Dirava Ia Gwauhamata Gaudia Idia “Itaia”

1. Iseda lalona ena matana amo gau ta ita itaia karana ese edena dala ai ita ia durua? (Laulau ginigunana itaia.)

ISEDA lalona ena matana amo gau ta ita itaia karana be Dirava ena harihari gauna ta. Unai ese ita ia durua palani namodia ita karaia, bona vaira neganai do idia vara gau namodia ita laloa totona. Iehova be vaira negana ai do idia vara gaudia ia itaia diba, bona Baibel amo ita ia hadibaia vaira negana ai dahaka do ia vara. Ita be vaira negana ai do idia vara gaudia be eda lalona ena matana amo ita itaia diba. Momokani, ita itaia lasi gaudia be eda lalona ai ita itaia neganai unai ese eda abidadama ia hagoadaia.—2 Kor. 4:18.

2, 3. (a) Dahaka dainai gau ta be eda lalona ena matana ai ita itaia be mai anina bada? (b) Inai stadi ai edena henanadai do ita herevalaia?

² Nega haida ita itaia lasi gaudia be iseda lalona ai ita itaia diba, to unai gau haida be do idia vara momokani lasi. Hegeregere, bema kekeni maragina ta be ena lalona ai ia itaia ia be kaubebe ta latanai ia guia bona ia roho, unai be do ia vara momokani lasi. To, Hana be ena natuna mero Samuela ese palai dubu ai do ia karaia gaukara ia lalohadailaia neganai, ia be do ia vara momokani gauna be ena lalona ena matana amo ia itaia. Unai ese ia durua ena gwauhamata Iehova dekenai ia badinaia totona. (1 Sam. 1:22) Bema Dirava ia gwauhamatalaia gaudia be eda lalona ai ita itaia, ita diba unai do ia vara momokani.—2 Pet. 1:19-21.

³ Momokani, Baibel ese ia herevalaia abidadama taudia momo be Dirava ese ia gwauhamatalaia gaudia be edia lalona ena matana ai idia itaia. Edena dala ai abidadama taudia ia durua? Bona Dirava ese kamonai taudia totona ia gwauhamatalaia gaudia be eda lalona ena matana ai ita itaia karana ese edena dala ai ita ia durua?

VAIRA NEGANA IDIA “ITAIA” KARANA ESE IA HAGOADAIA

4. Dahaka ese Abela ia durua, vaira negana ai do ia vara gauna be ena lalona ena matana ai ia itaia totona?

⁴ Abidadama tauna Abela be Iehova ese ia gwauhamatalaia gauna ta ia “itaia,” a? Adamu bona Heva idia kara dika murinai, Iehova ese gaigai dekenai ia gwauraia herevana be Abela ia diba: “Lau ese badu oi bona hahine ihuanai do lau atoa bona oiemu garana bona iena garana ihuanai. Ia ese emu kwarana do ia haberoa bona oi ese iena aena geduna do oi haberoa.” (Gen. 3:14, 15, BHḡ) Abela ia diba lasi unai be edena bamona do ia vara. To, Abela be unai gwauhamata ia lalohadailaia, bona ia diba tau ta be ‘aena geduna ai do idia haberoa,’ unai amo taunimanima be Adamu bona Heva ena kara dika amo ia ruhaia. Abela ena lalona ena matana ai vaira negana ia itaia bona Dirava ena gwauhamata ia abidadama henia, unai dainai Iehova ese ena boubou gauna ia abia dae.—Genese 4:3-5; Heberu 11:4 duahia.

5. Edena dala ai Enoka ese vaira negana be ena lalona ena matana ai ia itaia karana ese ia hagoadaia?

⁵ Ena be kara dika taudia be Dirava idia hereva dika henia, to Enoka be Dirava ia abidadama henia. Enoka be Dirava ena lauma helaga siahu amo ia peroveta, ia gwau: “Iehova be ena aneru helagadia tausen momo danu ia mai, taunimanima ibounai hahemaoro henia totona, bona Dirava idia matauraia lasi taudia ia kota henia totona, idia ese idia karaia kara dika ibounai dainai, bona kara dika taudia ese ia dekenai idia gwauraia hereva dika rohorohodia ibounai dainai.” (Iuda 14, 15) Enoka be abidadama tauna dainai, ena lalona ena matana ai kara dika taudia idia noho lasi tanobadana ia itaia diba.—Heberu 11:5, 6 duahia.

