Hereva Momokani be Mai Aonega Ida Gaukaralaia Namonamo
1 Mai aonega danu Dirava ena Hereva ita gaukaralaia namonamo neganai, unai ese taunimanima ia durua diba sivarai namona do idia ura kamonai totona. Unai dainai, Paulo ese tadikaka ia hagoadaia edia haroro gaukara do idia karaia namonamo totona, ia gwau: “Do oi gaukara goada, vadaeni gaukara namona tauna do oi lao, Dirava ese oi dainai do ia moale bada totona. Vadaeni oi ese hereva momokani do oi hadibaia maoromaoro, bona Dirava ena vairanai do oi hemarai lasi.”—2 Tim. 2:15.
2 Mai aonega danu Bible ita gaukaralaia diba ena dala ita tahua be namo. Ita sibona eda stadi ita karaia totona bona Keristen heboudia dekenai ita lao totona, nega ita atoa be gau badana. To, mai anina bada gauna be hanaihanai ita lao haroro bona Bible ita gaukaralaia ita diba gaudia ita hahedinaraia totona. Unai bamona ita karaia totona, namona be Dirava ena heduru bona hakaua dalana ita tahua bona ita hekwarahi noho.—1 Ioane 3:22.
3 Dirava Ena Hereva Gwauraia Bada: Namona be taunimanima idia diba ita harorolaia sivaraina be ita sibona ita havaraia gauna ta lasi, to ia be Dirava ena Hereva amo ia mai. (Ioane 7:18) Taunimanima ta dekenai, Bible dekena amo Dirava ena lalohadai gau ta dekenai, ita hahedinaraia neganai, edia lalona ita hamarerea diba. Kudou-maoro taudia ia veridia Bible ena siahu bada sivaraina idia ura kamonai henia totona. Bible siridia ita gaukaralaia momo neganai, gaukaralaia namonamo dalana do ita diba bona taunimanima do ita durudia diba Dirava ena Hereva ma haida do idia diba totona, bena unai amo namo do idia davaria.
4 Taunimanima momo herea be Bible ena hereva idia diba namonamo lasi. Bible ita gaukaralaia neganai, siri haida ita duahia sibona be hegeregere lasi. Namona be ita laloa namonamo bona ita hegaegae namonamo guna unai siri ita herevalaia hamatamaia dalana ita diba totona. Reana henanadai haida eiava ia vara hekwakwanai ta ita gwauraia diba taunimanima edia lalona ita veria totona. Danu, namona be ita laloa namonamo Bible ena siri ita duahia murinai dahaka do ita hereva. Bema nega tamona sibona unai siri ita duahia, reana ita hereva henia tauna be siri ena anina do ia abia lasi. Bema ita duahia sirina ena hereva badadia ita gwauraia lou bona ena anina ita gwauraia, taunimanima ese ita gwauraidia gaudia do idia laloatao.
5 Iesu be kudou-maoro taudia ia durudia totona bona ia dekenai idia hepapahuahu taudia edia hereva ia hakoikoia totona, hanaihanai ia ese Bible ia gaukaralaia. Paulo be vaia ena kara ia hadibaia hereva be Bible dekena amo ia hahedinaraia bona ia hamomokanidia. (Kara 17:2, 3) Bema ita hekwarahi noho mai aonega danu Hereva momokanina ita harorolaia namonamo dalana ita diba totona, iseda haroro gaukara dekenai do ita gari lasi bona iseda moale do ia habadaia.
[Questions]
1. (a) Timoteo Iharuana 2:15 dekenai, aposetolo Paulo ese ita ia hagoadaia dahaka do ita karaia totona? (b) Bible ita gaukaralaia namonamo ena namo ta be dahaka?
2. (a) Ita be diba edena bamona ita abia mai aonega danu Bible ita gaukaralaia namonamo totona? (b) Ioane Ginigunana 3:22 duahia. Bema ita hekwarahi Iehova ita hamoalea totona, dahaka do ita abia?
3. Ioane 7:18 duahia. Bema Bible ita gaukaralaia namonamo, taunimanima ese dahaka namo do idia davaria? Ita dekenai ena namo be dahaka?
4. Taunimanima momo herea be Bible ena Hereva idia diba namonamo lasi dainai, ita durudia totona ita karaia diba gaudia haida be dahaka?
5. Kara 17:2, 3 duahia. Paulo bona Iesu ese edia haroro gaukara idia karaia namonamo diba ena badina ta be dahaka? Dahaka ese iseda haroro gaukara ia durua anina ita havaraia totona?