Haida Oi Durua Sibodia Idia Hanamoa Totona
1 Iehova ia gwauhamata do ita dibaia gaudia be ita dekenai do ia hadibaia. Salamo 32:8 dekenai ita ia hagoadaia, ia gwau: “Lau ese oiemu raka dalana oi dekenai do lau hadibaia. Lau ese oi do lau hakaua, bona sisiba oi dekenai do lau henia.” Unai hagoadaia herevana ese ita ia durua bada. Mai lalokau ida ita ura haida ita hadibaia Baibel ena aonega herevadia idia badinaia neganai namo idia davaria diba. (Isa. 48:17) September lalonai unai ita karaia diba Mauri Hanaihanai bukana ita hariharilaia neganai. Taunimanima ita hereva henidia neganai, dala idauidau amo ita hahedinaraia diba Baibel be heduru bukana namona.
2 Hari, headava momo lalonai hekwakwanai idia vara dainai, oi ese inai lalohadai, “Mauri Hanaihanai” bukana amo oi gaukaralaia diba:
◼ “Lau hereva henidia taudia momo be headava lalonai moale lasi bona headava hadokoa karana ia bada dainai idia laloa momo. Dahaka oi laloa inai hekwakwanai dekenai? [Haere naria.] Momo ese unai hekwakwanai ena badina idia diba lasi. Bema idia gaukara goada, headava taudia ese edia headava do idia hadokoa lasi bona moale korikorina danu do idia davaria. Baibel ena sisiba gaukaralaia karana ese moale do ia havaraia.” Efeso 5:28, 29, 33 duahia. Rau 243 kehoa, paragraf 16 bona 17 oi herevalaia, bena buka oi hariharilaia.
3 Tama sina be natudia ida nega bada idia gaukaralaia hebou namonamo bona idia hadibadia be namo. “Mauri Hanaihanai” bukana oi gaukaralaia neganai, inai bamona oi hereva diba:
◼ “Ita ibounai be iseda matamata taudia edia vaira negana ita laloa bada. Dahaka oi laloa, edena dala amo tama sina ese natudia idia durua diba nega vaira ai idia noho namo totona? [Haere naria.] Lagani 3,000 gunanai idia torea Baibel ena aonega sisiba, mani oi kamonai. [Aonega Herevadia 22:6 duahia.] Ena be sikuli ena aonega ese iseda natudia idia durua bada, to ruma dekenai tama sina ese idia henia aonegana be mai anina bada. Unai karaia totona iseda nega ita henidia bona ita kamonai henidia bona lalokau henidia, unai ese namo bada do ia havaraia.” Buka oi kehoa rau 245 dekenai, paragraf 20 bona 21 oi herevalaia, bena oi hadibaia unai buka be edena bamona edia famili Baibel stadi lalonai idia gaukaralaia diba.
4 Hegaegae guna karana ese ita ia durua taunimanima ita hereva henia namonamo totona. Iduara dekenai oi do pidipidi lasi neganai, namona be do oi gwauraia Baibel ena hereva ta oi hegaegaelaia vadaeni. Bona, magasin eiava pepapepa amo hereva kwadogina ta oi hegaegaelaia unai amo bema buka idia abia lasi neganai oi gaukaralaia diba. September lalonai, dala idauidau oi tahua Basileia ena hereva momokani uhena oi hadoa totona. (Had. 11:6) Haida do oi durudia do idia noho hanaihanai hahenamodia idia abia totona.