6. Abata murinai, Noa be dahaka ia diba momokani?

⁶ Noa ena abidadama dainai, Abata badana ai ia roho mauri. (Heb. 11:7) Bena Abata murinai, animal ta ia bouboulaia. (Gen. 8:20) Abela bamona, Noa ia diba momokani taunimanima ese idia abia kara dika bona mase be do ia ore. Ena be Abata ia do vara lasi neganai, Nimiroda be Iehova ia inai henia, to Noa be ena abidadama bona helaro ia dogoatao noho. (Gen. 10:8-12) Taunimanima be lohia dalana dikana, kara dika, bona mase amo Dirava ese ia hamauridia, unai be Noa ese ia lalohadailaia neganai, ena abidadama ia hagoadaia. Ita be unai nega namodia ita “itaia” danu, bona unai nega be kahirakahira do ia vara!—Roma 6:23.

GWAUHAMATA IDIA GUGURU DALANA “ITAIA”

7. Aberahamo, Isako bona Iakobo be dahaka vaira negana idia “itaia”?

⁷ Aberahamo, Isako, bona Iakobo be edia lalona ena matana amo vaira negana idia itaia. Badina Dirava ia gwauhamata edia natudia amo tanobada ena bese ibounai be hahenamo do idia abia. (Gen. 22:18; 26:4; 28:14) Unai abidadama taudia edia natudia be do idia momo herea bona Dirava ese ia henia Gwauhamata Tanona do idia abia. (Gen. 15:5-7) Unai abidadama tatau be edia natudia ese do idia abia tanona idia “itaia” diba. Unai dainai taunimanima be kara dika idia abia negana amo ia mai bona hari, Iehova ese ena kamonai hesiai taudia ia hadibaia Adamu ese ia haboioa hahenamo be do idia abia lou.

8. Dahaka ese Aberahamo ia durua abidadama ia hahedinaraia totona?

⁸ Aberahamo be ena lalona ai Dirava ese ia gwauhamatalaia gaudia be ena lalona ena matana ai ia itaia diba, unai dainai ena kara amo abidadama ia hahedinaraia. Baibel ia hahedinaraia ena be Aberahamo bona abidadama taudia haida be edia mauri lalonai Dirava ese ia “gwauhamatalaia gaudia idia abia lasi,” to “daudau amo unai gaudia idia itaia bona mai moale ida idia abia dae.” (Heberu 11:8-13 duahia.) Aberahamo ia diba guna Iehova ese ena gwauhamata ibounai ia hagugurua, unai dainai ia diba momokani Iehova ese vaira negana totona ia gwauhamatalaia gaudia ibounai be do idia guguru!

9. Edena dala ai Aberahamo be Dirava ena gwauhamata ia abidadama henia karana ese ia durua?

⁹ Aberahamo be Dirava ena gwauhamata ia abidadama henia dainai, unai ese ia hagoadaia Dirava ena ura ia karaia totona. Unai dainai, Uru hanua ia rakatania bona ia ura lasi Kanana ena hanua ta ai do ia noho. Uru hanua bamona, unai hanua edia badina be ia goada lasi, badina edia gavamani taudia be dirava idaudia idia tomadiho henia. (Ios. 24:2) To, Aberahamo ena mauri lalonai “ia be taoni mai ena badina aukana ia naria noho, unai taoni ena palani ia karaia tauna bona ia haginia tauna be Dirava.” (Heb. 11:10) Aberahamo ia “itaia” ia be Iehova ese ia lohia gabuna ai ia noho. Abela, Enoka, Noa, Aberahamo, bona ma haida idia diba mase taudia be do idia toreisi lou, bona idia ura Dirava ena Basileia henunai do idia noho, unai be “taoni mai ena badina aukana.” Unai hahenamo idia laloa dainai, unai ese edia abidadama Iehova dekenai ia hagoadaia.—Heberu 11:15, 16 duahia.

10. Edena dala ai Sara be vaira negana ia laloa karana ese ia durua?

¹⁰ Mani Aberahamo ena adavana Sara oi laloa. Ena mauri lagani be 90 bona natuna ta ia do havaraia lasi neganai, vaira negana totona lalohadai maorona ia abia karana ese ena abidadama ia hagoadaia. Momokani, ia itaia Iehova ese ia gwauhamatalaia gaudia be ena natudia ese idia moalelaia. (Heb. 11:11, 12) Edena dala ai ia diba momokani unai do ia vara? Iehova ese Aberahamo ia hadibaia, ia gwau: “Lau ese do lau hanamoa, bona ia dekena amo natuna mero oi dekenai do lau henia. Lau ese Sara do lau hanamoa, bona ia be dohore bese idauidau edia sinana, bona iena tubuna haida be dohore king taudia.” (Gen. 17:16) Sara be Isako ia havaraia murinai, ia diba Dirava ena gwauhamata Aberahamo dekenai be do idia guguru. Unai dainai Dirava ese ia gwauhamatalaia gaudia be do idia vara momokani, bona iseda lalona ena matana ai gau ta ita itaia karana be harihari gauna ta!

