Basileia Ena Helaro Oi Moalelaia!

MARCH 10, 2001 ai, taunimanima 5,784 be New York State ai, Betele famili badana ese idia gaukaralaia gabudia toi dekenai, moale bada hebouna totona idia mai. Unai be Gilead misinari sikuli ena klas namba 110 idia haorea dinana.

Carey Barber, Iehova ena Witnes taudia edia Hakaua Oreana tauna ta, ese iboudiai ia welkam henia bona program ia hamatamaia, ia gwau: “Ita moale, badina ita diba klas 110 dekenai Gilead stiuden taudia idia hadibaia vadaeni, misinari gaukara idia karaia totona, bona tanobada hegegemadai teritori idauidau dekenai idia siaia.”

Moale Noho Dalana

Tadikaka Barber ena hamatamaia herevadia murinai, Don Adams ese helai taudia, sikuli idia haorea stiuden taudia 48 danu, inai hereva ia henia, ena sinado be “Iehova Ena Hahenamo Dainai Ita be Taga Taudia.” Ena hereva be Aonega Herevadia 10:22 amo ia abia, bona helai taudia ia hadibaia Iehova ena hesiai taudia ese edia mauri lalonai Basileia idia atoa guna neganai, idia ia durua bona hanamoa. Ia ese stiuden taudia ia hagoadaia edia gaukara gabudia matamatadia idia abia neganai, ‘Makedonia dekenai heduru henia totona’ aposetolo Paulo idia boiria neganai, ia hahedinaraia lalohadai do idia hahedinaraia danu. (Kara 16:⁠9) Ena be Paulo ese hekwakwanai ia davaridia, to ia idia siaia gabuna dekenai mai ena ura bada ida ia haroro dainai, hahenamo badadia momo ia moalelaia.

Sikuli idia haorea klas taudia be hua ima lalonai Baibel idia stadilaia bona misinari gaukara totona mai anina bada gaudia idia dibaia negana ia ore vadaeni. To, Daniel Sydlik, Iehova ena Witnes taudia edia Hakaua Oreana tauna ta, ese idia ia hagoadaia diba abia karana do idia hadokoa lasi. Ena hereva ena sinado be “Umui be Hahediba Taudia Momokanidia,” bona ia gwau: “Ita be hahediba taudia ena anina be hanaihanai Iesu ena hereva ita badinaia. Unai ita karaia lalonai, nega ibounai mai eda ura ida iena hereva, ia gwauraia sivaraina, bona ia hadibaia gaudia ita kamonai henia.” Ia hahedinaraia Keriso ena hahediba taudia ese abia hidi idia karaia negadia ibounai lalonai, Biaguna ena hereva idia kamonaia; Dirava ena aonega be Keriso ena mauri lalonai ia hedinarai. (Kolose 2:⁠3) Ita ta lasi ita laloa diba, nega tamona Iesu ena hereva ita kamonai murinai, gau iboudiai ita diba vadaeni, unai dainai Tadikaka Sydlik ese sikuli idia haorea taudia ia hagoadaia Keristani hereva momokani do idia dibaia noho, badinaia noho, bona hadibaia noho, bena unai dala ai hereva momokani ese idia do ia ruhaia.​—⁠Ioane 8:​31, 32.

Ta be Dirava ena hesiai gaukara lalonai do ia moale noho totona, mai ena ura ida sisiba bona heduru ia abia dae be gau badana. Gilead ai ia hadibaia tauna Lawrence Bowen ia henia henanadai be: “Oiemu Nadinadi ese Oi Do Idia Sisiba Henia, A?” Ia hahedinaraia Baibel lalonai ta ena nadinadi be ena lalohadai bona hemami goadadia ida idia hakapua. Ta idia durua diba, bema Dirava ena lauma amo ia havaraia Herevana ena sisiba ese ena kudouna lalonai ia vareai momokani. (Salamo 16:7; Ieremia 17:10) Ta ena mauri dalana mai abidadama ese Iehova ena kudouna ia hamarerea diba danu. Hereva henia tauna ese Aonega Herevadia 23:​15, 16 ia duahia murinai, ia henanadai: “Oiemu Nadinadi ese Oi Do idia Sisiba Henia, A?” Ma ia gwau: “Ai guriguri do idia sisiba henia, bena umui ese Iehova ena kudouna do umui hamoalea bada. Ena hemami goadana do umui hamarerea. Oibe, umui ese mai kamonai ida emui gaukara matamata do umui karaia noho dainai, Dirava ena lalona do ia moale bada.”

