Haida Durudia Kohu Badana ta Idia Diba Totona
1 Taunimanima dekenai Basileia ena sivarai namona ita harorolaia neganai, namona be ita ura kudou-maoro taudia ita durudia Dirava ena Hereva ena namo bada do idia diba totona. (Fil. 3:8) Iseda buka bona magasin edia sivarai be Baibel dekena amo bona idia be mai anina bada Basileia ena gaukara ita habadaia totona. Hegeregere, taunimanima tausen momo be Mauri Hanaihanai bukana amo Baibel ena hereva momokanidia idia diba, bona unai ese ia durudia Iehova ena hesiai gaukara idia karaia totona.
2 Iseda haroro gaukara lalonai, ita ura taunimanima dekenai buka eiava magasin ita hariharilaia, to unai mo sibona lasi. Namona be taunimanima idia ura henia dalana ai ita harorolaia, ruma tauna ena hereva be mai lalo-parara danu ita kamonai henia, bona ita hegaegae noho ‘Buka Helaga ia danu ita herevalaia’ totona.—Kara 17:2.
3 Edena Bamona Unai Ita Karaia Diba: Iseda hamatamaia herevana amo dala ita kehoa diba ruma tauna ese ena lalohadai Baibel dekenai ia gwauraia, bona tanobada dekenai idia vara hekwakwanai edia anina do ita gwauraia hedinarai totona.
Reana inai bamona oi hereva diba:
◼ “Ai mai, hari inai negai idia vara gaudia edia anina herevalaia totona. Guna, taunimanima momo ese Dirava idia laloa, to hari inai negai idia momo ese Dirava bona iena taravatu Baibel lalonai idia laloa lasi. Unai dainai, hari inai negai taunimanima idia kara namo heheni lasi guna idia kara namo heheni bamona. Unai oi itaia, a? [Naria ia haere totona. Reana kara haida do oi gwauraidia.] Mani 2 Timoteo 3:1-5 ena hereva lau duahia, bena unai murinai lau oi hamaoroa, oi laloa unai siri ese ia gwauraia karadia be hari inai negai idia vara eiava. [Duahia; naria ia haere totona.] Vadaeni, oi laloa nega vairai nega namona do ia vara, a?” Bena murinai, buka oi kehoa rau 12 bona 13 dekenai. Bema buka idia ura lasi abia, namona be Mauri mai Mainona Tanobada Matamatana Lalonai pepapepana oi henia toho.
4 Bema tama eiava sina ta be iduara dekenai ia mai, reana iseda hamatamaia herevana be inai bamona:
◼ “Ai be ruma bese edia hekwakwanai hanaidia dalana be taunimanima ida ai herevalaia. Ita ibounai be iseda diba hegeregerena iseda ruma bese edia hekwakwanai ita hanaidia toho, to bema heduru dalana ma ta ia noho, ita ura unai dala danu ita diba, ani? [Naria do ia haere totona.] Baibel ese helaro namona ia gwauraia Kolose 3:12-14 dekenai. [Oi duahia.] Vadaeni, dahaka do ita karaia iseda ruma bese ese noho namona do idia davaria totona? Namona be inai buka ena karoa oi itaia, ena ladana be ‘Ruma Bese Ena Mauri Namona.’ ” Mauri Hanaihanai buka oi kehoa rau 238 dekenai bona paragraf 3 oi duahia. Bema ruma tauna ia bisi bona ia ura lasi ia hereva, namona be ruma bese ena sivarai ia gwauraia magasin matamatana ta eiava Emu Famili Oi Moalelaia pepapepana ta oi henia toho.
5 Namona be ita laloatao, ita haroro ena badina be ita ura Basileia ena sivarai ita harorolaia namonamo. (Mat. 24:14) Bema Baibel bona ita idia henia buka bona magasin namodia ita gaukaralaidia namonamo, ita diba hari inai mai anina bada negana lalonai, Iehova ese iena ura do ia hagugurua, bona iseda gaukara do ia hanamoa.—Gal. 6:9.
[Questions]
1. Sivarai namona ita harorolaia neganai, iseda ura ta be dahaka?
2. Sivarai namona be edena dala amo do ita herevalaia hamatamaia be namo?