Gilead Gradueisen Namba 125
Ieremia Tohotohoa
HAKAUA OREANA tauna ta, Geoffrey Jackson ia gwau, “Inai Gilead klas be mai anina bada.” September 13, 2008 ai, Tadikaka be Gilead Sikuli ena klas namba 125 ena gradueisen dekenai idia mai taudia 6,156 dekenai unai hereva ia henia. Unai Gilead Sikuli ena klas taudia 56 bona misinari taudia 8,000 mai kahana be “tanobada ena kahana ibounai” dekenai idia siaia lao!—Kara 1:8.
Gradueisen ena program ena seamani, Tadikaka Jackson ia henanadai, “Taunimanima ese emu hereva idia abia dae karana ese emu haroro gaukara ia hanamoa, a?” Bena tadikaka ese gau foa ia herevalaia: Lalohadai maorona ita abia, haheitalai namona ita hahedinaraia, Baibel amo hadibaia herevadia ita hamomokania, bona Iehova ena ladana hadibaia karana ita laloa bada.
Hadibaia Komiti tauna ta, David Schafer ese hereva ta ia henia, ena ladana be: “Gau Ibounai Do Oi Lalopararalaia, A?” Ia ese Gilead stiuden taudia ia hadibaia, misinari taudia edia “gau ibounai do idia lalopararalaia” namonamo, bema Iehova idia tahua noho, bona mai manau ida “hesiai tauna mai ena kamonai, bona mai ena kara maoromaoro” idia badinaia.—Aon. 28:5, NW; Mat. 24:45.
Hakaua Oreana tauna ta, John E. Barr ese hereva ta ia henia, ena ladana be “Gau ta ese Dirava Ena Lalokau Dekena amo Umui Do Ia Kokia Lasi.” Tadikaka Barr be tamana ta bamona, stiuden taudia bona edia tama sina ia hagoadaia misinari matamatadia ese edia gaukara lalonai do idia davaria gaudia idia laloa momo lasi be namo. Ia gwau: “Dirava ena lalokau lalonai ita noho karana ese iseda mauri lalonai ita do ia gimaia.” Gau ta ese Dirava ena lalokau misinari taudia dekenai do ia kokia lasi. To bema misinari taudia sibona be Dirava amo idia parara, vadaeni Dirava ena lalokau idia kokia diba.
Tiokratik Sikuli Dipatmen dekenai ia gaukara tauna ta, Sam Roberson ese helai taudia ia hagoadaia namona be Iesu Keriso ena tuari dabua namodia idia atoa. Stiuden taudia ese Iesu ia karaia karadia idia stadilaia bona edia mauri lalonai idia badinaia neganai, idia be ‘Lohiabada Iesu Keriso ena tuari dabua do idia atoa.’ (Roma 13:14) Tiokratik Sikuli Dipatmen ena naria tauna, William Samuelson ese tau namona ena kara ia herevalaia. Ia gwau tau namona be sibona ena lalohadai dekenai ia tabekau lasi to Dirava ena lalohadai ia abia.
Gilead Sikuli ena hadibaia tauna ta, Michael Burnett ese stiuden taudia haida ia inteviu henidia. Badina Gilead Sikuli lalonai idia noho stiuden taudia momo be Patterson, New York badinai idia noho teritori dekenai haroro gaukara idia karaia bona kamonai taudia haida idia davaria. Hebouhebou Dipatmen dekenai ia gaukara tadikaka ta, Gerald Grizzle be Brens Komiti taudia edia sikuli idia lao tadikaka toi ia inteviu henidia. Unai tadikaka toi edia hereva ese klas taudia ia durua edia misinari gaukara totona idia hegaegae be namo.
Hakaua Oreana ena memba ta bona klas namba 42 ia lao tauna, David Splane be inai hereva ia henia “Ieremia Tohotohoa.” Ena be matamanai, Ieremia be ena gaukara lalonai do idia vara gaudia ia laloa momo to Iehova ese ia hagoadaia ia gari lasi totona. (Ier. 1:7, 8) Dirava ese misinari taudia matamatadia danu do ia hagoadaia. Tadikaka Splane ia gwau, “Bema oi be ta ena kara o hereva dekenai oi moale lasi, namona be pepa dekenai unai tau ena kara namodia ten oi torea. Bema lasi, vadaeni anina be oi be unai tau oi diba namonamo lasi.”
Ieremia be sibona ena ura ia dadaraia. Ia ura unai gaukara ia rakatania, to Iehova ia guriguri henia bona Iehova be ia kahirakahira ia noho. (Ier. 20:11) Tadikaka Splane ia gwau: “Oi lalomanoka neganai, Iehova oi guriguri henia. Iehova ese oi do ia durua.”
Gradueisen ena program dokonai, seamani ese helai taudia ia hadibaia, sikuli taudia be haida ese edia hereva do idia abia dae daladia haida idia dibaia. Unai dainai unai misinari taudia ese edia haroro gaukara do idia hanamoa.—Isa. 43:8-12.
[Box on page 22]
KLAS TAUDIA
Edia tano idauidau: 6
Idia lao henia tanodia: 21
Klas taudia ibounai: 56
Edia mauri lagani edia averes: 32.9
Lagani hida hereva momokani lalonai, edia averes: 17.4
Lagani hida ful-taim hesiai gaukara idia karaia, edia averes: 13
[Picture on page 23]
Watchtower Bible School of Gilead Ena Klas Namba 125
Inai lista ai, laini edia namba be vairana kahana amo ia daekau murina kahana, bona edia ladadia be lauri kahana amo ela bona idiba kahana.
(1) Hodgson, A.; Wall, A.; Beerens, K.; Hortelano, M.; Newman, L.; De Caso, A. (2) Jenkins, J.; Jarzemski, T.; Méndez, N.; Corona, V.; Canalita, L. (3) Fryer, H.; Savage, M.; Tidwell, K.; Erickson, N.; Dyck, E.; McBeath, R. (4) Perez, L.; Puse, L.; Skidmore, A.; Young, B.; McBride, N.; Rondón, P.; Goodman, E. (5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. (6) Perez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. (7) Corona, M.; Wall, R.; Puse, S.; Méndez, F.; Jarzemski, S.; Savage, T. (8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. (9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.