Hesiai Hebou amo Heduru Bada Abia
1 Namona be Dirava ena hesiai taudia iboudiai be edia kudouna lalonai idia gwau: “Iehova e, emu dala lau oi hadibaia. Emu momokani dekenai do lau raka. Lauegu kudouna oi hatamonaia oiemu ladana gari henia totona.” (Sal. 86:11) Hesiai Hebou lalodiai sisiba ita abia, Iehova ese ia henia gaukarana, Basileia ena sivarai namona harorolaia gaukarana unai, do ita karaia guguru totona. Hesiai Hebou ese oi ia durua ena sisiba herevana oi abia dae neganai, a?
HEGAEGAE NAMONAMO ENA HEDURU
2 Hesiai Hebou ena sisiba ese ita do ia durua namonamo totona, gau badana be ita hegaegae guna. Badina be dahaka? Badina bema ita hegaegae namonamo guna iseda lalona bona iseda kudouna do idia hegeregere, sisiba bona hahegani do ita abia dae totona. Bema Hesiai Hebou ena hereva oi stadilaia guna, bona ena hereva oi laloa namonamo, bona ia gwauraia siridia oi lalodia namonamo, Hesiai Hebou dekenai do idia halasia lauma anianina do oi abia dae diba bona do oi laloatao diba. Danu, haere oi henia, haheitalai lalodiai oi vareai, bona hereva oi henidia neganai, mai emu kudouna ibounai ida do oi karaia diba. Emu kudouna lalonai do oi moale, badina oi diba Hesiai Hebou lalonai oi haere namonamo bona oi hegaegae namonamo.—Eso. 23:19a; Her. 16:23
3 Hesiai Hebou totona umui hegaegae neganai, namona be ruma bese taudia ta ta iboudiai ese unai hebou lalonai do umui gaukaralaia bukana umui dogoatao. Hesiai Hebou lalonai hereva ta do idia henia eiava haheitalai ta do idia karaia taudia idia hegaegae namonamo guna be gau badana. Namona be unai taudia idia hadibadia guna, bena edia nega do ia hegeregere edia hereva o haheitalai do idia hegaegaelaia namonamo totona.
HAERE HENIA KARANA BONA SISIBA BADINAIA KARANA EDIA HEDURU
4 Hebou lalonai haere oi henia neganai, hebou oi moalelaidia bada, ani? The Watchtower, July 1, 1972, English gado gauna, be rau 411 ai ia gwau: “Iseda abidadama Iehova dekenai be iseda Keristen tadikakadia bogaragidiai ita gwauraia hedinarai neganai, moale korikorina ita davaria. Ita idia doria lasi haere tamona do ita henia totona, bena ita haere murinai ita laga-ani bona tadikaka ma haida ese hebou orena lalonai idia haere. Lasi, to Iehova ita lalokau henia bada dainai, ita ura Iehova ita hanamoa bona iseda lalokau ia dekenai ita gwauraia hedinarai.”
5 Iehova ese sivarai namona harorolaia gaukarana be ita ia henia. Mai ena lalokau ida Hesiai Hebou ena amo sisiba be ita ia henia, ita ta ta ese Basileia harorolaia gaukarana do ita karaia namonamo totona. Iehova be Hahediba Tauna Badana dainai, ia ura ena orea taudia ia henidia sisibana ese anina ia havaraia. (Deuteronomi 17:10 itaia.) Oi kamonai gaudia oi badinadia bona oi gaukaralaidia neganai, heduru do oi abia, bona do oi gwau diba, “Lau oi oda henia hegeregerena lau karaia vadaeni.”—Esek. 9:11
6 Danu, moale do oi abia badina oi bona oi idia kamonai henia taudia do oi hamauridia. (1 Tim. 4:16) Momokani, Hesiai Hebou ena heduru lauma dalana ai be momo. Namona be oi bona emu ruma bese taudia ese emui lalona umui hadaia, unai heduru do umui abidia dae momokani!
[Questions]
1. (a) Namona be Iehova ena hesiai taudia ta ta iboudiai edia ura badana be dahaka? David be edena bamona unai ura ia gwauraia namonamo? (b) Hesiai Hebou be edena bamona idia heduru, unai ura gauna do ita davaria totona?
2. (a) Hesiai Hebou ese ita do ia durua bada totona, namona be ita ta ta iboudiai ese dahaka ita karaia? (b) Hereva Lada-isidia 16:23 ena hereva hegeregerena, Hesiai Hebou ita laloa bada dainai dahaka do ita karaia?
3. Hesiai Hebou lalonai do ita karaia gaukarana bema ita idia hadibaia guna, edena bamona unai ese ita do ia durua?
4. (a) Hesiai Hebou dekenai ita mai neganai, dahaka ese moale korikorina be ita ia henia diba? (b) Dahaka ese ita ia hamarerea Hesiai Hebou lalonai haere ita henia totona?
5. Badina be dahaka Hesiai Hebou lalonai ita kamonai gaudia ita badinadia bona ita gaukaralaidia karana ese ita do ia durua bada?
6. Iehova ena orea ese ita ia hagoadaia, dahaka hahenamo do ita davaridia totona?