Lou-Henia Dekenai Mauri Hanaihanai Buka Gaukaralaia
1 Aposetolo Paulo ia diba hereva momokani idia ura kamonai henia taudia ia durudia noho be gau badana. Ia gwau idia be tubutubu gaudia bamona, hanaihanai ranu idia henia bona rei idia kokia be gau badana. (1 Kor. 3:6-9) Hari inai negai danu, kamonai taudia ita lou henidia neganai, ita durudia namonamo lauma dalanai do idia tubu goada totona.
2 Namona be inai ita laloatao, guna ita hereva henidia taudia be reana iseda hereva idia laloaboio, unai dainai ita lou henidia neganai guna ita herevalaia gaudia ita gwauraidia lou sisina be namo. Bena, ita lou henidia loulou neganai, guna ita kikilaia herevana do ita riviulaia be namo, bona ruma tauna ia moalelaia herevana ma ita habadaia. Namona be ruma tauna ena lalona ita veria ita danu ia herevahereva totona bona ita durua dalana ita diba totona.
3 Lou-henia karaia neganai, herevana guna “Mauri Hanaihanai” buka ia abia eiava lasi, Baibel stadi hamatamaia totona reana inai bamona oi hereva diba:
◼ “Taunimanima momo ai hereva henidia bona idia momo idia gwau guna idia be mai edia henanadai Baibel dekenai, to inai buka ese ia haerelaidia.” Bena murinai Mauri Hanaihanai buka oi kehoa rau 5 ena Anina dekenai, bona oi nanadaia: “Inai karoa iboudiai amo edena ta oi ura henia?” Karoa ta ia gwauraia neganai, buka oi kehoa unuseniai bona ruma tauna oi hadibaia paragraf ta ta iboudiai henudiai henanadai idia torea unai paragraf ta ta edia hereva badadia hahedinaraidia totona. Hereva badadia haida sibona oi kikilaidia bona nega oi hegaegaelaia do oi lou henia totona.
4 Dala ma ta be inai:
◼ “Pura gunanai ita herevahereva dainai lau moale. Taunimanima idia daradara, idia gwau dahaka dainai nega momo edia ruma dekenai ai mai? Lau laloa inai Mauri Hanaihanai Paradaiso Lalonai buka ena rau 29 dekenai idia torea herevana do oi ura henia. [Paragraf 11 oi duahia.] Ita duahia herevana dainai, Dirava ese iseda tomadiho ia abia dae totona, oi laloa dahaka ita karaia be namo? [Naria ia haere totona bena murinai ruma tauna hanamoa.] Iesu ena nega lalonai, taunimanima haida idia laloa Dirava ese edia tomadiho karana ia abia dae. Inai karoa ena paragaf 2 ese unai taudia ia herevalaidia inai bamona.” Duahia bona anina gwauraia.
5 Guna “Mauri Hanaihanai” buka oi henia tauna oi lou henia neganai, reana inai bamona oi hereva diba:
◼ “Guna lau mai neganai, tanobada dekenai idia vara kara dikadia idia ore be namo ita kikilaia hebou. Dahaka dainai Dirava ese kara dika ia koua lasi be nega haida oi laloa, a?” Naria ia haere totona bena buka oi kehoa rau 99, paragraf 2 ai, bona henanadai rua oi gwauraidia. Unai paragraf duahia bona Baibel siridia danu. Kiki mamina hanamoa totona buka ena laulau haida oi hahedinaraidia, hegeregere rau 78, 84-5, 119, 147, 149-53, bona 156-8.
6 Guna Pepapepa Ita Henia Neganai: Nega ginigunana taunimanima ita hereva henidia neganai, nega haida pepapepa ita rakatanidia. Unai taudia ita lou henidia neganai, pepapepa dekena amo paragraf tamona eiava rua ita kikilaia bona idia torea Baibel siridia ita duahidia diba. Bena murinai Mauri Hanaihanai bukana ita kehoa bona unai Baibel siri tamona ena anina idia kikilaia herevadia ma haida ita hadibaia. Bema ruma tauna toana be ia ura kamonai, namona be Mauri Hanaihanai buka ita henia toho bona nega ita hegaegaelaia gabeai ita lou henia ia danu ita kikilaia hebou lou totona.
7 Mai iseda abidadama danu Keristen tomadiho lalonai taunimanima ita naridia tubutubu gaudia bamona, bona Dirava ese unai gaukara do ia hatubua iena ladana ia hanamoa bona ia hahairaia totona.—1 Kor. 3:7.
This article is repeated in km 7/95, 12/95.