Unai program ena kahana ena hereva ginigabena be Mark Noumair ese ia henia, Gilead ai ia do hadibaia matamaia lasi neganai, Kenya dekenai misinari gaukara ia karaia. Ena hereva ena sinado be “Oi Dogoatao Gauna Dekenai Oi Moale be Namo,” bona ia ese lalo-namo ena anina bada ia herevalaia. Hadibaia Tauna 6:9 ena hereva hegeregerena, Tadikaka Noumair ia gwau: “Oi noholaia maurina oi abia dae. Unai be ‘oi dogoatao gauna.’ Oi ura karaia to oi karaia lasi gaudia oi laloa bada lasi, to emu lalona ibounai ida oi noholaia maurina oi gaukaralaia namonamo. Oi ura gaudia, oi abia diba lasi gaudia, eiava emu gaukara matamatana ena namo lasi gaudia oi laloa noho karana ese lalohisihisi bona lalo-dika do ia havaraia.” Oibe, herevana edeseniai ita noho eiava eda noho dalana be edena bamona, to iseda noho dalana hegeregerena Dirava ia henia lalo-namo ita habadaia neganai, iseda Havaraia Tauna Badana ena hesiai gaukara ita moalelaia diba.

Basileia Gaukarana Bona Gilead Dekenai Idia Abia Ekspiriens Namodia

Unai herevadia amo idia abia sisiba namodia murinai, stiuden taudia ese edia sikuli huadia ima lalonai, haroro gaukara ai idia moalelaia ekspiriens haida idia gwauraia. Wallace Liverance, Gilead Sikuli ena rejistra tauna, ena hakaua henunai, sikuli idia haorea stiuden taudia idia hahedinaraia dahaka idia karaia bena unai amo taunimanima idia diba idia be Dirava ena gaukara karaia taudia. (2 Korinto 4:⁠2) Idia ese taunimanima haida edia lalona, Dirava amo idia abia lalona ena mamina, idia hamarerea diba. Stiuden taudia edia ekspiriens ese dala ai, ruma-ta-ruma-ta gaukarana ai, bona gabu ma haida ai idia davaria lalo-momokani taudia ida Baibel stadi idia hamatamaia daladia idia hahedinaraia. Nega haida ai, kamonai taudia idia hahedinaraia idia laloa Iehova ena orea ese ia karaia Baibel idia hahedinaraia bukadia be hereva momokani. Baibel siri ta ese ruma hahine ta ena lalona ia veria momokani. Hari Iehova ena Witnes taudia ida Baibel ia stadilaia.

Bena, Joel Adams ese guna Gilead sikuli dekenai idia lao taudia ia henanadai henia. Ena sinado be “Dibaia Karana Bona Iehova Hesiai Henia Karana Hadokoa Lasi.” Ia henanadai henidia taudia ese misinari matamatadia dekenai sisiba namodia idia henia. Harry Johnson ese Gilead klas namba 26 lalonai ia noho negana ia laloatao, ia gwau: “Ai idia hadibaia idaunegai amo Iehova ese ena taunimanima ia hakaua bona do ia hakaua noho. Unai herevadia lau abia dae momokani dainai, idia hanaia laganidia lalonai lau idia hagoadaia.” William Nonkes, Gilead klas namba 53 tauna ta, ese sikuli idia haorea taudia ia sisiba henia, ia gwau: “Gau badana be, Baibel ena hakaua herevadia umui laloatao, bona emui mauri lalonai umui karaia abia hidi iboudiai lalonai umui badinaia, harihari amo ela bona hanaihanai. Unai dala ai, umui dekenai idia henia gaukarana do umui karaia diba, bona Iehova ena hahenamo badadia do umui abia.”

Richard Rian ese program lalonai ia karaia kahana totona ia abia hidi sinado be “Iehova Ena Ura Karaia Totona Goada Umui Abia.” Ia henanadai henia tauna ta be John Kurtz, klas namba 30 ia haorea, bona lagani 41 ai Spain dekenai misinari gaukara ia karaia. Tadikaka Kurtz amo Gilead ai idia stadilaia gaudia ia nanadaia neganai, ia gwau: “Stadi buka badana be Baibel. Bona Baibel stadi lalonai ai gaukaralaia gaudia ai abia, Baibel ai lalo-pararalaia totona. Unai gaudia be ita ibounai ita abia diba. Gilead dekenai hehuni herevadia idia halasia lasi. Hanaihanai unai lau gwauraia hedinarai, badina ita ibounai ese Gilead dekenai idia hadibaia gaudia ita stadilaia diba.”

