Inai Oi Laloatao, A?

Vanegai idia halasia Gima Kohorona magasin edia hereva be mai moale ida oi duahia, a? Vadaeni, mani oi tohoa bema inai henanadai oi haerelaidia diba:

• Germany ena Federal Konstitusenel Kota ese tomadiho dainai dahaka kwalimu herevana ia henia?

Unai kota ese Iehova ena Witnes taudia bona idia be taunimanima edia taravatu ena koporeisen ta do idia gwauraia totona, guna kota ma ta ese edia hereva idia abia dae lasi karana ia dadaraia. Unai kwalimu herevana lalonai idia gwau tomadiho ena ura kwalimu taravatuna lalonai, ta ese ‘ena hahediba herevadia ia badinaia’ to gavamani ena lasi.​—⁠8/15, rau 8.

• Iobu ena hisihisi negana ena daudau be edena bamona?

Iobu bukana ia hahedinaraia lasi Iobu be lagani momo lalonai ia hisihisi. Iobu ena hisihisi bona ia ore negana ena daudau be hua haida eiava lagani ta ia hanaia lasi.​—⁠8/15, rau 31.

• Dahaka dainai ita diba Diabolo be gari havaraia lalohadaina ta sibona lasi?

Iesu Keriso ia diba Diabolo be momokani ia noho. Iesu be lauma korikorina ta ese ia tohoa, ia lalonai ia noho dika ta ese ia tohoa lasi. (Mataio 4:​1-11; Ioane 8:44; 14:30)​—⁠9/1, rau 5-6.

• Aonega Herevadia 10:15 ia gwau: “Kohu momo tauna ena moni bona kohu, ese ia idia gimaia noho, to ogogami ese ogogami tauna ia hadikaia ore noho.” Unai be edena bamona ia momokani?

Kohu ese mauri lalonai idia vara gaudia haida amo ta ia gimaia, hanua mai magu be ia lalonai idia noho taudia ia gimaia bamona. To, guna ita diba lasi gaudia idia vara neganai ogogami ese dika ia havaraia diba.​—⁠9/15, rau 24.

• Edena dala ai Enosi ena negai “taunimanima ese Lohiabada ena ladana helagana dekenai guriguri idia hamatamaia”? (Genese 4:⁠26)

Taunimanima idia noho negana ibounai lalonai Dirava ena ladana idia gaukaralaia vadaeni; Enosi ena negai idia hamatamaia karana be abidadama dainai Iehova ena ladana gaukaralaia karana lasi. Taunimanima ese idia sibona eiava ma haida dekenai Dirava ena ladana idia gwauraia, bona idia amo Dirava idia tomadiho henia koikoi.​—⁠9/15, rau 29.

• Baibel lalonai idia gaukaralaia hegeregerena, inai hereva “matahakani” ena anina be dahaka?

Unai hereva be hadikaia eiava dagedage karana ta ia hahedinaraia lasi. (Aonega Herevadia 4:13; 22:15) Unai Greek gado herevana idia hahanaia “matahakani” ena anina be hadibaia, hamaoromaoroa, bona nega haida panisia, to mai lalokau ida. Tama sina ese Iehova idia tohotohoa diba mai anina bada dalana ta be, idia hekwarahi edia natudia ida herevahereva dalana ia namo noho totona. (Heberu 12:​7-10)​—⁠10/1, rau 8, 10.

• Edena dala ai Keristani taudia momokanidia idia hahedinaraia idia ura Dirava ia lohia?

Iehova ena Witnes taudia be Dirava ena basileia idia badinaia lalonai politikol karadia ai idia vareai lasi eiava idia gwau-edeede henia lasi, Witnes taudia idia taravatua tanodia dekenai be unai bamona danu. (Tito 3:⁠1) Idia be Iesu bona ena hahediba taudia ginigunadia idia karaia bamona, heduru idia henia bona idia hekwarahi taunimanima idia durua, Baibel ena hereva namodia hegeregere, kara maoromaoro, kara goeva, bona gaukara karaia namonamo dalana idia badinaia totona.​—⁠10/15, rau 6.

• Edena dala ai mauri ia henia ranu be Andes ai ia aru?

Iehova ena Witnes taudia unuseniai be idia hekwarahi taunimanima dekenai Baibel ena hereva momokani idia mailaia totona, unai idia karaia totona gado rua, Quechua bona Aymara idia diba danu be namo. Witnes taudia ese Titicaca Gohuna ai idia noho motumotu dekenai idia noho taudia, bona “hure noho” motumotu, ranu dekenai idia noho siriho amo idia karaia patapata dekenai idia noho taudia danu idia vadivadi henia.​—⁠10/15, rau 8-10.

• Hari inai negai peleini idia hakaua totona kompiuta idia noho hegeregerena, ita hakaua totona Dirava be dahaka ia henia?

Dirava ese taunimanima be kara maoromaoro dalana dekenai idia ia hakaua gauna ia henia. Unai be ita abia lalona ena mamina. (Roma 2:​14, 15)​—⁠11/1, rau 3-4.

• Dahaka dainai Iesu ena mase be mai anina bada?

Goevadae tauna Adamu ia kara dika neganai, ia ese ena mauri bona ena natudia edia mauri ia haboioa. (Roma 5:12) Goevadae tauna hegeregerena, Iesu ena mauri ia bouboulaia, unai mauri davalaia karana amo dala ia kehoa kamonai taudia ese mauri do idia abia.​—⁠11/15, rau 5-6.

• Kolose 3:11 ese ia gwauraia sikuli lasi taudia [“Scythia taudia,” NW] be daidia?

Scythia taudia be noho loa besena ta, lagani 700 ia lao lagani 300 B.C.E. bamona ai, idia ese Eurasia ena rei gabudia idia biagua. Idia be hosi guia taudia goadadia bona tuari taudia. Kolose 3:11 ena hereva ena anina be, bese korikorina ta ia herevalaia lasi, to dagedage bada idia karaia taudia ia herevalaia.​—⁠11/15, rau 24-5.

• Dahaka dainai ita gwau diba ma haida kara namo henia ena hakaua herevana (eiava Golden Rule) be ita laloa hanaihanai be namo hahediba herevana ta?

Iuda, Buddhist, Greek, bona Confucian lalohadai idauidau ese unai hereva be dala idauidau ai idia herevalaia. To, Iesu ena Haroro Herevana Badana ena anina be taunimanima ese kara haida idia karaia, bona gabu ibounai dekenai idia noho mauri lagani idauidau taudia edia mauri ia haidaua. (Mataio 7:12)​—⁠12/1, rau 3.