“Lau Itaia, to Ena Anina Lau Diba Lasi”

Lau maragi neganai egu tama sina idia divos, bona egu sinana sibona ese lau, egu kakana memero rua bona taihuna kekeni ta ia naria. Unai negai, France dekenai idia noho taia kudima natudia idia hadibaia dalana be hari idia noho taia kudima taudia idia hadibaia bamona lasi, bona edia hadibaia dalana amo momo idia hahisia. Lau maragi negana amo lau abia heduru namona be taia kudima taudia ma haida ese idia abia lasi. Mani unai lau herevalaia.

Lagani haida lalonai, tisa momo idia laloa namona be taia kudima natudia idia fosia idia hereva totona, unai idia karaia dalana be tisa ia hereva neganai ena udu bibina idia itaia bona ena hereva idia lalopararalaia toho. Lau tubu daekau gabuna France dekenai, sikuli ai saini gado gaukaralaia karana be taravatu. Taia kudima natudia haida be leseni negadiai tisa ese edia imana idia kwatua.

Lau maragi neganai, wiki ta ta ai lau be hora haida lalonai hereva namonamo karana ia hadibaia doketa (o speech therapist) ta lau vadivadi henia. Ia ese egu aukina o kwarana ia dogoatao bona lau ia fosia lau kamonai diba lasi regedia lau karaia lou lou totona. Natudia ma haida ida lau herevahereva diba lasi. Unai negadia lau moalelaia lasi.

Bena egu mauri lagani be 6 neganai, taia kudima natudia hadibaia sikulina dekenai lau idia siaia. Unai be nega ginigunana, taia kudima natudia ma haida ida lau hedavari. Unai sikuli ai danu, saini gado gaukaralaia karana be taravatu. Bema klas dekenai saini gado ai gaukaralaia, tisa ese emai ima kwakikwaki idia botaia o emai huina idia veria. To, hehuni dalanai saini gado ai gaukaralaia, bona ai sibona ese unai ai lalopararalaia. Lau moale badina lagani foa lalonai natudia ma haida ida lau herevahereva diba.

To, egu mauri lagani be 10 neganai, praimeri sikuli ta dekenai lau idia siaia, unuseniai taia kudima natudia be lasi. Lau lalohisihisi bada! Lau laloa inai tanobada ai taia kudima natudia ibounai idia mase vadaeni, bona lau sibona lau noho. Egu famili be doketa edia hereva idia badinaia dainai saini gado idia dibaia lasi bona lau idia koua taia kudima natudia lau bamoa lasi totona. Lau laloatao, doketa ta lau vadivadi henia neganai, ena teibolo latanai saini gado buka ta ia noho. Unai buka ena vairanai ia noho laulau lau itaia neganai, lau poinia bona lau gwau, “unai lau ura!” Karaharaga doketa ese unai buka ia hunia.a

BAIBEL ENA HEREVA MOMOKANIDIA LAU DIBAIA MATAMAIA

Egu sinana ia hekwarahi ai dekenai Baibel ena hakaua herevadia ia hadibaia totona. Ai ia abia lao Iehova ena Witnes taudia edia kongrigeisen heboudia Mérignac dekenai, unai be Bordeaux kahirakahira. Lau be maragi dainai, hebou ai idia herevalaia gaudia lau lalopararalaia namonamo lasi. To, kongrigeisen taudia ta ta be egu badinai idia helai bona hebou ai idia herevalaia gaudia be pepa ai idia torea. Edia lalokau bona laloa bada karana ese egu kudouna ia hamarerea. Ruma dekenai, egu sinana be lau ida Baibel ia stadilaia, to ia hadibaia gaudia lau lalopararalaia lasi. Lau mamia lau be peroveta tauna Daniela bamona, aneru ta amo peroveta hereva ta ia abia neganai, ia gwau: “Lau kamonai, to unai hereva ena anina be lau diba lasi.” (Daniela 12:8) Lau dekenai be hegeregere, “lau itaia, to ena anina lau diba lasi.”

To, metairametaira Baibel ena hereva momokanidia lau dibaia. Lau lalopararalaia herevadia lau laloa dobu bona lau hekwarahi egu mauri lalonai lau badinaia totona. Danu, ma haida edia kara amo gau haida lau dibaia. Hegeregere, Baibel ia gwau ita haheauka be namo. (Iamesi 5:7, 8) Unai hereva ena anina lau diba lasi. To, egu abidadama tamona taudia edia haheauka karana lau itaia neganai, unai kara ena anina lau lalopararalaia. Momokani, Keristani kongrigeisen ese lau ia durua bada.

LAU LALOHISIHISI TO GABEAI LAU MOALE

Lau matamata neganai, dina ta dala dekenai taia kudima matamata taudia haida lau itaia, saini gado idia gaukaralaia. Hehuni dalanai idia lau bamoa bona French Sign Language lau dibaia matamaia. Keristani heboudia lau lao henia noho, bona unuseniai matamata Witnes tauna ladana, Stéphane, ese lau ia durua. Ia hekwarahi lau ida ia herevahereva totona, bona ia be egu turana namona ai ia lao. Stéphane be dibura ruma ai idia atoa badina tuari lalonai ia vareai lasi. Unai nega ai lau lalohisihisi. Dibura ruma ai ia noho negana lalonai, lau lalomanoka bona hebou momo lau reaia.

