Oi Bamoa Tauna Oi Durua
1. Haroro gaukara ai taunimanima rua rua idia gaukara hebou ena namo be dahaka?
1 Nega ta ai, Iesu ese hahediba taudia 70 ia siaia haroro totona, bona “rua rua dekena amo ia siaia.” (Luka 10:1) Unai kara ese Iesu ena hahediba taudia ia durua haroro gaukara lalonai idia durua bona hagoadaia heheni totona. Pablisa ma ta ida ita gaukara hebou neganai, edena dala ai ia ita durua diba?
2. Haroro gaukara ai ita bamoa tauna ia hereva neganai, edena dala ai bona dahaka dainai ita kamonai be gau badana?
2 Kamonai Karana: Haroro gaukara ai oi bamoa tauna ia hereva neganai, iena haroro herevana oi kamonai namonamo. (Iam. 1:19) Bema ia be Baibel siri ta ia duahia, emu Baibel amo unai oi badinaia danu. Oi bamoa tauna o ruma tauna ia hereva neganai, ia oi itaia. Bema oi kamonai namonamo, reana unai ese ruma tauna do ia durua ia kamonai danu.
3. Edena nega ai oi bamoa tauna ena hereva oi durua diba?
3 Ita Laloparara Edena Negai Do Ita Hereva: Haroro gaukara ai ita bamoa tauna ia hereva neganai, namona be ita hereva lasi, unai amo ita hahedinaraia ia ita matauraia. (Roma 12:10) Ia hereva tauna ena hereva ita koua lasi be namo. Bema ita bamoa tauna be do ia herevalaia gaudia ia laloaboio o ruma tauna be henanadai ta ia henia bona ita bamoa tauna ia ura ia ita durua, namona be ia herevalaia gauna ita habadaia, namo lasi gau idauna ma ta ita herevalaia. (Aon. 16:23; Had. 3:1, 7) Namona be iseda hereva amo ita bamoa tauna ena haroro herevana ita habadaia.—1 Kor. 14:8.
4. Dahaka ita karaia diba haroro gaukara lalonai moale ita davaria bona anina namona ita havaraia totona?
4 Hahediba taudia 70 be rua rua idia gaukara bona edia haroro gaukara idia hadokoa neganai, idia be “mai moale ida idia giroa.” (Luka 10:17) Ita danu haroro gaukara lalonai ta ita bamoa neganai, namona be ita kamonai bona ita laloparara edena negai do ita hereva, unai amo moale do ita davaria bona anina namona do ita havaraia.