GAU NAMONA TA IA ITAIA

11, 12. Edena dala ai Mose ese ena lalokau Iehova dekenai ia habadaia?

¹¹ Iehova ia abidadama henia tauna ta be Mose, ia be Iehova ia lalokau henia bada. Mose ia matamata neganai, ia be Farao ena ruma bese ida ia noho. Unai dainai ia be ladana bada bona taga maurina ia ura henia diba. To, Mose ena tama sina korikoridia ese ia dekenai Iehova ena ura idia hadibaia. Iehova ena ura be Heberu taudia be igui hesiai gaukara amo do ia ruhaia bona gwauhamata tanona dekenai do ia abia lao. (Gen. 13:14, 15; Eso. 2:5-10) Bema Mose be hanaihanai Dirava ena taunimanima ese gabeai do idia abia hahenamo ia laloa, ena kudouna ai dahaka ura do ia havaraia? Ladana bada do ia ura henia o Iehova do ia lalokau henia?

¹² Baibel ia gwau: “Mose ia abidadama dainai, ia bada neganai ia ura lasi ia idia gwauraia Farao ena natuna kekeni ena natuna. Ena lalona ia hadaia Dirava ena taunimanima ida hisihisi ia abia hebou, to kara dika ena moale, nega sisina do ia noho gauna ia ura henia lasi, badina ia laloa Horoa Tauna dainai ia abia hemarai be dava bada gauna bamona, bona unai ese Aigupito ena dava bada gaudia ia hereaia, bona do ia abia davana namona sibona ia laloa.”—Heb. 11:24-26.

13. Edena dala ai Mose be Dirava ena gwauhamata ia laloa dobu karana ese ia durua?

¹³ Mose be Iehova ese Israela taudia totona ia gwauhamatalaia gaudia ia laloa dobu neganai, unai ese ena abidadama bona lalokau Dirava dekenai ia habadaia. Abidadama taudia haida bamona, Mose ia diba Iehova ese taunimanima be mase amo do ia ruhaia. (Iobu 14:14, 15; Heb. 11:17-19) Dirava ese Heberu taudia bona taunimanima ibounai ia hebogahisi henia dainai, unai ese Mose ena lalona ia veria Dirava ia lalokau henia totona. Mose ena mauri ibounai lalonai abidadama bona lalokau ia hahedinaraia. (Deu. 6:4, 5) Ena be Farao ia gwau Mose do ia hamasea, to Mose be ena abidadama, ena lalokau Dirava dekenai, bona ena lalona ena matana ai vaira negana ia itaia dainai, mai gari lasi ida Farao ia hereva henia.—Eso. 10:28, 29.

BASILEIA ESE DO IA KARAIA GAUDIA LALOHADAILAIA

14. Taunimanima ese vaira negana be edena bamona idia laloa?

¹⁴ Hari, taunimanima momo be edia lalona ena matana ai vaira negana idia itaia, to idia laloa gaudia be do idia vara momokani lasi. Herevana haida be tauanina dalanai idia dabu, bona mauri be “hekwarahi bona lalohisihisi” amo ia honu, to idia ura vaira negai taga taudia ai idia lao bona mauri namona idia abia. (Sal. 90:10) Haida idia laloa taunimanima edia gavamani ese hekwakwanai ibounai do ia haorea, to Baibel ia gwau Dirava ena Basileia sibona ese unai do ia karaia. (Dan. 2:44) Taunimanima idia laloa Dirava ese inai tanobada dikana do ia haorea lasi, to Baibel ia gwau Dirava ese inai tanobada dikana do ia haorea. (Sep. 1:18; 1 Ioa. 2:15-17) Abidadama lasi taudia idia laloa Iehova ena ura vaira negana totona be do ia guguru lasi.

15. (a) Edena dala ai Keristani taudia be edia lalona ena matana amo edia helaro idia itaia karana ese idia ia durua? (b) Dirava ena gwauhamata ia guguru neganai, oi ura dahaka do oi karaia?

