Dahaka Dainai Dirava ese Hisihisi Ia Koua Lasi?

ENA BE taunimanima haida idia guriguri, to idia laloa Dirava ia noho lasi. Dahaka dainai unai bamona idia laloa? Badina tanobada ai hisihisi momo idia vara. Nega haida oi laloa, dahaka dainai Dirava ese hisihisi ia koua lasi, a?

Oi laloa Dirava ese taunimanima ia karaia, idia goevadae lasi bona hisihisi idia davaria totona, a? Bema unai be Dirava ena ura, reana ia ita matauraia be auka. Mani inai oi laloa: Oi be motuka matamata ta oi itaia lalonai, ena kahana ta ai maka ta oi davaria. Oi laloa motuka karaia tauna ese unai maka ia karaia, a? Reana lasi, badina motuka karaia tauna ese motuka ia karaia namo herea, to reana tau ta o gau ta ese unai maka ia karaia.

Unai hegeregerena, Dirava ese tanobada ai ia havaraia gaudia mai hairaidia ita moalelaia, to ita itaia taunimanima be hisihisi idia davaria neganai, dahaka ita laloa? Baibel ia gwau, Dirava ese Adamu bona Heva ia karaia neganai, idia be goevadae, to gabeai idia kara dika. (Deuteronomi 32:4, 5) Ita moale badina Dirava ia gwauhamata Adamu bona Heva ese idia havaraia dika do ia hanamoa lou, anina be kamonai taudia be goevadae taudia ai do ia halaodia. To, dahaka dainai unai ia karaia haraga lasi?

Dahaka Dainai Hisihisi Ia Haorea Haraga Lasi?

Dirava ese hisihisi ia haorea haraga lasi; unai amo do ita diba daika ia hegeregere taunimanima ia lohiaia totona. Taunimanima ese sibodia idia lohiaia be Iehova ena palani lasi. To ia be edia Lohia Tauna. Baibel ia gwau: “Taunimanima ta lasi ese iena mauri ia biagua noho.” (Ieremia 10:23) To, Adamu bona Heva be Dirava ena lohia siahuna idia gwau-edeede henia. Idia ese Dirava ena taravatu idia utua dainai, kara dika taudia ai idia lao. (1 Ioane 3:4) Unai amo idia bona edia natudia dekenai hisihisi idia havaraia.

Lagani tausen momo lalodiai, Iehova be taunimanima ia koua lasi sibodia idia lohiaia totona, bona histori ese ia hahedinaraia idia be hegeregere lasi unai idia karaia. Danu, taunimanima edia gavamani ese hisihisi idia havaraia. Idia ta ese tuari, raskol karadia, kara gageva, o gorere ia haorea diba lasi.

Edena Dala ai Hisihisi Ibounai Do Ia Haorea?

Baibel ia gwau kahirakahira Dirava ese tanobada matamata do ia havaraia. (2 Petero 3:13) Dirava bona ma haida idia lalokau henia taudia be unuseniai do idia noho.​—⁠Deuteronomi 30:15, 16, 19, 20.

Baibel ma ia gwau “hahemaoro negana” be ia kahirakahira noho, unai nega ai Dirava ese hisihisi ibounai bona hisihisi idia havaraia taudia do ia haorea. (2 Petero 3:7) Unai murinai, Dirava ese ia abia hidi King, Iesu Keriso, ese kamonai taudia do ia lohiaia. (Daniela 7:13, 14) Iesu ena lohia dalana ese dahaka namo do ia havaraia? Baibel ia gwau: “Manau taudia ese noho gabuna tano do idia abia, do idia helai namonamo, mai moale bona mai maino danu.”​—⁠Salamo 37:11.

Iesu ia lohia neganai, ia ese hisihisi ibounai, gorere, buruka, bona mase danu do ia haorea; unai gaudia idia vara badina matamanai Adamu bona Heva ese Iehova, “mauri ibounai ena badina” idia gwau-edeede henia. (Salamo 36:9) Iesu ese ena lohia dalana idia abia dae taudia ibounai do ia hanamodia. Iena lohia henunai inai gwauhamata do idia guguru:

◼ “Siona dekenai idia noho taudia ta ese do ia gwau lasi, ‘Lau be gorere,’ bona Lohiabada ese edia kara dika ibounai do ia gwauatao.”​—⁠Isaia 33:24.

◼ “[Dirava] ese mata ranu ibounai be edia matana amo do ia dahua oho, bona mase be do ia ore, bona lalohisihisi, taitai, bona hisihisi danu be do idia ore. Gau gunadia be idia ore vadaeni.”​—⁠Apokalupo 21:4.

Ita moale badina ita diba kahirakahira Dirava ese ena gwauhamata hegeregerena hisihisi do ia haorea. Namona be ita abia dae momokani Dirava ese iseda guriguri ia kamonai, herevana hisihisi ia koua lasi.

Dirava ia noho bona ia ese emu lalohisihisi herevadia do ia kamonai. Danu, ia ura dikadika emu daradara bona hisihisi ia haorea negana do oi moalelaia.