Uhe Momo Oi Hadodia, A?
1 Hereva ta ia gwau: “Gaukara ta oi goadalaia neganai, anina do oi davaria bada.” Iseda tomadiho lalonai unai hereva be ia momokani. Hebou totona ita hegaegae neganai, Basileia ena sivarai ita harorolaia neganai, bona iseda tadikaka dekenai lalokau ita hahedinaraia neganai, bema iseda nega bona goada bada ita henia, lauma dalanai iseda goada do ia bada danu. To unai bamona ita karaia lasi neganai, lauma dalanai do ita manoka. Bema ita ura lasi ita hekwarahi eiava iseda lalona ibounai danu ita gaukara lasi, vadaeni anina momo do ita davaria lasi, ani?
2 Aposetolo Paulo be 2 Korinto 9:6 dekenai unai hereva ena maoro ia hahedinaraia, ia gwau: “Uhe momo lasi ia hadoa tauna be anina momo lasi do ia geia, to uhe momo do ia hadoa tauna be anina momo do ia geia.” Uhe momo oi hadoa, a?
3 Sibona Eda Baibel Stadi Karana: Haroro gaukara amo huahua havaraia taudia ai do ita lao totona, uhe momo hadoa gaukarana ai gau ginigunana be sibona eda stadi karana ita goadalaia. Namona be ita ura bada lauma aniani ita ania. (Sal. 119:97, 105; Mat. 5:3) Dina ta ta iboudiai mauri ena hekwarahi ese ita idia hametaua, unai dainai, gau badana be iseda lalona ita hadaia bona ita goada karaia lauma gaudia ita tahua totona. Unai ita karaia totona, gau badana be “nega do [ita] haorea kava lasi.” (Ef. 5:16) Haida be dina ta ta idia abia hidi bona unai dinadia ai daba momokani dekenai idia toreisi, sibodia edia stadi idia karaia totona. Ma haida be hanuaboi ta ta idia abia hidi idia stadi totona. Unai kara amo dahaka huahua ita davaria diba? Iseda abidadama ia hagoadaia, iseda helaro ia hagoadaia, bona mai moale bona lalo-goada danu ita gaukara.—Roma 10:17; 15:4; 1 Pet. 1:13.
4 Kongregesen Heboudia: Salamo 122:1 ai, David ia gwau: “Lau moale, lau dekenai idia gwau: ‘Iehova ena ruma dekenai ita lao.’ ” Oiemu lalohadai be unai bamona danu, a? Uhe momo hadoa ena anina ta be pura ta ta iboudiai, hebou ima dekenai oi lao henidia. Namona be emu lalona oi hadaia, bona herevana medu ia diho eiava dina be ia siahu, to oi lao hebou dekenai. Nega momo, bema hekwakwanai momo ita hanaidia, hahenamo momo ita davaria.
5 Hebou dekenai oi ginidae haraga bona hebou murinai oi noho sisina tadikaka bona taihu danu umui herevahereva hebou umui hagoadaia heheni totona. Namona be tadikaka idauidau momo oi tura henidia. Namona be Gima Kohorona Stadi bona hebou ma haida totona oi hegaegae namonamo, unai neganai uhe momo do oi hadoa diba, anina be haere momo oi henia diba. Hebou dekenai, haida oi “dairia” neganai, idia ese oi do idia “dairia” danu.—Her. 11:25.
6 Haroro Gaukara: Haroro gaukara dekenai uhe momo ita hadoa diba. Bema nega bada ita haroro, ekspiriens namodia, lou-henia namodia, bona idia goada idia lao Baibel stadi ita abidia.
7 Haroro gaukara dekenai uhe momo ita hadodia neganai, namona be unai uhe momo ita hadodia namonamo. Iseda haroro gaukara hanamoa totona, ita ia durua bada diba gauna be Buka Helaga Herevalaia bukana. Rau 9-17 lalodiai, haroro gaukara dekenai taunimanima edia lalona veria totona, hamatamaia herevadia 40 bona ma haida be hereva badadia idauidau 18 henudiai idia toredia. Bema kamonai tauna ta oi davaria, namona be buka dekenai oi torea, bena oi lou henia diba, oi hadoa uhena ena anina do oi abia totona. Reana oiemu hekwarahi amo Baibel stadi ta do oi hamatamaia diba, bona unai tauna oi hadibaia diba bena gabeai uhe momo hadoa gaukarana do ia karaia diba.
8 Bema uhe momo ita hadoa, Iehova ena amo hahenamo momo do ita davaria.—Mal. 3:10.
[Questions]
1. Dahaka dainai tiokratik gaukara dekenai iseda nega bona goada bada ita henia be gau badana?
2. Aposetolo Paulo be 2 Korinto 9:6 ai, “hadoa” gaukara be edena bamona ia gwauraia?
3. Dahaka dainai sibona eda stadi ita karaia be gau badana?
4. Namona be kongregesen heboudia dekenai iseda lalohadai be dahaka?
5. (a) Hebou dekenai dahaka ita karaia diba tadikaka bona taihu momo ita tura henidia totona? (b) Hebou dekenai ma dahaka danu do ita karaia be namo?
6. Haroro gaukara dekenai uhe momo ita hadodia neganai, dahaka namo do ita davaria?
7. Iseda haroro gaukarana ita hanamoa totona, heduru gauna namona ta be dahaka?