Tadikaka Gerrit Lösch, Iehova ena Witnes taudia edia Hakaua Oreana tauna ta, ese lauma gaudia ia hahedinaraia program haorea totona ia henia herevana ena sinado be “Iehova Ena Hanina Ataiai Bona Henunai.” Ia hahedinaraia Baibel lalonai, ugava ena hanina ese Dirava ena kamonai hesiai taudia ia naria bona durua karana idia laulaulaia. (Deuteronomi 32:​11, 12; Salamo 91:⁠4) Nega haida ugava badana ese hora momo lalonai ena hanina ia atoa maoromaoro, ena natudia ia koua totona. Nega haida, ugava sinana ese ena hanina amo ena natudia ia kumia, lai keruma amo idia ia naria totona. Unai dala ai bona Iena ura hegeregerena, Iehova ese ena kamonai hesiai taudia ia durua diba, bona lauma dalanai hekwakwanai idia davaria neganai, unai ia karaia badabada. Iehova ese dala ia koua hedibagani badadia ese ena hesiai taudia idia hamorua lasi totona, bona dala ia kehoa hedibagani idia haheaukalaia diba totona. (1 Korinto 10:13) Tadikaka Lösch be ena hereva dokonai ia gwau: “Iehova ese lauma dalanai ita ia naria totona, iena hanina henunai ita noho be namo. Unai ena anina be sibona eda lalona dekenai ita tabekau lasi. Namona be hanaihanai Iehova bona ena sinana bamona oreana kahirakahira ai ita noho, bona edia hakaua bona lalokau sisiba ita dadaraia lasi.”

Seamani ese tanobada ena kahana idauidau amo idia mai telegram bona hahenamo herevadia ma haida ia duahia. Unai murinai kosi haorea pepadia idia abia. Gilead Sikuli idia haginia neganai, edia palani be lagani ima lalonai klas haida do idia karaia. To Iehova Dirava ena heduru dainai, unai sikuli be lagani 58 lalonai idia karaia vadaeni. Tadikaka Barber be ena hamatamaia herevadia lalonai ia gwau: “Lagani 1943 ai Gilead idia hamatamaia negana amo, Gilead sikuli idia haorea taudia ese gaukara badana idia karaia vadaeni! Idia ibounai edia gaukara ita laloa neganai, ita itaia idia ese tanobada ena manau taudia tausen handred momo be Iehova ena orea mai hairaina dekenai idia hakaua.” Oibe, inai misinari sikuli dainai taunimanima milioni momo ese Basileia ena helaro idia moalelaia.

[Box on page 24]

KLAS TAUDIA

Edia tano idauidau: 8

Idia lao henia tanodia idauidau: 18

Klas taudia ibounai: 48

Edia mauri lagani edia averes: 34

Lagani hida hereva momokani lalonai, edia averes: 18

Lagani hida ful-taim hesiai gaukara idia karaia, edia averes: 13

[Picture on page 25]

Watchtower Bible School of Gilead Ena Klas Namba 110

Inai lista ai, laini edia namba be vairana kahana amo ia daekau murina kahana, bona laini ta ta ai idia gini taudia edia ladadia be laurina kahana amo ela bona idibana kahana.

(1) Vacek, E.; Madelin, L .; Evans, G.; Watanabe, K. (2) Trafford, P.; Turfa, J.; Wilson, P.; Williams, R.; Weber, A. (3) Johnson, T.; Hanau, K.; Mourlhou, F.; Charpentier F.; Peckham, R.; Androsoff, P. (4) Seegers, T.; Seegers, D.; Bailey, P.; Bailey, M.; Madelin, K.; Lippold, E.; Lippold, T. (5) Evans, N.; Gold, R.; Bollmann, I.; Vacek, R.; Oundjian, J.; Wilson, N. (6) Turfa, J.; Zuidema, L .; Zuidema, R.; Bengtsson, C.; Bengtsson, J.; Galano, M.; Galano, L . (7) Peckham, T.; Mourlhou, J.; Charpentier, C.; Gold, M.; Bollmann, R.; Oundjian, F. (8) Weber, R.; Johnson, B.; Hanau, D.; Watanabe, Y.; Williams, R.; Trafford, G.; Androsoff, T.