Hua 11 murinai, Stéphane be dibura ruma amo idia ruhaia bona ruma dekenai ia giroa lou. Ia be saini gado amo lau ia hereva henia matamaia neganai, lau hoa. Edena bamona saini gado ia diba? Dibura ruma ai, ia be French Sign Language ia dibaia. Iena imana ia gaukaralaia dalana bona vairana toana lau itaia neganai, lau moale bada, badina hereva momokani be lau lalopararalaia diba dalanai ia hadibaia.

HEREVA MOMOKANI LAU LALOPARARALAIA

Stéphane ese Baibel amo lau ia stadi henia matamaia. Unai nega amo, guna Baibel amo lau dibaia hereva momokani lau lalopararalaia namonamo diba. Lau maragi neganai, Baibel buka bona magasin ai idia noho piksa mai edia hairai itaia karana lau moalelaia, bona piksa ai idia noho taudia ta ta bona gau ma haida lau itaia namonamo, unai amo sivarai lau lalodiatao. Lau diba Aberahamo be daika, ena “garana” bona “hutuma bada” be dahaka, to saini gado ai idia herevalaia namonamo neganai edia anina lau lalopararalaia. (Genese 22:15-18; Apokalupo 7:9) Unai ese ia hahedinaraia egu gado korikorina lau davaria.

Hebou ai idia herevalaia gaudia lau lalopararalaia diba dainai, lau dibaia gaudia ese egu kudouna ia hamarerea. Stéphane ese lau ia durua dainai, egu diba Baibel dekenai ia bada ia lao. Bona lagani 1992 ai, Iehova Dirava dekenai egu mauri lau gwauhamatalaia bona lau bapatiso. Ena be lau goada lau lao to lau be hemarai tauna bona ma haida lau bamoa be auka, badina lau maragi neganai ma haida ida lau herevahereva diba lasi.

HEMARAI KARANA LAU HANAIA

Lau bamoa taia kudima grup maragina be Bordeaux ena gabu ta ladana, Pessac ai, ia noho kongrigeisen ida idia hatamonaia. Unai ese lau ia durua bada bona hereva momokani dekenai lau goada lau lao. Herevana lau hekwarahi ma haida ida lau herevahereva totona, to egu turadia​—⁠idia hereva diba taudia​—⁠ese gau ibounai idia herevalaia namonamo unai amo lau laloparara diba. Headava taudia rua, Gilles bona Elodie, be nega momo hebou murinai lau idia boiria ai aniani hebou o kofi ai inua totona, bona unai ese emai hetura karana ia hagoadaia. Dirava ena kara namodia idia hahedinaraia taudia huanai ita noho be moale gauna!

Pessac kongrigeisen ai kekeni namona ta lau davaria, ena ladana be Vanessa. Ia lau ura henia badina ma haida edia hemami ia laloa bada bona ia kara namo henidia. Ena be lau be taia kudima to unai ia laloa lasi, ia moale lau ia hereva henia totona, unai amo ia be taia kudima taudia hereva henia dalana ia dibaia. Ena kara namodia ese egu kudouna ia winia dainai, lagani 2005 ai ai headava. Ena be taunimanima ida lau herevahereva be auka, to Vanessa ese lau ia durua dainai lau hemarai lasi ma haida ida lau herevahereva totona. Egu maduna lau huaia neganai, ia ese lau ia durua namo herea.

IEHOVA ENA HARIHARI GAUNA MA TA

Ai headava laganina ai, Iehova ena Witnes taudia edia brens ofesi, Louviers, France dekenai, ese lau ia boiria hua tamona lalonai trensleisen gaukara ena treinini lau abia. Lagani haida gunanai, brens ofesi ese French Sign Language ena pablikeisen haida be DVD ai ia halasia. To gaukara be momo herea dainai, trensleisen tim idia ura idia lau durua.

Lau bona Vanessa ai laloa brens ai lau heduru be hahenamo badana bona unai be Iehova ena harihari gauna, to ai daradara sisina. Emai saini gado grup dekenai dahaka do ia vara? Emai ruma be edena bamona? Vanessa be unai gabu ai moni gaukara ta do ia davaria, eiava? Iehova ese ai lalohekwarahilaia gaudia ia hanamoa. Lau mamia Iehova be ai bona taia kudima taudia ma haida ia lalokau henia.

LAU IDIA DURUA TAUDIA

Trensleisen ai lau heduru dainai, hari lau laloparara trensleisen ai gaukara bada idia karaia unai amo taia kudima taudia idia durua Dirava idia dibaia. Bona lau moale badina ai gaukara hebou taudia momo idia hekwarahi lau ida idia herevahereva totona. Saini gado idia dibaia bona idia gaukaralaia neganai, egu kudouna ia hamarerea. Lau mamia lau be sibona lau noho lasi. Unai bamona kara namodia ese Iehova ena taunimanima huanai ia noho lalotamona karana ia hahedinaraia.​—Salamo 133:1.

Iehova lau tanikiu henia badina hanaihanai Keristani kongrigeisen amo lau ia durua. Lau moale badina taia kudima taudia ma haida lau durua eda Havaraia Tauna lalokauna idia diba bona ia kahirakahira idia lao totona. Vaira nega ai, taunimanima do idia herevahereva namonamo bona ibounai be “gado goevadaena”​—Iehova Dirava ena sivarai momokanina bona iena ura​—do idia herevalaia negana lau naria noho.​—Sepanaia 3:9, BHḡ.