Lou-Henia Namodia Karaia Dalana
1 Henanadai namodia gwauraia; mai hemataurai danu oi henanadai henidia.
Noutbuk amo guna oi kikilaia gauna oi itaia, bena reana inai bamona oi hereva diba:
◼ “Dirava ia gwauhamata kara maoromaoro amo tanobada dekenai do ia lohiaia, unai hereva dekenai ma lalohadai haida oi abia, a?
Henanadai ma ta be inai:
◼ “Pura gunanai Bible ena sivarai ita kikilaia murinai oi laloa oiemu guriguri Dirava ena Basileia do ia mai totona be mai anina bada, a?”
Moale vairana bona moale herevana amo unai henanadai ita gwauraia neganai ia hedinarai ita ura momokani ita diba.
2 Hereva Haragaharaga Lasi; Ruma Tauna Ena Hereva Kamonai Henia Namonamo: Bema ruma tauna ena hereva ita kamonai henia namonamo, bona ena hereva ita laloa namonamo guna, bena murinai ita haere, do ia diba iena hereva ai ura kamonai. Ena hereva hegeregerena, Bible ena hereva ma ta oi henia diba, guna oi gwauraia herevana dekenai do ia hesiriu kau totona. Namona be oi hegaegae bena ruma tauna oi lou henia negadiai gau matamatana ta oi hadibaia. Bema sivarai ma ta ia gwauraia, namona be emu Bible Ena Hereva Badadia buklet, eiava bema English gado oi diba, emu Reasoning buka oi kehoa ena henanadai oi haerelaia totona.
3 Bema nega dokona ia gwauraia “Gima Kohorona” ta oi hariharilaia, reana do oi gwau diba:
◼ “Guna ita kiki hebou neganai, ita ese lagani 1914 ena sivarai ita kikilaia. Unai lagani lalonai ia vara tuarina ese gavamani dekenai kara idauidau ia havaraia. Unai nega ia mai hari, kara idauidau momo idia vara. To unai kara idauidau ese taunimanima idia durudia, eiava maino momokani idia havaraia, a? [Naria ia haere totona.] Iesu ese ena hahediba taudia ia hadibaia gavamani ta totona idia guriguri, badina unai gavamani sibona ese hari idia vara hekwakwanai ia haoredia diba. [Mataio 6:9, 10 duahia.] Oi laloa Dirava ena Basileia ese dahaka do ia havaraia? [Naria ia haere totona.] Bible ena sivarai unai hereva dekenai be namo herea.” Hari Daniel 2:44 oi duahia. Bena Dirava ena Basileia henunai do ia vara gaudia hahedinaraia totona, reana Mauri Hanaihanai buka ena rau 12 bona 13 edia laulau oi kehoa diba.
4 Bema tanobada dekenai kara maoromaoro lasi karadia ia gwauraia “Noga!” magasin ta oi hariharilaia, reana oi gwau diba:
◼ “Guna lau mai neganai, ita ese tanobada dekenai kara maoromaoro lasi karadia ita kikilaia; kara maoromaoro lasi bona hisihisi ese idia abia garina taunimanima be edia tano korikori idia rakatania. Taunimanima ese ma taunimanima haida idia hahisihisidia, to oi laloa Dirava ese unai kara ia ura henia, a?” Ena haere hegeregerena reana oi ese Kohelete 4:1 eiava Salamo 72:12-14 ena hereva oi duahia. Bena oi ese “Itaia!” buklet ena rau 15 oi kehoa diba bona paragraf toi oi duahia bona edia henanadai oi henia, eiava edia anina oi kikilaia diba.
5 Namona be ruma taudia ita laloa bada bona nega ibounai ita hegaegae Bible ena sivarai ita kikilaia totona, unai neganai iseda lou-henia gaukarana dekenai do ita kwalimu.