Uhe Momo Hadoa Tauna Ena Hahenamo be Momo
1 Ita ibounai ese Dirava ena Hereva lalonai do idia noho gwauhamata namodia idia guguru negana ita naria noho. Hari danu, Iehova ese iseda mauri idia hamoalea hahenamo momo ia henia. To, hahenamo momo do ita abia dalana be ita gaukara goadagoada. Aposetolo Paulo ia hereva bamona, ‘uhe momo ia hadoa tauna be anina momo ia geia.’ (2 Kor. 9:6) Unai hakaua herevana ia momokani daladia rua mani oi laloa.
2 Eda Haroro Gaukara: Haroro totona dala ia kehoa neganai, bema taunimanima dekenai sivarai namona ita harorolaia, hahenamo momo do ita abia. (Aon. 3:27, 28) Momo ese edia haroro gaukara idia habadaia, haida be heduru eiava regula painia gaukara idia karaia danu, bona unai amo uhe momo idia hadoa. Bona ita ibounai ese uhe momo ita hadoa diba, bema ita davaria kamonai taudia ibounai ita lou henia, edia ura ita habadaia, bona dala ia kehoa neganai Baibel stadi ita hahedinaraia. (Roma 12:11) Unai dala ai ita gaukara goadagoada neganai, ekspiriens namodia ita abia bona haroro gaukara ita moalelaia bada.
3 Basileia Ena Gaukara Ita Durua: Paulo ese ‘uhe momo hadoa’ gaukarana ia herevalaia neganai, moni dalanai idia henia gaudia ia herevalaia. (2 Kor. 9:6, 7, 11, 13) Hari, tauanina bona moni dalanai Basileia ena gaukara ita durua bada diba. Kingdom Hall bona Assembly Hall haginia gaukarana ita durua diba. Ita ese unai tomadiho momokani gabudia hagoevaia bona hanamoa gaukarana ita durua diba. Danu, ita ese iseda kongregesen gaudia totona bona tanobada ibounai Basileia harorolaia bona hahediba taudia halaoa gaukarana totona kontribusen moni ita henia diba. Ita ibounai ese eda maduna ita huaia neganai, ita moale bada badina ita itaia Iehova ese ia henia gaukarana ia hanamoa bada!—Mal. 3:10; Luka 6:38.
4 Dirava ena Hereva ese ita ia hagoadaia ‘kara namodia ita karaia, eda kohu ita haria, bona harihari gaudia ita henia.’ Unai sisiba ita badinaia neganai, hari hahenamo momo ita moalelaia. Bona danu, ‘badina namona ita abia hegaegae, vaira dinadia totona, [bona] unai amo mauri korikori do ita abia momokani.’—1 Tim. 6:18, 19; NW.