Haroro Gaukara Dekenai Haida Durudia Dalana
1 Keristen kongregesen ginigunana idia haginia negana ia mai hari, kongregesen iboudiai edia taunimanima be haroro taudia. Iesu ese ena hahediba taudia dekenai haroro gaukara karaia dalana ia hadibaia, bona “rua rua amo idia ia siaia lao.” (Mar. 6:7; Luka 8:1) Filipi kongregesen lalonai, aposetolo Paulo ese ia danu idia “gaukara hebou taudia” ia gwauraia, “idia be [ia] danu idia gaukara hebou Sivarai Namona” harorolaia totona. (Fil. 4:3) Ena be nega ibounai haroro dekenai ma ta danu do ita gaukara be taravatu lasi, to ita ibounai ita moale ma ta danu ita gaukara hebou neganai. (Koh. 4:9) Vadaeni, ita haroro neganai, edena bamona do ita hagoadaia heheni bona ita heduru heheni diba?
2 Haroro totona ita hebou ena badina ta be ita ura idia haroro matamaia eiava idia manada momokani lasi pablisa taudia ita durudia. (omMO rau 77, 97) Pioneer taudia matamatadia danu be reana idia ura idia manada pablisa taudia eiava elda o hesiai tauna danu idia gaukara hebou. Unai be nega namona idia ‘heduru heheni totona.’—Roma 1:12.
3 Dika ta ia vara garina, namona be gabu haida dekenai pablisa taudia be ma ta danu do idia gaukara hebou. Eiava nega haida ena be oi hegaegae goada pablisa danu do umui gaukara hebou totona, to bema ia manada lasi pablisa tauna ia mai haroro totona, namona be unai tauna oi bamoa be namo. Bema ita idia noia unai bamona do ita karaia totona, lalokau karana be guna ita hegaegaelaia dalana ita haidaua “manoka taudia [ita] durua” totona. Ena be hanaihanai oi bamoa tauna be tamona, to nega haida ia oi rakatania bona manoka tauna ta oi durua be namo.—Kara 20:35.
LALO-TAMONA DEKENAI ITA GAUKARA
4 Haroro gaukara dekenai ta ita bamoa neganai, namona be lalo-tamona dekenai ita gaukara. (1 Korinto 3:6, 9 itaia.) Umui ruaosi be sivarai umui herevalaia diba, reana ruma ta dekenai oi ese hereva oi hamatamaia bona murina ruma ai oi ia bamoa tauna ese hereva ia hamatamaia. Ita ia bamoa tauna ia hereva neganai, namona be ita matauraia bona iena hereva ita kamonai henia namonamo.
5 Ena be ita ia bamoa tauna ese hereva ia gunalaia, to nega haida ita durua be namo, to ita laloa namonamo guna. Bema ruma tauna ena lalona veria herevana ia kikilaia iseda bamoa tauna ena hereva do ita utua lasi. Momokani, bema ia manada lasi pablisa tauna ese ruma tauna ena dadaraia herevana dainai ia daradara, do ia moale ita durua neganai.—Koh. 4:12.
6 Ruma ta ita rakatania bona ma ruma ta dekenai ita lao henia neganai, iseda haroro herevana hanamoa dalana ita kikilaia diba. Reana Reasoning buka dekenai idia noho hamatamaia herevadia ta eiava Iseda Basileia Gaukara pepana dekenai ia noho heduru herevana ta ita laloa, namona be ita gaukaralaia toho ruma taudia edia lalona veria totona. Ma ta danu ita gaukara hebou be dala namona ita diba heheni totona, bona unai ese iseda Keristen kara tadikaka ibounai dekenai ia hagoadaia.
7 Iseda haroro gaukara be davana bada gauna ta bamona. (2 Kor. 4:1, 7) Dala ia kehoa neganai ma ta danu ita haroro hebou totona, ita heduru heheni diba unai gaukara helagana ita laloa bada totona. Bona danu, unai nega lalonai, ita hagoadaia heheni diba bona ita bamoa tauna ena haroro dalana ita itaia diba. Unai ese iseda moale do ia habadaia, iseda haroro dalana do ia hanamoa, bona iseda tadikaka bona taihu danu do ita lalo-tamona ena mamina do ita abia diba.—Sal. 133:1.
[Questions]
1. (a) Iseda haroro gaukara dekenai, edena bamona ita hahedinaraia diba iseda orea taudia be haroro taudia? Haheitalai haida oi gwauraia. (b) Ita dekenai henanadai badana ta be dahaka?
2, 3. Haroro totona ita hebou neganai, ita ibounai ita ‘heduru heheni totona’ dahaka ita karaia diba?—Roma 1:12; Kara 20:35.
4, 5. Haroro gaukara ita karaia neganai, ita ia bamoa tauna be edena bamona do ita mataurai henia diba?
6. Haroro gaukara dekenai ta ita bamoa neganai, unai ese iseda Keristen kara tadikaka dekenai edena bamona ia hagoadaia?
7. (a) Iseda haroro gaukara be edena bamona ita laloa be namo? (b) Haroro gaukara dekenai ta ita bamoa neganai, dahaka hahenamo do ita davaria diba?