Dirava be Oi Ia Diba Namonamo, A?

HAVARAIA GAUDIA AMO ITA DIBAIA GAUNA

Taunimanima ese idia moalelaia hetura karana mani oi laloa​—hegeregere hekapaa taudia. Idia ruaosi huanai ia noho hetura karana be ia goada momokani. Orea ta, Twin Studies Center ena dairekta, Nancy Segal, ia danu be hekapa ta, ia gwau, “hekapa taudia haida be idia herevahereva namonamo diba bona ta ta be edia hemami idia lalopararalaia diba.” Danu, hahine ta be ia bona ena hekapa huanai ia vara gauna be inai bamona ia gwauraia: “Ai ruaosi be ta ta ai diba namonamo.”

Dahaka dainai unai be idau momokani? Tahua gaukara haida ese idia hahedinaraia ena badina ta be reana ta ena noho gabuna eiava ena tama sina dainai unai ia vara, to ena badina be hekapa edia tauanina lalonai ia noho sel (o gene) be hegeregere dainai unai bamona idia kara.

MANI OI LALOA: Gau ibounai ia Havaraia Tauna be ita ta ta eda vara dalana ia diba namonamo. Oibe, salamo torea tauna Davida ia gwau: “Lauegu sinana ena bogana dekenai lau oi atoa vadaeni. Lauegu turiana be, egu sinana ena bogana lalonai idia vara hamatamaia noho neganai,  .  oi be oi diba lau be unuseni.  . . Lau be do lau vara lasi neganai, oi ese lau oi itaia.” (Salamo 139:13, 15, 16) Dirava sibona ese iseda vara dalana o genetic makeup, ia diba bona ia lalopararalaia namonamo, danu iseda mauri ai idia vara gaudia ese iseda kara ia haidaua dalana ia diba. Dirava sibona ese ita ia diba namonamo karana bona ita ia havaraia dalana amo ita abia dae momokani, ia be iseda mauri ibounai ia diba namonamo.

BAIBEL ESE DIRAVA ENA AONEGA IA HADIBAIA DALANA

Davida ia guriguri, ia gwau: “Lohiabada e, oi ese egu lalona oi tahua vadaeni, lau oi diba momokani vadaeni. Egu kara ibounai oi diba vadaeni. Oi be daudau herea dekena amo egu laloa ibounai oi diba. Do lau hereva lasi neganai, oi ese egu hereva be oi diba guna vadaeni.” (Salamo 139:1, 2, 4) Danu, Iehova be iseda hemami korikori bona “iseda laloa ibounai bona iseda ura ibounai ia diba.” (1 Sivarai 28:9; 1 Samuela 16:6, 7) Inai siri amo Dirava dekenai dahaka ita dibaia?

Ena be iseda guriguri lalonai Dirava dekenai iseda lalohadai bona hemami ibounai ita gwauraia hedinarai lasi, to eda Havaraia Tauna be iseda kara ia itaia bona eda kara ena badina ia lalopararalaia. Danu, ia lalopararalaia ita ura kara namodia ita karaia, to eda goada be mai ena hetoana dainai unai ita hagugurua diba lasi. Momokani, matamana neganai Dirava ese eda kudouna ai lalokau karana ia atoa dainai, ia ura dikadika eda lalohadai bona ura gaudia ia diba.​—1 Ioane 4:7-10.

Baibel ese ita ia hadibaia

• “Iehova ena matana be kara maoromaoro taudia ia itaia, bona ena taiana amo edia guriguri ia kamonai.”​—1 PETERO 3:12.

• “Lohiabada ia gwau, “Lau ese oiemu raka dalana oi dekenai do lau hadibaia. Lau ese oi do lau hakaua, bona sisiba oi dekenai do lau henia.”​—SALAMO 32:8.

DIRAVA BE ITA IA LALOA BADA

Ita diba Dirava be iseda hekwakwanai bona hemami ia lalopararalaia. Unai ita dibaia karana ese ita ia durua hekwakwanai ita haheaukalaia totona, a? Nigeria ai, Anna ena ekspiriens mani ita laloa. Ia gwau: “Egu mauri ai idia vara hekwakwanai dainai nega haida lau laloa mauri be anina lasi. Lau be vabu ta, bona hospital ai egu natuna kekeni lau naria. Ia be hydrocephalus gorerena ia abia, ena harana lalonai ranu bada ia noho. Danu, unai nega ai lau be breast kensa gorere lau abia, unai dainai opereisen, kemoterapi, bona redioterapi do lau abia. Hospital ai lau mamia unai be auka, badina egu natuna kekeni lau naria bona egu gorere lau laloa.”

Dahaka ese Anna ia durua ia haheauka totona? Ia gwau: “Baibel siri lau lalodiatao, hegeregere, Filipi 4:6, 7, unai siri ia gwau, ‘Dirava ena maino, laloparara ibounai ia hereaia gauna, ese emui kudouna bona lalona do ia gimaia.’ Hanaihanai unai siri lau laloa neganai, lau mamia egu hetura karana Iehova ida be ia goada, badina lau diba ia be egu hekwakwanai ia lalopararalaia. Danu, Kongrigeisen ai egu tadikaka bona taihu amo hagoadaia herevadia lau abia.”

“Herevana egu gorere ia ore lasi, to lau bona egu natuna emai gorere be metairametaira ia ore ia lao noho. Emai mauri ai, Iehova be ai ia durua. Unai dainai, ai dibaia gauna be hekwakwanai negadiai, lalohadai kereredia ai dadaraia be namo. Iamesi 5:11 ia gwau: ‘Ai gwau idia haheauka taudia be idia moale. Iobu ena haheauka sivaraina umui kamonai vadaeni bona Iehova ese ia hanamoa dalana umui diba, unai amo umui laloparara Iehova be lalokau bada bona hebogahisi Diravana.’” Iehova be Iobu ena hekwakwanai ia diba namonamo, bona ita abia dae momokani herevana hekwakwanai idauidau ita davaria, Dirava be unai ia lalopararalaia danu.