Pioneer Gaukara—Hahenamo Momo Gauna
1 Iehova ia ura ita moale bona iseda gaukara bada dekena amo namo do ia vara. (Koh. 5:18) Mai anina bada gauna be Basileia ita harorolaia bona taunimanima be hahediba taudia ai ita halaodia. Paulo ese Timoteo ia hagoadaia, ia gwau: “Sivarai Namona harorolaia gaukara do oi karaia, bona Dirava ena hesiai tauna ena dagi karadia ibounai do oi karaia namonamo.” (2 Tim. 4:5) Paulo ese Timoteo ia hagoadaia, bona hari inai negai iena hereva ese ita ibounai danu ia hagoadaia iseda kudouna ibounai ida iseda hesiai gaukara do ita karaia namonamo totona. Haida dekenai mai edia kudouna ibounai ida hesiai gaukara idia karaia ena anina be regular pioneer gaukara do idia karaia. Namona be mai guriguri danu oi laloa namonamo: Lau be hegeregere nega ibounai hesiai gaukara do lau karaia totona, a?
2 Emu Lalona Oi Hadaia be Gau Badana: Pioneer gaukara do oi karaia totona, gau badana be oi gurigurilaia bona emu guriguri hegeregerena kara do oi karaia. Namona be mai emu kudouna ibounai ida Iehova ena hesiai gaukara oi ura karaia, bona taunimanima lalokau henidia karana oi habadaia. Emu haroro gaukara ena nega oi habadaia, emu lou-henia bona Bible stadi gaukaradia danu. Namona be oi badinaia diba sediual namona oi karaia. Elda bona pioneer taudia dekena amo heduru hereva haida oi tahua. Mai aonega ida emu haroro gaukara sediual oi karaia, bena oi badinaia noho. Mai anina bada gaudia be sibona oi sisiba henia, gaukara oi hamatamaia diba, bona oi boga-auka. (1 Kor. 9:23, 25, 27) Hua gunana haida lalodiai, tanobada ibounai lalonai pioneer gaukara dekenai idia vareai taudia 10,000 ese unai bamona idia karaia.
3 Namona be haroro gaukara dekenai do ita ura tahua gaudia ita abia hidi bona ita gaukara goadagoada ita hagugurudia totona, unai amo haroro gaukara karaia dalana dekenai iseda diba ita habadaia neganai, iseda haroro dalana do ia namo ia lao. Ruma ta ruma ta gaukara dekenai iseda hamatamaia herevadia eiava idia gwauraia koua herevadia ita hanaidia toho dalana do ita hanamoa diba, a? Ita idia henia bukadia, magasin, bona buklet iboudiai ita gaukaralaidia namonamo, a? Lauma dalanai ia goada ia lao tauna ta ida Bible stadi ita karaia, a? Iseda lalona ita hadaia diba hari ita be heduru pioneer gaukara ita karaia totona, bena gabeai reana regular pioneer gaukara do ita karaia, a? Ita ura tahua gaudia ita abia hidi neganai, namona be idia be ita hagugurua diba gaudia. Unai gaudia ita hagugurua neganai, unai ese ita do ia durua iseda haroro dalana do ita hanamoa totona bona unai amo do ita moale.—1 Tim. 4:15, 16.
4 Mauri Ena Hahenamo Ta: Ura namona amo pioneer gaukara ita karaia, bona ita ura lauma dalanai ita goada ita lao neganai, hahenamo momo ita davaria. Hegeregere, Iehova ita tabekau henia karana ita habadaia. Nega ibounai ita haroro neganai, Dirava ena Hereva be aonega dalanai ita gaukaralaia diba. Kongregesen lalonai iseda kara be haheitalai namona, bona unai gaukara ita karaia goadagoada dainai reana ma haida ita hagoadaia diba edia hesiai gaukara do idia habadaia totona. Pioneer gaukara ese ita ia durua diba iseda mauri lalonai lauma gaudia ita laloa momo totona, bona ita ia durua, tanobada ena kara, ena ura, bona ena hebamo dikadia ita dadaraia totona.
5 Iesu be ena hahediba taudia dekenai, ia gwau: “Uiti ena anina abia negana ia ginidae vadaeni, to utua taudia be momo lasi. Uma ena biaguna dekenai umui noinoi, ia ese utua taudia ma haida do ia siaia, iena uiti do idia utua.” (Mat. 9:37, 38) Hari inai nega lalonai gaukara be bada herea bona Iesu ena nega lalonai idia karaia gaukarana ia hanaia, unai dainai, namona be gaukara taudia idia momo herea. Pioneer gaukara ita karaia neganai, ita be mai eda dala unai mai anina bada gaukarana ita karaia badabada totona. Unai gaukara be taunimanima hamauria gaukarana. Iseda mauri ibounai lalonai iseda Havaraia Dirava Badana ena hesiai gaukara ita karaia neganai, lalo-namo bona moale mamina ita abia; ma gaukara ta amo unai bamona mamina ita davaria lasi.—Her. 10:22.
[Questions]
1. (a) Timoteo Iharuana 4:5 duahia. Paulo ese Timoteo ia hagoadaia dahaka do ia karaia totona? (b) Ita ta ta ibounai idia hagoadaia ita sibona dekenai dahaka henanadai ita henia totona?
2. (a) Ita ta ta ibounai dekenai heduru hereva haida be dahaka? (b) Korinto Ginigunana 9:23, 25, 27 duahia. Nega ibounai hesiai gaukara ia karaia totona, Paulo ese dahaka ia karaia?
3. (a) Namona be edena bamona gaudia ita ura tahua? (b) Ita ura tahua gaudia haida be dahaka? Unai gaudia ita hagugurua neganai, unai kara ena namo ita dekenai be dahaka?
4. (a) Pioneer gaukara amo hahenamo haida be dahaka? (b) Dahaka dainai kongregesen taudia idia moale idia huanai pioneer taudia idia noho dainai?
5. (a) Hereva Lada-isidia 10:22 duahia. Unai siri lalonai ita ia hagoadaia herevana be dahaka? (b) Dahaka dainai Iesu ena hereva Mataio 9:37, 38 dekenai be hari inai nega lalonai ia guguru bada?