Sivarai Namona Harorolaia—Mai Hemataurai Danu
1 “Nega ibounai mai laloa namona bona mai gado namo do umui hereva. Bona taunimanima ta ta dekenai do umui haere henia mai maoromaoro danu.” (Kol. 4:6) Aposetolo Paulo ena sisiba be namo herea, ani? Ita haroro neganai namona be iena sisiba ita laloatao.—2 Kor. 6:3.
RUMA TA RUMA TA HARORO GAUKARA LALONAI
2 Bema ita be mai eda hemataurai, do ita diba dahaka do ita karaia be namo eiava edena bamona do ita hereva be namo, taunimanima ida ita maino karaia totona bona ita habadudia lasi totona. Ruma ta ruma ta gaukara ita karaia neganai, taunimanima haida ese ita idia hamaoroa idia gwau idia bisi. Bema ita laloa idia bisi momokani, namona be magasin o buka sibona ita henidia toho bona ita hamaorodia ma nega ta ai do ita giroa ita hereva henidia totona. Bema ita laloa idia bisi momokani lasi, reana do ita gwau: “Ia namo, hereva kwadogina sibona do lau gwauraia.” Namona be hereva badadia sibodia ita gwauraia miniti tamona bamona lalonai.
3 Nega haida ruma taudia be mai edia badu danu ita idia hereva henia. Namo lasi ita haere henidia hemataurai lasi dalanai, badina be Bible ia gwau: “Dika davana do umui karaia lasi.” (Roma 12:17) Namona be aonega bona maino dalana ita tahua. Hereva Lada-isidia 15:1 ena sisiba ita badinaia be namo ; ia gwau: “Haere manauna ese badu ia koua.” Bema oi be mai emu Reasoning buka, rau 15-24 dekenai idia noho herevadia ese oi do idia durua, oi be mai emu manau bona mai emu hemataurai danu oi haere totona.
LOU-HENIA NEGANAI
4 Nega momo, taunimanima ita lou henidia negadiai, idia gwau idia abia bukadia idia do duahia lasi. Ita ura unai bamona taudia ita hagoadadia, idia abia bukadia do idia duahia totona. Unai bamona ita karaia totona, namona be mai eda hemataurai danu ita hahedinaraia idia dekenai, unai buka ese henanadai badadia ia haerelaidia diba. Reana unai dala amo ita ha-uradia diba, idia abia bukadia do idia duahia totona.
5 Ita momo be ruma tauna ita hamaoroa do ita lou henia bona nega ita gwauraia danu, to unai nega dekenai ita lou lao neganai ia noho lasi. Momokani, ita lalohisihisi bona iseda nega ita halusia kava bona ita hekwarahi kava, to gabeai, unai ruma tauna do ita davaria lou neganai, namona be ita hereva henia mai eda hemataurai danu. Namona be ita hamaoroa ita sori guna ita davaria lasi dainai, bona ita hamaoroa, gabeai do ita giroa lou badina ita ura ia ida Bible do ita herevalaia hebou.
BIBLE STADI DEKENAI
6 Taunimanima haida be nega momo edia stadi idia hegaegaelaia lasi. Reana namona be hegaegaelaia dalana ita hahedinaraia idia dekenai. Eiava reana ita hahedinaraia diba dahaka dahaka do idia dibaia bema idia hegaegaelaia guna neganai. Bema idia hegaegae guna, stadi do ia heau haraga, bona lauma dalanai do idia goada idia lao haraga.
7 Reana ita stadi henia tauna be hebou haida dekenai ia mai lasi. Namona be Heberu 10:24, 25 eiava Salamo 133:1 edia anina be ia ida ita herevalaia, bona ita nanadaia unai siri be edena bamona ia laloa. Pablisa taudia haida be guna hereva momokani idia abia dae haraga dainai, ma haida idia stadi henidia neganai bema idia goada idia lao haraga lasi, idia haheauka henidia diba lasi. Namona be ita laloatao taunimanima iboudiai edia toana be tamona lasi to idia be idauidau, unai dainai namona be haida ita haheauka henidia bada.
8 Paulo ese Timoteo ia hamaoroa, namona be “Lohiabada ena hesiai tauna . . . be . . . taunimanima ibounai dekenai do ia bogahisihisi henia. . . . Ia ese, iena hereva idia utua taudia do ia sisiba henidia mai ena manau danu.” (2 Tim. 2:24, 25) Bema iseda “hereva idia utua taudia” be unai bamona ita kara henidia be maoro, namona be hereva idia kamonaia bona stadi idia ura henia taudia ita kara henidia mai eda manau bona mai eda hemataurai danu. Iseda natudia eiava iseda ruma bese taudia ita stadi henidia neganai, unai bamona ita kara henidia danu be namo.
9 Sivarai namona ita harorolaia neganai, ruma ta ruma ta ai, lou-henia ai, eiava Bible stadi dekenai, namona be ita ibounai ese Hadibaia Tauna Badana, Iesu Keriso, ena kara ita tohotohoa. Sibona ia gwauraia inai bamona: “Lau be dagedage lasi bona manau tauna.” (Mat. 11:29) Taunimanima ita haroro henidia bona ita hadibadia neganai, namona be ita hereva henidia mai eda manau bona mai eda hemataurai danu.
[Questions]
1. Edena dala amo taunimanima ita hereva henidia be namo? Dahaka dainai taunimanima ita “gado namo” henidia be namo?
2. (a) Bema taunimanima idia bisi momokani, hemataurai karana be dahaka? (b) Bema idia bisi momokani lasi, dahaka ita karaia diba?
3. (a) Edena sisiba Roma 12:17 ai ese ita ia durua ruma ta ruma ta gaukara ita karaia neganai? (b ) Edena negai Hereva Lada-isidia 15:1 ena sisiba ita badinaia be namo?
4. Bema ruma tauna be ia abia bukana ia do duahia lasi, edena bamona oi kara henia be namo?
5. Bema ruma tauna ia gwau do ia naria, to ita giroa lao neganai ia noho lasi, gabeai ita davaria lou neganai, edena bamona ita hereva henia be namo?
6. Oi stadi henia tauna be edena aonega dalana amo oi hagoadaia diba, ena stadi be nega iboudiai do ia hegaegaelaia totona?
7. (a) Edena bamona ta ita hagoadaia diba, hebou iboudiai dekenai ia mai totona? (b) Dahaka dainai namona be ita laloatao ita ibounai be idauidau?
8. Edena taudia dekenai 2 Timoteo 2:24, 25 ena hereva ita badinaia goevagoeva be namo?
9. Mataio 11:29 ena hereva hegeregerena, Iesu ese dahaka kara namodia ita ia haheitalaia? Unai sisiba be edena negai ita badinaia be namo?
This article is repeated in km 8/93.