Ita Durudia Bena ‘Ma Dohore Idia Kamonai Lou’
1 “Oiemu hereva ma dohore ai kamonai lou.” (Kara 17:32) Areo Ororo dekenai Paulo ena hereva namodia idia kamonai henia taudia haida be unai idia hereva. Hari inai negai danu, taunimanima dekenai Basileia ena sivarai ita kikilaia bona idia haida idia ura gabeai hereva ma haida do idia kamonai lou.
2 Kamonai taudia edia lalona ita veria noho totona ita lou henidia neganai, unai be hadibaia gaukara badana ita karaia. Bema ita hegaegae namonamo unai gaukara dekenai do ita kwalimu. Haroro School ena Buka, rau 17 paragraf 5 ai, ita ia henia heduru hereva be inai: “Stadi ena hereva badadia edia anina bona edia badina oi lalodia goevagoeva. Sibomu emu hereva amo oi gwauraidia toho. Unai hereva idia hamomokania Bible siridia edia anina oi dibaia namonamo. Oi laloa, stadi tauna be reana dahaka henanadai do ia gwauraidia, bena edia haere oi hegaegaelaidia.”
3 Bema guna tau ta dekenai “Buka Helaga—Dirava ena Hereva Eiava Taunimanima Edia?” oi hariharilaia, reana inai bamona do oi hereva diba:
◼ “Guna ita kiki hebou neganai, Baibel ena hereva ita abidadama henia diba ena badina haida ita kikilaia. Guna oi lau henia buka dekenai inai henanadai ta ia gwauraia, ‘Baibel Duahia ena Namo be Dahaka?’ [Rau 5 ena hereva ginigunana oi duahia, bena oi naria ena henanadai do ia haerelaia totona.] Baibel ese ita ia hadibaia kahirakahira Dirava ese taunimanima idia hekwarahilaia hekwakwanai iboudiai do ia haoredia, bona unai moale negana lalonai hahenamo do ita davaria totona, dala maorona dekenai ita ia hakaua. [Salamo 119:105 duahia.] Inai buka idia karaia ita siboda eda stadi bona ruma bese ena Baibel stadi durua totona. Mai moale danu lau ura gaukaralaia dalana oi lau hadibaia.”
4 Bema guna taunimanima dekenai “Bible Oi Abidadama Henia” pepapepana oi henidia, idia dekenai oi giroa lao neganai reana inai bamona oi hereva diba:
◼ “Ita ibounai ita ura diba dina vairadia dekenai dahaka do ia vara. Tanobada dekenai hari idia vara gaudia dainai, oi laloa dahaka do ia vara? [Naria do ia haere totona.] Ena be taunimanima idia laloa do idia vara gaudia idia gwauraidia diba, to Dirava ia diba momokani dahaka do idia vara. [Isaia 46:10 duahia.] Kahirakahira tanobada matamata ena paradaiso gabuna dekenai hahenamo do ita moalelaia be Baibel ese ia perovetalaia, reana unai oi hoalaia. [Rau 4 ena paragraf ihatoina oi duahia.] Lau ura unai gwauhamata namona ena hereva ma haida oi lau hadibaia.”
5 Bema guna tau ta dekenai “New World Translation” Baibel oi henia, oi lou henia neganai reana inai heduru hereva oi badinaia diba:
◼ “Vanegai, oi dekenai Baibel ta lau rakatania, bona lau gwau do lau giroa mai bona oi do lau durua gaukaralaia namonamo daladia do oi diba totona. Taunimanima tura henia noho dalana be reana nega haida ita daradaralaia. Baibel dekenai sisiba namona ia noho, bona New World Translation Baibel ese ita ia durua ita tahua herevana do ita davaria totona. [Rau 1595 oi kehoa bona sinado maragina ladana “Love(s)” oi itaia. Oi hamaoroa unai siri 1 Korinto 13:4; Kolose 3:14; bona 1 Petero 4:8 ia itaia. Nega sisina lalonai oi hahedinaraia bema unai siri idia gwauraia taravatuna ita badinaia neganai namo do ia havaraia.] Unai be heduru dala tamona sibona, to ia hahedinaraia iseda hekwakwanai hanaia totona, Baibel ese ita badinaia diba heduru hereva ita ia henia. Do lau giroa mai neganai, moale bona lalo-maino do ita abia totona, Baibel ese ita edena bamona ia durua dalana ma ta oi do lau hadibaia.”
6 Taunimanima dekenai diba maorona Dirava ena Hereva dekenai ita hadibaia be davana bada gauna bamona, ma gau ta ese unai davana ia hanaia diba lasi. Unai diba ese taunimanima ia hadibadia Iehova garina do idia gari totona, bona ia hagoadadia iena dala dekenai do idia raka totona, bona unai amo hahenamo ela bona hanaihanai do idia davaria.—Her. 2:20, 21.