Kamonai Taudia Oi Lou Henidia
1 Ruma-ta-ruma-ta gaukara ita karaia neganai, nega be hegeregere lasi kamonai taudia danu ita herevahereva daudau totona. Nega momo lou henia bona Baibel stadi amo ita hadibadia namonamo diba. (Mat. 28:19, 20) Lou henia namona ita karaia totona, namona be nega ginigunana ai ita kikilaia gaudia ita laloa, bena hereva ma haida ita hegaegaelaia unai hereva habadaia totona.
2 Bema umui ese ruma bese idia noho namo lasi karana umui kikilaia, “Mauri Hanaihanai” buka ena karoa 29 ena hereva oi gaukaralaia diba. Inai bamona oi hereva diba:
◼ “Vanegai, ita gwau Baibel ena sisiba badinaia be aonega karana ruma bese ia moale totona. Oi laloa dahaka gau ese ruma bese taudia ia hatamonaia diba hari?” Haere naria. Rau 247 oi kehoa bona paragraf 27 dekenai Kolose 3:12-14 oi duahia. Lalokau korikorina ese ruma bese ia hatamonaia daladia haida oi herevalaia. Oi hahedinaraia edena dala amo Mauri Hanaihanai buka stadilaia karana ese hekwakwanai ia hanamodia diba.
3 Bema nega ginigunana ai, tanobada ia dika ia lao umui kikilaia, unai hereva be inai bamona oi habadaia diba:
◼ “Lau diba oi laloa bema ita ura maino ai ita noho, kara badadia idia vara be namo. Baibel ia hahedinaraia Satana be iseda hekwakwanai edia badina badana. Haida be dahaka dainai Dirava ese Satana ia hamasea lasi, idia daradaralaia. Dahaka oi laloa?” Haere naria. Mauri Hanaihanai buka ena rau 20 oi kehoa, bona paragraf 14 bona 15 amo, Satana ia hamasea lasi ena badina oi hahedinaraia. Bena Roma 16:20, kahirakahira dahaka do ia vara ia gwauraia sirina oi duahia.
4 Bema Basileia ese do ia havaraia hahenamo umui kikilaia, oi lou henia neganai inai bamona oi hereva diba:
◼ “Dirava ena Basileia ese hahenamo bada do ia havaraia tanobada bona taunimanima dekenai. Unai hahenamo be rau 12 bona 13 dekenai idia hedinarai. Inai laulau lalonai dahaka oi ura henia? [Haere naria.] Mani oi laloa, inai bamona tanobada dekenai oi noho ena mauri be edena bamona?” Paragraf 12 duahia. Bema idia ura kamonai, paragraf 13 ena henanadai ena haere umui kikilaia. Oi hamaoroa inai karoa ese henanadai momo Basileia ena hahenamo dekenai ia haerelaia, bona oi ura oi vadivadi lou negana umui kikilaia.
5 Inai bamona oi hereva diba stadi hamatamaia totona:
◼ “Taunimanima momo be inai buka lalonai edia Baibel henanadai momo edia haere idia davaria.” Oi kehoa buka ena anina dekenai, bona oi nanadaia: “Edena hereva ese oiemu lalona ia veria?” Ia haere murinai, ia ura karoa oi kehoa bona paragraf ginigunana oi duahia. Oi hamaoroa rau ta ta henunai henanadai ese paragraf ta ta edia hereva badadia idia gwauraia hedinarai. Paragraf tamona eiava rua amo oi haheitalaia, bena nega oi hegaegaelaia oi lou henia totona.
6 Mauri Hanaihanai buka idia ura henia taudia ita lou henidia ese ia hahedinaraia ita ura haroro gaukara ita karaia namonamo. (2 Tim. 4:5) Ita idia kamonai henia taudia ita durudia diba mauri hanaihanai idia abia totona.—Ioa. 17:3.
This article is repeated in km 6/95.