Basileia Haroro Ripoti
Televisen Ena Program ta Dainai Dirava Ia Hanamoa
APOSETOLO Paulo ia gwau “haida ese egu gaukara namona dainai lau idia mama henia. Idia ura lau idia halusia, vadaeni Sivarai Namona idia harorolaia noho. To haida be laloa namona dekenai idia harorolaia.” (Filipi 1:15) Nega haida Iehova ena taunimanima edia hereva idia hakoikoia toho taudia be idia diba lasi idia ese kudou-maoro taudia idia durua hereva momokani idia ura henia totona.
November 1998 ai, Louviers, France dekenai, Betele rumana, Iehova ena Witnes taudia edia brens opesi unai, ena laulau be French gado ena televisen program ta dekenai idia hahedinaraia. Ena be taunimanima edia lalohadai be idauidau unai program dekenai, to dala idauna ai anina namona ia havaraia.
Unai program idia itaia taudia ta be Anna-Paula, ena noho gabuna ena daudau be kilomita 60 bamona Betele amo. Anna-Paula, ena headava ia hadokoa sinana ta mai ena natudia memero rua, be gaukara ia tahua. Unai dainai daba ai, Betele ia ringi henia, gaukara ta ia abia totona. Ia gwau: “Lau laloa unai gabu be namo herea bona unuseniai idia karaia gaukarana be mai anina bada.” Ia hoa bada badina Betele dekenai idia gaukara taudia ibounai be hesiai taudia bona edia nega idia henia volantia gaukara idia karaia totona! Nega kwadogi lalonai Iehova ena Witnes taudia edia gaukara idia herevalaia murinai, ia laloa Witnes tauna ta ese ia idia vadivadi henia be namo.
Lena, ful-taim hesiai tauna ta Iehova ena Witnes taudia edia kongregesen ta dekenai, ese ia vadivadi henia neganai idia herevahereva daudau, bona Anna-Paula be Diba ese Mauri Dekenai Ita Ia Hakaua Lao bukana ia abia dae.a Vadivadi iharuana ai, Anna-Paula be unai buka ibounai ia duahia ore vadaeni bona ena henanadai be momo. Mai ena ura ida Baibel stadi ia abia dae. Anna-Paula ia gwau: “Lau dekenai, unai be nega namona Dirava ena Hereva lau dibaia totona. Nega ta Baibel be egu imana dekenai lau dogoatao lasi.”
January 1999 lalonai, Anna-Paula be Betele ia vadivadi henia, bona murina wiki dekenai, ena Keristani hebou ginigunana dekenai ia lao. Daudau lasi murinai, ena natudia ida Baibel ia stadilaia bona ena turadia ia haroro henia matamaia. Ia gwau: “Lau ura lasi lau dibaia gaudia be lau sibona dekenai lau dogoatao. Lau ura Baibel ena hereva momokani be taunimanima dekenai lau hadibaia bona idia lau hagoadaia.” Ia hekwarahi sibona ena hekwakwanai haida ia hanaia totona murinai, Anna-Paula be hanaihanai hebou ia lao henia. Ia goada ia lao haraga bona May 5, 2002 ai bapatiso ia abia.
Ma danu, Anna-Paula ena haheitalai namona bona haroro goadagoada karana dainai, ena sinana ese Baibel ia stadilaia matamaia bona daudau lasi murinai bapatiso ia abia. Anna-Paula ia gwau: “Lau mamia moalena be hereva amo lau hahedinaraia diba lasi. Dina iboudiai Iehova lau tanikiu henia badina ia lau hesiai henia diba bona lau dekenai ia henia hahenamo ibounai dainai.”
[Footnote]
a Iehova ena Witnes taudia ese idia halasia.
[Pictures on page 19]
Ataiai: Anna-Paula
Henunai: France ena brens opesi ena vareai gabuna