Uhe Momo Hadoa to mai Aonega Ida
1 Biru tauna ia diba bema uhe momo ia hadoa, anina momo do ia geia, to bema uhe momo ia hadoa lasi, anina momo do ia geia lasi. (2 Kor. 9:6) Biru taudia idia naria namonamo ia tubu diba lasi gabunai uhe idia haorea kava lasi. Unai hegeregerena, haroro gaukara ai iseda buka bona magasin ita hariharilaia neganai, aonega ita gaukaralaia be namo. Iseda ura be idia ura bada duahia taudia dekenai buka bona magasin ita rakatania. Ita idia hagoadaia inai hereva “henia kava” ita gaukaralaia lasi iseda buka bona magasin ita hariharilaia neganai, badina taunimanima momo edia lalohadai “henia kava” gaudia dekenai be ia maoro lasi. Momo ese “henia kava” gaudia idia laloa maragi bona laloa namonamo lasi dalanai idia negea kava. To nega tamona ai, ita ura kara namo taudia dekenai nega ita henia, Iehova ena hariharibada bona Basileia helarona idia diba totona. Bema ta ese iseda buka bona magasin ia duahidia, unai totona ena nega bona ura sibona ia henia o atoa be hegeregere.
2 Oi Gaukara Sibona: Oi davaria magasin, buklet, bona buka haida be ruma ena pata ta dekenai oi haboudia noho, bona oiemu teritori dekenai idia oi gaukaralaidia diba kara namo taudia ese hereva momokani ena diba idia abia totona, a? (Mataio 25:25 itaia.) Nega haida ruma-ta-ruma-ta gaukarana lalonai magasin o buka haida oi hariharilaia lasi, badina oi hemarai Basileia harorolaia gaukarana idia durua dalana oi gwauraia totona, a?
3 Gaukara idia diba namonamo pablisa taudia idia davaria, auka lasi bona hereva kwadogidia amo iseda Basileia gaukara totona ita abia kontribusen monina ita gaukaralaia dalana idia gwauraia neganai, ruma taudia idia ura heduru monina idia henia.
Oi gwau diba:
◼ “Reana oi laloa noho edena bamona buka bona magasin ai henia diba davana lasi. Inai gaukara be tanobada ibounai Baibel hadibaia gaukarana ena kahana ta, bona taunimanima be edia ura hegeregerena idia henia kontribusen ese inai gaukara ia durua. Bema oi ura heduru moni sisina oi henia inai gaukara durua totona, mai egu moale ida do lau abia.”
4 Ruma taudia momo do idia henanadai buka bona magasin edia davana be hida.
Oi haere diba:
◼ “Buka bona magasin be davana lasi, badina taunimanima be edia ura hegeregere idia henia kontribusen ese inai gaukara idia durua. Bema hari oi ura heduru moni sisina oi henia, mai emai moale ida tanobada ibounai haroro gaukarana dekenai do ai gaukaralaia.”
Eiava oi gwau diba:
◼ “Baibel amo diba ma haida idia ura abia taudia dekenai emai buka bona magasin ai henia. Bema oi ura heduru moni sisina oi henia, inai tanobada ibounai gaukarana durua totona, mai egu moale ida oi totona do lau abia lao.”
5 Magasin Gaukara Lalonai Pablisa Haida ese Magasin Ena Lalona Rau Idia Hahedinaraia Bona Idia Gwau:
◼ “Iniseniai oi itaia bamona, taunimanima be edia ura hegeregere idia henia kontribusen amo emai gaukara idia durua. Bema oi ura heduru moni sisina oi henia inai gaukara durua totona, do lau abia dae diba.”
Auka lasi dalana ma ta be inai:
◼ “Ena be emai buka bona magasin ai henia davana lasi, to aiemai tanobada ibounai gaukarana durua totona heduru moni maragina ai abia dae.”
6 Namona be pablisa be sibona edia maduna tanobada ibounai gaukarana durua dekenai idia laloa bada. Bona momokani, Basileia gaukara durua monina ena kahana badana be Iehova ena Witness taudia ese idia henia. To, bema haroro gaukara lalonai ta be Basileia sivaraina dekenai ena ura ia hahedinaraia, bona buka bona magasin ia ura henia bona ia gwau do ia duahia, namona be dala ita karaia ia hegeregere neganai ena kontribusen do ia henia. Kontribusen henia dalana amo ta ese ia hahedinaraia matamaia diba Dirava ena ura ia hagugurua tiokratik oreana ia laloa bada. Iehova ese tanobada ai idia noho taudia edia lalona ia hamarerea diba, iena gaukara do idia durua totona, bema unai ia ura karaia.
7 Unai dainai, namo lasi Basileia ena uhe hadoa gaukarana ita karaia lasi badina ita ura lasi iseda gaukara ia heau dalana ita gwauraia. Nega tamona ai, aonega be gau badana iseda buka bona magasin be “nadi gabunai” ita haorea kava lasi. (Mar. 4:5, 6, 16, 17) Ita mailaia sivarai namona idia abiadae taudia be idia moale badina dala ita karaia, edia harihari gaudia amo unai gaukara idia durua diba totona.—Mataio 10:42 itaia.