¹⁵ Ita be Keristani taudia dainai, namona be iseda helaro—guba o tanobada ai—be eda lalona ena matana ai ita itaia. Emu lalona ena matana ai oi itaia, oi be Dirava ia gwauhamatalaia gaudia oi moalelaia noho, a? Dirava ia gwauhamatalaia gaudia idia guguru neganai, do oi karaia gaudia oi laloa karana ese oi do ia hamoalea. Reana oi sibona oi “itaia” oi be tanobada ai oi noho hanaihanai. Inai oi laloa, oi bona ma haida umui gaukara hebou tanobada be paradaiso ai umui halaoa totona. Oi bona emu neiba taudia be Iehova umui lalokau henia. Do oi gorere lasi, do oi goada, bona gau ta do oi lalohekwarahilaia lasi. Tanobada hanamoa lou gaukara idia naria taudia be edia gaukara do idia karaia namonamo, badina oi idia laloa. Bona mai moale ida emu diba oi gaukaralaia ma haida oi durua bona Dirava oi hanamoa totona. Hegeregere, toreisi lou taudia do oi durua Iehova idia dibaia totona. (Ioa. 17:3; Kara 24:15) Ataiai ita herevalaia gaudia be do idia vara momokani, badina unai be Baibel ese ia gwauraia.—Isa. 11:9; 25:8; 33:24; 35:5-7; 65:22.

DAHAKA DAINAI EDA HELARO ITA HEREVALAIA?

16, 17. Edena dala ai eda helaro ita herevalaia karana ese ita ia hagoadaia?

¹⁶ Bema nega matamata ai do ita karaia gaudia be Keristani taudia dekenai ita herevalaia, unai ese eda lalona do ia hagoadaia. Ena be ita diba lasi tanobada matamata ai eda noho dalana be edena bamona, to ita karaia diba gaudia ita herevalaia neganai, ta ta do ita hagoadaia bona ita hahedinaraia Dirava ena gwauhamata ita abidadama henia. Paulo be Roma tadikaka ia vadivadi henia neganai, idia moale badina idia “hagoadaia heheni.” Ita danu, inai nega dikana lalonai ita hagoadaia heheni be namo.—Roma 1:11, 12.

¹⁷ Ena be hari hekwakwanai ita davaria, to eda lalona ena matana ai vaira negana ita itaia karana ese ita ia durua lalohadai maorona ita abia totona. Nega ta Petero be Iesu ia hereva henia neganai, ia gwau: “Ai be gau ibounai ai rakatania bona oi murinai ai raka, vadaeni dahaka do ai abia?” Iesu be Petero bona ia ida idia noho taudia ma haida ia durua edia lalona ena matana ai vaira negana idia itaia totona, ia gwau: “Umui lau hamaoroa momokani, gau ibounai hamatamataia negana ai, taunimanima ena Natuna be ena terona hairaina latanai do ia helai neganai, egu murinai umui raka taudia danu be terona 12 latanai do umui helai, bona Israela ena iduhu 12 do umui hahemaoro henia. Bona egu ladana dainai ruma, tadikaka, taihu, tamana, sinana, natudia, eiava tano idia rakatania taudia ibounai, ese unai gaudia momo do idia abia bona mauri hanaihanai do idia abia.” (Mat. 19:27-29) Unai dainai, Petero bona hahediba taudia ma haida be edia lalona ena matana ai idia itaia, idia be Iesu ida guba ai idia lohia bona kamonai taudia idia durua goevadae taudia ai idia lao totona.

18. Edena dala ai Dirava ena gwauhamata idia guguru dalana ita laloa karana ese ita ia durua?

¹⁸ Iehova ena hesiai taudia be hanaihanai Dirava ena gwauhamata idia laloa, unai ese idia ia hagoadaia. Abela be Dirava ena gwauhamata dekenai gau haida sibona ia diba, to vaira nega ia itaia diba, Dirava ia abidadama henia, bona ena helaro ia abia dae. Aberahamo be abidadama ia hahedinaraia, badina Dirava ia perovetalaia “garana” ena guguru dalana ia “itaia.” (Gen. 3:15, BHḡ) Mose be do “ia abia davana namona sibona ia laloa,” badina Iehova ia abidadama bona lalokau henia. (Heb. 11:26) Bema Iehova ena gwauhamata idia guguru dalana be eda lalona ena matana ai ita itaia, eda abidadama bona lalokau Dirava dekenai do ia goada. Dirava ese ia henia harihari gauna be edena bamona do ita gaukaralaia be stadi gabena ai do ita herevalaia.