Taunimanima Edia Lalona Ita Veria Mauri Hanaihanai Buka Idia Ura Henia Totona
1 Taunimanima edia ruma dekenai ita lao vadivadi neganai, nega momo ita davaria idia be ‘tanobada ena lalo-hekwarahi gaudia dekenai idia laloa momo.’ (Mar. 4:19) Unai dainai, namona be edia lalona veria kiki herevana ita gwauraia. Nega ginigunana taunimanima ita hereva henidia neganai, idia momo be ita gwauraia sivaraina idia ura lasi kamonai. To bema ita gwauraia hereva be mai ena anina edia mauri lalonai, reana edia lalona ita veria diba Basileia ena sivarai do idia kamonai henia totona. Kiki hereva hamatamaia dalana ta be Mauri Hanaihanai bukana amo idia ura henia herevana ta ita abia hidi. Dahaka oi hereva diba?
2 Reana inai bamona do oi hereva diba:
◼ “Bema emu siahu ia hegeregere, hari inai nega lalonai edena hekwakwanai do oi ura hamaoromaoroa? [Naria do ia haere totona, bona ia maoro neganai, oi gwau taunimanima momo be ia bamona idia hereva.] Ema bona hari, tanobada biagudia be hari inai nega lalonai idia vara hekwakwanai haida sibona idia hamaoromaorodia. To taunimanima dekenai idia vara hekwakwanai iboudiai do ia haoredia diba Tauna ta ia noho. Mani emu kara, Salamo 145:16 ena hereva oi itaia. [Unai siri oi duahia, bona buka oi kehoa rau 11-13 dekenai bona unai laulau oi kikilaidia.] Paragraf 14 rau 14 dekenai oi lau henia henanadai ia gwauraia bona murinai ia gwau, unai namo be ‘edena negai do ia henidia?’ ” Oi hamaoroa inai buka ese unai henanadai do ia haerelaia, bona ia ura kamonai neganai, ia dekenai buka oi henia toho.
3 Eiava inai bamona oi hereva diba:
◼ “Reana oi diba vadaeni emu lalokau tauna ta be ia mase neganai emu hemami be oi dabu momokani. Reana oi lalohisihisi bona oi diba lasi dahaka do oi karaia. Reana inai henanadai oi lalodia: [Rau 76 paragraf 1 dekenai idia torea henanadai oi duahidia.] Unai henanadai edia haere do oi diba neganai do oi moale, ani? Oi ia hagoadaia herevana ta be inai, Baibel lalonai mase taudia totona helaro ta ia noho. [Ioane 5:28, 29 oi duahia.] Inai buka ese ita ia durua mase taudia be edena bamona ita lalo-pararalaia diba totona bona dina vaira ena helaro ita diba totona.” Nega sisina lalonai buka ena karoa 8 bona 20 oi kikilaia. Bema ia ura kamonai, buka oi henia ruma tauna dekenai do ia itaia namonamo totona.
4 Reana nega idauidau bona gabu idauidau dekenai oi haroro diba. Bema dala ia kehoa neganai, reana inai bamona do oi hereva diba:
◼ “Hari inai nega lalonai, tanobada hegegemadai hekwakwanai momo idia vara, bona reana oi danu be hekwakwanai oi davaria. Madi, nega momo kerere idia havaraia lasi taudia ese dika bada idia davaria. Oi laloa Dirava ese hisihisi iboudiai do ia haoredia, a? [Naria do ia haere totona.] Dirava ena gwauhamata be dahaka iena ura idia karaia taudia dekenai lau ura oi lau hadibaia. [Salamo 37:40 oi duahia bona Mauri Hanaihanai buka be rau 99 dekenai oi kehoa.] Inai buka ese dahaka dainai Dirava be kara dika ia do koua lasi bona edena bamona do ia haorea ia hahedinaraia.”
5 Bema oi be mero o kekeni maragi bona oi be pablisa ta, reana oi be rau 156-8 dekenai ia noho laulaudia amo kiki herevana oi henia diba. Hereva hamatamaia totona reana inai henanadai ruma tauna dekenai oi henia diba:
◼ “Oi ura inai bamona tanobadana dekenai do oi noho, a? [Naria do ia haere totona.] Inai laulau namodia iboudiai be Dirava ena Hereva, Baibel, lalonai ia noho gwauhamata hereva hegeregeredia. [Idia torea Baibel siridia oi duduia.] Dirava ia gwauhamata inai tanobada ibounai be paradaiso ai do ia halaoa, bona inai buka ese oi do ia durua diba, hereva ma haida unai sivarai dekenai do oi diba totona. Ia lalonai taunimanima hamauria sivaraina ia noho, bona do oi moale oi duahia neganai.”—Ioa. 17:3.
6 Buka oi hariharilaia neganai, kamonai taudia oi hamaorodia unai buka be mai ena davana, bona oi henia toho neganai davana oi gwauraia.
This article is repeated in km 8/95.