Baibel—Hekwakwanai Momo Tanobadana ai Moale Bona Helaro Ia Henia
1 Hari inai tanobada ese taunimanima ia do hametaudia bada bona moale bona helaro sivaraidia idia kamonai be namo. Baibel sibona dekena amo moale momokani idia abia diba. Ia ese kara maoromaoro tanobada matamatana ena helaro ia gwauraia. (Roma 15:4; 2 Pet. 3:13) Insight buka, Volume 1, rau 311 dekenai, ia gwau: “Bema Baibel ia noho lasi, Iehova do ita diba lasi, Keriso ese ia henia boubou gauna dainai idia vara hahenamo do ita diba lasi, bona Dirava ena kara maoromaoro Basileia lalonai eiava ena siahu henunai mauri hanaihanai abia totona ita badinaia taravatudia do ita lalo-pararalaidia lasi.”
2 November lalonai, ita ese Dirava ena Hereva, Baibel, be edena bamona taunimanima ia durudia diba inai hekwakwanai momo tanobadana lalonai do idia haheaukalaia totona, do ita kikilaia momo. Ita be New World Translation of the Holy Scriptures Baibel bona Buka Helaga—Dirava ena Hereva Eiava Taunimanima Edia? bukana do ita hariharilaidia. Edena bamona kudou-maoro taudia ita durudia diba bena do idia lalo-parara Baibel ena heduru be bada?
3 Ruma tauna oi hedavari henia murinai, reana inai bamona oi hereva diba:
◼ “Reana oi diba vadaeni, ita idia hametaua hekwakwanai be momo dainai iseda lalo-maino ia boio. Unai hekwakwanai haheaukalaidia totona ita badinaia diba heduru hereva be edeseniai do ita davaria diba? [Naria do ia haere totona.] Baibel ese lau ia hagoadaia badina ita ia hadibaia edena dala amo ita moale diba. [Luka 11:28 duahia.] Aiemai haroro gaukara ena badina be ai ura taunimanima ai hagoadadia Baibel do idia duahia bona ena hadibaia hereva amo namo do idia davaria totona. Inai Baibel stadi bukana, Buka Helaga—Dirava ena Hereva Eiava Taunimanima Edia?, ese oi ia durua diba unai do oi karaia totona. Tanobada dekenai idia vara hekwakwanai momo edia badina ia gwauraia, mani oi itaia. [Rau 187 paragraf 9 ena hereva iharuana oi duahia.] Bema oi ura inai buka do oi duahia, mai moale danu lau ura inai oi abia.”
4 Reana inai auka lasi herevana oi ura gwauraia:
◼ “Ai ese taunimanima ai hagoadadia Dirava ena Hereva, Baibel, do idia matauraia bada totona. Lau ura inai pepapepa oi abia, ena ladana be Bible Oi Abidadama Henia Diba. Ia ese ia hahedinaraia tanobada namona do ia vara ena helaro ita abia totona, dahaka dainai Baibel ena hereva ita abia dae be namo. [Oi kehoa rau 6 dekenai, bena Salamo 37:29 bona paragraf dokona oi duahia danu.] Namona be inai pepapepa oi duahia, bena gabeai lau giroa mai neganai, oiemu lalohadai Baibel ia gwauraia helaro herevana dekenai lau do oi hadibaia diba.”
5 Baibel stadi ta hamatamaia totona reana pablisa haida be inai bamona do idia hereva diba:
◼ “Lau mai, davana lasi Baibel stadi kosi ta oi lau hamaorolaia totona. Baibel be Dirava ena siahu dekena amo idia torea, bona ena hahediba herevadia ese ita idia durua diba ita kara maoromaoro totona. New World Translation of the Holy Scriptures Baibel be hari idia herevalaia English gado dekenai idia torea, bona idia karaia sibona eda stadi ita karaia totona. Tanobada hegegemadai Baibel idia duahia taudia milion momo ese idia ura henia bada. Nega sisina lalonai lau ura gaukaralaia dalana oi do lau hadibaia. [Oi kehoa rau 1653 dekenai, bona oi hamaoroa 23A ia itaia totona. Bema ia ura kamonai noho, namona be idia torea Baibel siri tamona eiava rua oi duahia bona edia anina umui kikilaia. Oi hamaoroa bema idia torea siridia umui duahidia, Dirava ese ena Basileia dekena amo dahaka do ia karaia idia hahedinaraia.] Mai moale danu lau ura gabeai lau giroa mai bona hereva ma haida Basileia ena helaro dekenai ita kikilaia diba.”
6 Baibel dekena amo moale bona helaro bona danu mauri hanaihanai dekenai ita ia hakaua diba hereva momokanina ita abia. (Ioa. 17:3, 17) Taunimanima ma haida dekenai Baibel ena diba ita kikilaia neganai, Iehova ia moale, badina “ia ura taunimanima ibounai ese mauri do idia davaria.”—1 Tim. 2:4.