Tau Hereadaena Buka Stadilaia Neganai
1 Iesu Keriso ena mauri bona gaukara ita stadilaia be moale bada karana! Unai buka be guna ita stadilaia bukadia bamona lasi, unai dainai Hakaua Oreana ese ita dekenai heduru hereva idia siaia. Unai dainai, idia gwauraia stadilaia dalana be hari ita badinaia be namo.
2 Buka ena rau dekenai namba be lasi, unai dainai Iseda Basileia Gaukara pepana dekenai pura ta ta iboudiai do ita stadilaia karoa, nega momo unai be rua rua, idia torea hedinarai. Karoa 35, 111, bona 116 be idia lata dainai, unai karoa toi be idia hapararaia stadi tamona lasi, to stadi haida idia karaia. Duahiduahi ia diba namonamo tadikakana be karoa ibounai (eiava karoa 35, 111, bona 116 dekenai hereva kwarana henunai hereva ibounai), ia duahia murinai, stadi naria tadikakana be unai karoa dekenai idia noho henanadai do ia gwauraia. Unai karoa lalonai haere be gabu idauidau dekenai idia noho. Naria tadikakana be unai karoa dekenai hereva badadia do ia kikilaia sisina.
3 Murinai, bema nega ia do noho, karoa dokonai idia torea Bible siri iboudiai do umui duahidia. Bible siri haida idia lata neganai, oi hapararaia pablisa ta ta ese siri haida idia duahia totona, bena murinai unai siri edia anina umui kikilaia diba. Stadi naria tauna be henanadai namodia do ia hegaegaelaia guna, unai be heduru namona pablisa taudia ese idia duahia Bible siri edia anina, karoa ena hereva dekenai, idia haerelaia namonamo diba totona. Namona be henanadai bona haere iboudiai be helai taudia idia durua Iesu Keriso ena mauri, ena gaukara, bona ena hahediba herevadia idia diba namonamo totona.
4 Tau Hereadaena bukana be Iesu ena mauri lalonai idia vara gaudia be nega korikori negana lalonai idia hahedinaraia. Ita kamonai sivaraidia bona idia vara gabudia ita lalohadailaidia namonamo neganai, unai ese ita ia durua do ita lalodia tao totona. Unai dainai, namona be kala idauidau laulaudia umui itaia namonamo bona buka ena vairana kahanai, hamatamaia herevana murinai, nega momo mapu umui itaia.
5 Unai buka ena hereva umui diba namonamo totona gau badana be unai stadi dekenai idia helai vareai taudia iboudiai do idia hegaegae namonamo. Pura iboudiai stadi naria tauna do ia hegaegae be gau badana, unai neganai ia ese grup taudia ia durudia diba tau hereadaena, iseda Lohiabada bona Hahemauri Tauna, Iesu Keriso, do idia diba totona.
This article is repeated in km 3/97.