Oi Ia Bamoa Pablisa Oi Durua
1. Haroro gaukara ai pablisa ta ita bamoa neganai, edena dala ai aposetolo Paulo ita tohotohoa?
1 Aposetolo Paulo be ena tadikaka ida ia noho neganai, ia laloa unai be nega namona idia “hagoadaia heheni” totona. (Roma 1:12) Haroro gaukara ai pablisa ta be oi ia bamoa neganai, unai be nega namona ia oi hagoadaia bona durua totona. Danu, ia oi hadibaia dahaka ese oi ia durua haroro gaukara oi karaia namonamo totona.
2. Edena dala ai pablisa ta ita durua haroro ai ia gari lasi totona? Dahaka dainai unai be gau badana?
2 Gari Hanaia Dalana: Pablisa haida be reana edia gado regena o vairana toana amo idia hahedinaraia idia gari. Eda hanamoa hereva namodia amo edia gari mamina ita kokia diba. Edena dala haida ai idia ita hagoadaia diba? Sekit naria tauna ta ese ena gari karana bona edena dala ai guriguri ese ia durua unai gari mamina ia hanaia sivaraina be ia bamoa pablisa dekenai ia gwauraia. Tadikaka ma ta ese ena gari ia hanaia dalana be inai bamona ia gwauraia: “Kiri toana lau hahedinaraia guna. Nega haida Dirava lau noia, lau ia durua unai kiri toana lau hahedinaraia totona.” To dahaka ese oi ia durua haroro gaukara dekenai oi gari lasi totona? Unai be oi ia bamoa pablisa dekenai oi gwauraia.
3. Pablisa ese ena haroro ia hanamoa totona, dahaka gaudia ita herevalaia diba?
3 Dala Namodia Haida: Hereva kwadogina, henanadai ta, o emu gabu ai ia vara gauna ta amo emu haroro herevana oi hamatamaia, a? Iseda Basileia Gaukara pepana ai idia noho haroro herevana ta oi hanamoa sisina bona anina namona ia havaraia, a? Oi ia bamoa pablisa dekenai unai oi herevalaia. (Aon. 27:17) Lou henia ta itaia totona umui lao lalonai, namona be pablisa oi hadibaia, emu palani be dahaka bona edena bamona emu palani oi hagugurua. Emu stiuden ena stadi lalonai oi gaukaralaia siri ta, point ta, o hadibaia dalana ta ena badina be stadi murinai oi ia bamoa pablisa dekenai oi herevalaia.
4. Dahaka dainai ita ura eda tadikaka taihu ita durua?
4 Keristani taudia ginigunadia idia ura kamonai taudia idia durua. To danu, idia diba tadikaka taihu idia hagoadaia heheni be gau badana. (Kara 11:23; 15:32) Aposetolo Paulo be Timoteo ia hadibaia murinai, ia hamaoroa ia dibaia gaudia be ma haida dekenai ia hadibaia be namo. (2 Tim. 2:2) Laloaboio lasi, haroro gaukara ai eda tadikaka taihu dekenai kara namodia ita karaia neganai, edia moale ia bada, edia gaukara idia karaia namonamo, bona eda guba Tamana ita hamoalea.—Heb. 13:15, 16.