Taunimanima ese Idia Badinaia Auka Gaudia Ita Hanaia Diba
1 Idaunega amo ema bona hari, Satani be hahediba hereva koikoidia amo taunimanima momo edia kudouna bona lalona ia hadiburaia. Unai hahediba hereva koikoi haida be, Toi Tamona, souli ia mase diba lasi, bona hel lahina. Satani ese daradara ia havaraia dainai, momo idia daradara Dirava ia noho o lasi bona Baibel be Dirava ese ia havaraia o lasi. Kopina idauidau taudia inai henia karana, bese abia isi karana, o koua gaudia ma haida dainai, taunimanima ese hereva momokani idia abia dae be auka. (2 Kor. 4:4) Edena dala ai taunimanima ese idia badinaia auka gaudia ita hanaia diba?—2 Kor. 10:4, 5.
2 Edia Kudouna: Taunimanima momo be mai kudouna ibounai ida edia tomadiho ena hadibaia hereva koikoidia idia badinaia. Haida be idia maragi negana amo unai hahediba herevadia idia badinaia. Unai bamona taudia ita durua namonamo totona, namona be eda hereva amo ita hahedinaraia ita be edia lalohadai ita matauraia.—1 Pet. 3:15.
3 Hegeregere, idia ese idia abia dae gaudia bona edia badina idia herevalaia neganai, namona be ita kamonai. (Iam. 1:19) Reana haida be idia lalokau henia tauna ta ia mase bona idia ura idia itaia lou, badina idia laloa mase tauna be mai ena lauma. Eiava krismas o holide negadia ma haida idia moalelaia, badina idia laloa unai be nega namona edia famili taudia ida idia moale hebou totona. Bema unai bamona taudia edia hereva ita kamonai, vadaeni edia hemami do ita lalopararalaia bona dala maorona ai do ita haroro henidia.—Aon. 16:23.
4 Iesu Tohotohoa: Iesu ese taravatu hadibaia tauna ta ena henanadai ia haerelaia dalana be haheitalai namona bona ia ita tohotohoa be namo. Iesu be maoromaoro unai henanadai ia haerelaia lasi, bona reana unai tau be ia abia dae gaudia ia laloa bada dainai Iesu ena haere do ia abia dae lasi. To, Iesu be siri ta ia gwauraia, unai tau ia noia ena lalohadai ia gwauraia, bona parabole ta ia gwauraia unai tau ia laloparara totona.—Luka 10:25-37.
5 Hahediba hereva koikoidia be idau bona Baibel ena hereva momokani be idau. (Heb. 4:12) Mai haheauka ida hereva momokani amo kamonai taudia edia kudouna ita veria neganai, idia be hahediba hereva koikoidia do idia dadaraia bona idia ia ruhaia diba hereva momokani do idia abia dae.—Ioa. 8:32.