Kamonai Taudia Ibounai Lou Henidia Durudia Totona
1 Dahaka ese ita ia hadibaia, tau ta ita lou henia be namo? Ena kamonai karana! Bema tau ta ena toana be ia ura Basileia ena sivarai ia kamonai sisina, ita ura gau ibounai do ita karaia unai tauna durua totona. Unai dainai lou henia ita karaia ena badina be ita ura unai tauna ena ura ita habadaia, bona Baibel stadi ita hamatamaia. Ena be buka ta ita rakatania lasi, to ita ura edia ura ita habadaia. Edena bamona unai ita karaia diba?
2 Bema vanegai, inai nega lalonai headava momo lalonai hekwakwanai idia vara umui kikilaia bona “Mauri Hanaihanai” buka oi rakatania, oiemu hereva be inai bamona oi hamatamaia diba:
◼ “Vanegai lau mai neganai, ita ese headava bona Baibel ena sisiba namodia ese ita ia durua diba moale do ita davaria totona ita kikilaia. Famili namodia lalonai danu nega ta ta hekwakwanai idia vara, ani? [Haere naria.] Baibel be sisiba namo herea ia henia iseda famili lalonai hekwakwanai ita hamaoromaorodia totona. Famili ese Baibel idia stadilaia hebou neganai, hahenamo idia davaria diba.” Rau 246 oi kehoa, bona paragraf 23 umui kikilaia. Ioane 17:3 oi duahia, bona oi hamaoroa ena famili oi durua diba Baibel idia stadilaia totona edia ruma dekenai.
3 Bema, natudia bona idia hadibaia karana be vanegai oi herevalaia, emu hereva be inai dala amo oi habadaia diba:
◼ “Vanegai, ita ese lauma dalanai natudia hadibaia karana bona tama sina ese edena bamona idia durudia diba ita kikilaia. Lau hereva henidia tama sina momo be hari matamata taudia edia kamonai lasi karana dekenai idia hoa bada. Oi be dahaka oi laloa . . . ? [Emu gabu dekenai matamata taudia edia kamonai lasi karana ta oi gwauraia. Haere naria.] Mani Baibel ese ia henia sisiba namodia haida lau hahedinaraia oi dekenai.” Mauri Hanaihanai buka oi kehoa rau 246 dekenai, bona paragraf 22 ena hereva badana oi kikilaia, bena Efeso 6:4 oi duahia. Oi hahedinaraia natudia momo be idia ura sisiba bona heduru. Tama sina ese unai idia henia neganai, natudia be do idia moale bona edia kara lalonai hemataurai idia hahedinaraia. Iseda natudia danu Baibel ita stadilaia karana oi gwauraia hedinarai.
4 Bema oi ese Paradaiso tanobadana oi herevalaia, inai oi herevalaia diba, iena ura oi habadaia totona:
◼ “Ita ese inai buka lalonai laulau haida ita itaia, Dirava ese tanobada be paradaiso ai do ia halaoa ena toana idia hahedinaraia. Bema iseda lalokau taudia ida paradaiso ita moalelaia lasi, ia be anina lasi. Oi laloa unai be momokani a?” Haere naria. Bena, Mauri Hanaihanai buka oi kehoa rau 162 dekenai. Apokalupo 21:3, 4 oi duahia, bona oi hahedinaraia iseda lalokau taudia be ita ida do idia noho hanaihanai diba. Bema unai ia moalelaia, Ioane 5:28, 29 oi duahia bona oi hahedinaraia mase taudia be do idia toreisi lou. Buka ena kopina oi hahedinaraia bona oi gwau: “Momokani—mauri hanaihanai Paradaiso lalonai ita abia diba!” Dahaka dainai ita diba Paradaiso be kahirakahira do ia mai umui kikilaia totona, oi lou henia negana oi hegaegaelaia.
5 Lou henia ita karaia ena badina be taunimanima ita durudia Basileia ena sivarai amo hahenamo idia abia totona. Taunimanima momo be lauma gaudia idia abia dae totona, edia ura habadaia gaudia ita herevalaia be namo. Buka lalonai ia noho heduru herevadia oi hadibadia, bona unai buka ese edena bamona do ia durudia edia Baibel idia dibaia namonamo totona oi hahedinaraia. Unai bamona lou henia ita karaia neganai, haida do ita durudia sibodia idia hanamoa totona.