada lou totona! Dirava ena Hereva amo sisiba namodia idia henia bona idia totona idia guriguri karana amo, elda taudia ese lauma dalanai idia gorere taudia idia durua edia dala kereredia amo idia giroa. Unai amo, helalo-kerehai taudia idia mamia lasi idia gwauraidia dika, to nega momo elda taudia ida idia hereva neganai edia hemami bona lalona ia namo lou. West Africa tau matamatana ta be sihari kava karana ia karaia bona hua haida lalonai ena kara dika ia hunia. Gabeai iena kara dika ia hedinarai neganai, elda taudia ia hamaorodia ia gwau: “Hari lau laloa bema unai neganai ta ese lau ia nanadaia lau bona unai kekeni huanai dahaka ia vara, unai be namo! Egu hemami ia namo lou egu kerere lau gwauraia hedinarai dainai.”​—⁠Salamo 32:​3-5 itaia.

Lalokau Korikori Karana

Dirava ena bapatiso hesiai taudia be ‘mase idia rakatania, bona mauri dekenai idia hanaia.’ (1 Ioane 3:14) To kara dika momokani idia karaia neganai, idia be mase dalana dekenai idia giroa lou. Bema heduru idia abia lasi neganai, edia kara kerere lalonai do idia lalo-auka, do idia ura lasi idia helalo-kerehai bona Dirava momokanina do idia tomadiho henia lou.​—⁠Heberu 10:​26-​29.

Kara kerere oi ripotilaia be mai emu momokani ida kara kerere tauna oi laloa karana. Iamesi be inai ia torea: “Lauegu varavara taudia e, bema umui ta be hereva momokani ena dala dekena amo ia raka siri, bona bema ta ese ia hakaua lou, . . . vadaeni unai dika tauna ese iena dala dikana ia rakatania, unai durua tauna ese unai tau ena lauma be mase dekena amo do ia hamauria. Bona unai durua tauna ena kara dika momo danu, be Dirava ese do ia gwauatao.”​—⁠Iamesi 5:​19, 20.

Vadaeni, dahaka dainai kara dika ita ripotilaia? Badina be anina namona ia havaraia. Momokani, kara kerere ripotilaia karana be Dirava dekenai, kongregesen dekenai, bona ia kara kerere tauna dekenai lalokau korikori hahedinaraia karana. Kongregesen taudia ta ta ese Dirava ena taravatu maoromaorodia idia badinaia momokani neganai, Iehova ese kongregesen ibounai do ia hanamoa bada. Aposetolo Paulo be inai ia torea: “[Iehova] ese umui do ia haginia goada ela bona dokona. Vadaeni Lohiabada Iesu Keriso ena mai dinana dekenai umui be kerere ta lasi.”​—⁠1 Korinto 1:⁠8.

[Picture on page 26]

Kara kerere tauna oi hagoadaia elda taudia ia hereva henia be lalokau karana

[Picture on page 28]

Elda taudia be heduru idia henia kara kerere taudia ese Dirava ena lalo-namo idia abia lou totona